ដោយ៖ ប៊ី
ភ្នំពេញ៖ ក្រុមហ៊ុនអាកាសចរជាតិ កម្ពុជា អង្គរ អ៊ែរ បើកការហោះហើរ រវាងរាជធានីភ្នំពេញ-សៀមរាប ចាប់ពីថ្ងៃទី១៥ កញ្ញា ឆ្នាំ២០២០នេះតទៅដើម្បីសម្រួលការធ្វើដំណើរក្នុងឱកាសពិធីបុណ្យភ្ជុំបិណ្ឌ។
ការចាប់ផ្តើមបើកការហោះហើររបស់ក្រុមហ៊ុនមួយអាកាសចរជាតិមួយនេះ ក៏លក់សំបុត្រក្នុងតម្លៃពិសេសផងដែរ។ នេះបើតាមការបញ្ជាក់របស់រដ្ឋលេខាធិការដ្ឋានអាកាសចរស៊ីវិលកម្ពុជា។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងថា “ក្នុងនាមក្រសួងទេសចរណ៍ ខ្ញុំសូមអរគុណដល់ក្រុមហ៊ុន អាកាសចរណ៍ជាតិកម្ពុជាអង្គរអ៊ែរ ដែលបានប្រកាសចាប់ផ្តើមប្រត្តិបត្តការហោះហើរឡើងវិញរៀងរាល់ថ្ងៃ ចាប់ពីថ្ងៃទី១៥ ខែកញ្ញា ឆ្នាំ២០២០នេះ ។ កិច្ចប្រត្តិបត្តិការឡើងវិញនេះ គឺស្របទៅនឹងសំណូមពររបស់ភ្ញៀវទេសចរផ្ទៃក្នងយើង ដែលកំពុងមាននិន្នាការកើនឡើងសព្វថ្ងៃ ក្នុងបរិបទដែលកម្ពុជាយើងមានការទប់ស្កាត់ការរីករាលដាលជំងឺកូវីដ-១៩ ផ្ទៃក្នុងបានល្អ” ។
លោក ថោង ខុន បានសង្ឃឹមថា ក្រុមហ៊ុនកម្ពុជាអង្គរអ៊ែរនឹងពិចារណាអំពីការបើកប្រត្តិបត្តិការហោះហើរឡើងវិញ រវាងភ្នំពេញ និងក្រុងព្រះសីហនុផងដែរ ក្នុងពេលដែលសព្វថ្ងៃនេះចរាចរណ៍តាមផ្លូវគោកកាន់តែតូចចង្អៀតដោយសារចំនួនរថយន្តកាន់តែច្រើន (ធ្វើដំណើរចំណាយច្រើនម៉ោង) ដែលនេះក៏ជាសំណូមពររបស់ទេសចរផ្ទៃក្នុងប្រត្តិបត្តិករទេសចរណ៍ និងអ្នកវិនិយោគផងដែរ។
ការបើកដំណើរការជើងហោះហើរក្នុងស្រុករបស់ក្រុមហ៊ុនកម្ពុជាអង្គរអ៊ែរ គឺឆ្លើយតបតាមតម្រូវការរបស់ភ្ញៀវទេសចរណក្នុងស្រុក ដែលនឹងមានការកើនឡើង ក្នុងឱកាសថ្ងៃឈប់សំរាកបុណ្យប្រពៃណីជាតិ ក៏ដូចជាការទទួលបានសុខសន្តិភាពពេញលេញនៅក្នុងព្រះរាជាណាចក្រកម្ពុជា៕
