ប្រទេសថៃស្រូបទាញភ្ញៀវទេសចរបរទេសជិត ៤៤,៧៧៤នាក់តាំងពីប្រទេសបានបើកដំណើរការឡើងវិញ

ដោយៈ សុផារី

ប្រទេសថៃៈ ភ្ញៀវបរទេសសរុបចំនួន៤៤,៧៧៤នាក់ បានមកទស្សនាប្រទេសថៃ ចាប់តាំងពីប្រទេសនេះ បានបើកដំណើរការឡើងវិញ សម្រាប់ទេសចរណ៍អន្តរជាតិជាច្រើនសប្តាហ៍មុន នេះបើយោងតាមតួលេខរបស់រដ្ឋាភិបាល។

យោងតាមអ្នកនាំពាក្យរដ្ឋាភិបាល លោក Thanakorn Wangboonkongchana បានឲ្យដឹងថា លោកនាយករដ្ឋមន្ត្រីប្រាយុទ្ធ ចាន់អូចា បានបង្ហាញសេចក្តីរីករាយនឹងកំណើនចំនួនភ្ញៀវបរទេស ដែលរំពឹងថានឹងបន្តកើនឡើង ខណៈដែលក្រុមហ៊ុនអាកាសចរណ៍កាន់តែច្រើនពីមជ្ឈិមបូព៌ា និងអឺរ៉ុប កំពុងស្នើសុំកន្លែងចុះចតកាន់តែច្រើននៅក្នុងប្រទេស។

លោកបាននិយាយថា ចាប់តាំងពីថ្ងៃទី១ ខែវិច្ឆិកា ក្រុមហ៊ុនអាកាសចរណ៍ចំនួន១៨ បន្ថែមទៀតបានបន្តជើងហោះហើរទៅ និងមកពីអាកាសយានដ្ឋានសុវណ្ណភូមិ ដែលនាំឱ្យចំនួនជើងហោះហើរសរុប ដែលបម្រើមជ្ឈមណ្ឌលអាកាសចរណ៍ សំខាន់របស់ទីក្រុងបាងកកកើនដល់២,០០៨។

លោកបាននិយាយថា ទន្ទឹមនឹងនេះដែរ ក្រុមហ៊ុនអាកាសចរណ៍ចំនួន១៩ កំពុងដំណើរការជើងហោះហើរចំនួន៧៩៣ជើងក្នុង និងក្រៅអាកាសយានដ្ឋានភូកេត ក្នុងខែនេះ ដែលជាការកើនឡើង៣៩% ពីខែតុលា ដោយដកស្រង់តួលេខពីវិទ្យុអាកាសចរណ៍ថៃ។

ក្នុងចំណោមភ្ញៀវបរទេសចំនួន៤៤,៧៧៤នាក់ មាន៣១,៦៦៦នាក់បានចូលមក ក្រោមកម្មវិធី “Test and Go” ខណៈដែល១០,៩៦៤នាក់ បានចូលប្រទេស តាមរយៈកម្មវិធីទេសចរណ៍ ដែលកំពុងដំណើរការនៅក្នុងខេត្តចំនួន១៧។ ទន្ទឹមនឹងនេះ ភ្ញៀវទេស​ចរណ៍ ដែលនៅសល់ចំនួន២,១៤៤នាក់ត្រូវឆ្លងកាត់ចត្តាឡីស័ក មុនពេលពួកគេត្រូវបានអនុញ្ញាតឱ្យធ្វើដំណើរក្នុងប្រទេស។

លោកបាននិយាយថា មានតែភ្ញៀវបរទេសចំនួន៥២នាក់ប៉ុណ្ណោះ ដែលបានធ្វើតេស្តវិជ្ជមានសម្រាប់កូវីដ១៩ នៅពេលមកដល់ ឬប្រហែល0.១២% នៃភ្ញៀវទាំងអស់។

គិតត្រឹមថ្ងៃសៅរ៍ ទេសចរចំនួន១៧៣,៦៣៧នាក់ បានដាក់ពាក្យស្នើ QR Code បណ្ណឆ្លងកាត់របស់ប្រទេសថៃ តាមរយៈគេហទំព័រ tp.consular.go.th ។ លោកបន្តថា ជាសរុបពាក្យសុំចំនួន១៣៤,០៨៦ ត្រូវបានអនុម័ត។

លោក Thanakorn បាននិយាយថា នាយករដ្ឋមន្ត្រីប្រាយុទ្ធ ចាន់អូចា បានស្នើឱ្យ Digital Economy and Society (DES) បង្កើនល្បឿនដំណើរការអនុម័ត សម្រាប់បណ្ណឆ្លងកាត់ប្រទេសថៃ៕