ដោយៈវុត្ថា
ភ្នំពេញៈ គម្រោងសំណង់ ដែលបំរើឱ្យវិស័យបដិសណ្ឋារកិច្ចទេសចរណ៍ នៅក្នុងខេត្តកំពត មានការការសាងសង់ច្រើន ទាំងនៅក្នុងក្រុង តាមដងព្រែក និងជើងភ្នំមានចំនួនច្រើន បើទោះបីកម្ពុជាប្រឈមទៅនឹងវិបត្តិជំងឺកូវីដ១៩ នៅក្នុងឆ្នាំ២០២០នេះ។
ប្រធានមន្ទីរទេសចរណ៍ខេត្តកំពត លោកសយ ស៊ីណុល បានប្រាប់គេហទំព័រPropertyarea.asia កាលពីថ្ងៃទី ១៦ ខែធ្នូម្សិលមិញនេះថា លោកបានមិនដឹងច្បាស់នៅខេត្តណាផ្សេង ក្រៅពីខេត្តកំពតមានការអភិវឌ្ឍន៍ ឬសាងសង់សំណង់សម្រាប់បំរើឱ្យវិស័យបដិសណ្ឋារកិច្ច ជួបបញ្ហាប្រឈមនឹងវិបត្តិជំងឺកូវីដ១៩ឬក៏អត់ទេ ប៉ុន្តែសម្រាប់ខេត្តកំពត គឺមិនមានបញ្ហានោះទេ។
លោកបញ្ជាក់ថា “នៅក្នុងឆ្នាំ២០២០នេះ យើងមានបញ្ហាពាក់ព័ន្ធនឹងជំងឺកូវីដ មែន ប៉ុន្តែ សម្រាប់ការអភិវឌ្ឍន៍វិស័យសេវា និងសំណង់ដែលបំរើឱ្យវិស័យទេសចរណ៍ នៅក្នុងខេត្តកំពតនៅតែមានជារៀងរាល់ថ្ងៃ” ។ លោកបន្តថា “យើងសង្កេតឃើញថា សំណង់ដែលសាងសង់រួចរាល់ និងសំណង់ដែលកំពុងសាងសង់ មានការរីកដុះដាលច្រើនទាំងនៅក្នុងក្រុង និង នៅតាមដងព្រែកនៃខេត្តកំពត” ។
លោកសយ ស៊ីណុលបានបន្ថែមថា បើយើងប្រៀបធៀបជាមួយនឹងវិបត្តិ គ៏មានបញ្ហាហើយ ប៉ុន្តែស្ថានភាពជាក់ស្តែងនៅក្នុងខេត្តកំពតនេះ កំពុងតែបន្តដំណើរការទៅមុខដោយគ្មានការរាំងស្ទះនោះទេ ស្ទើរគ្រប់គម្រោង។ ប៉ុន្តែយ៉ាងណាក៏ដោយ បើតាមលោក ប្រធានរូបនេះ មិនបានបញ្ជាក់ពីចំនួនគម្រោងសាងសង់សំណង់ ដែលបំរើឱ្យវិស័យទេសចរណ៍ មានប៉ុន្មាននោះទេ ដោយលោកមិនទាន់បានធ្វើការសិក្សាតួលេខជាក់ស្តែង។
លោក បែន រតនា ម្ចាស់គម្រោងអភិវឌ្ឍន៍វិឡាលម្ហែកាយ នៅក្នុងខេត្តកំពតបានឱ្យដឹងដែរថា នៅក្នុងខេត្តកំពតនេះ មានគម្រោងអភិវឌ្ឍន៍សំណង់លម្ហែកាយ និងសំណង់ផ្សេងៗនៅតែដំណើរការ និងមានការកើនឡើងច្រើន នៅក្នុងរយៈពេលកន្លងមកនេះ ដោយសារខេត្តនេះ មានភាពអំណោយផលទាំងភូមិសាស្ត្រ និងតំបន់ដែលមានការទាក់ទាញខ្លាំង។
លោកបន្តថា “សម្រាប់ខេត្តកំពតនេះ បើនិយាយពីវិស័យអចលនទ្រព្យ មានការរីកចំរើ ដោយក្នុងនោះ យើងឃើញជាក់ស្តែងមានការអភិវឌ្ឍន៍ វិស័យឡូតិ៍ ផ្ទះល្វែង រមណីយដ្ឋាន ជាពិសេសវិឡាបែបលម្ហែកាយច្រើន សម្រាប់បំរើឱ្យវិស័យទេសចរណ៍” ។
លោកច្រឹក សុខនីម ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា ធ្លាប់បានឱ្យដឹងកន្លងមកនេះថា ខេត្តកំពត គឺជាខេត្តមួយក្នុងចំណោមខេត្តរបស់កម្ពុជា ដែលមានការរីកចំរើនទាំងផ្នែកសេដ្ឋកិច្ច ទេសចរណ៍ និងសំណង់ និងមានសក្តានុពលខ្ពស់ ព្រោះវានៅមិនឆ្ងាយពីភ្នំពេញ។
លោកបានព្យាករថា“ខេត្តកំពត នឹងត្រូវបានជ្រើសរើសជាខេត្តគោលដៅយអភិវឌ្ឍន៍ហេដ្ឋារចនាសម្ព័ន្ធទ្រង់ទ្រាយធំរបស់រាជរដ្ឋាភិបាល បន្ទាប់ពីខេត្តសៀមរាប” ៕
