ដោយៈ ជេស៊ីកា
ភ្នំពេញៈ ក្រុមហ៊ុនអាកាសចរណ៍ចំនួន២ បានកំណត់ពេលវេលាជាក់លាក់ ភ្ជាប់ជើងហោះហើរត្រង់មកកម្ពុជាហើយ ខណៈក្រុមហ៊ុនជាច្រើនទៀត កំពុងរៀបចំផែនការហោះហើររបស់ខ្លួន។
ទីប្រឹក្សាសមាគមទីភ្នាក់ងារទេសចរណ៍កម្ពុជា និងជាទីប្រឹក្សាសភាពាណិជ្ជកម្មកម្ពុជា លោកហូ វណ្ឌីដែលបានធ្វើការរយ៉ាងជិតស្និទ្ឋ ជាមួយបណ្តាក្រុមហ៊ុនអាកាសចរណ៍នានាបានសម្តែងក្តីរីករាយ បន្ទាប់ពីប្រមុខរដ្ឋាភិបាលប្រកាស ពីការបើកទទួលភ្ញៀវទេសចរណ៍ អ្នកដំណើរនានាដែលបានចាក់វ៉ាក់សាំង និងមិនធ្វើចត្តាឡីស័កកាលពីថ្ងៃទី១៤ វិច្ឆិកាកន្លងមក។
លោកបានមានប្រសាសន៍ឲ្យដឹងថា ក្រុមហ៊ុនអាកាសចរណ៍ឡានម៉ី នឹងធ្វើការហោះហើរត្រង់ទៅកាន់ក្រុងបាងកក ពីរាជធានីភ្នំពេញនៅថ្ងៃទី២០ វិច្ឆិកាសប្តាហ៍ក្រោយនេះ ខណៈក្រុមហ៊ុន Bangkok Airway នឹងចាប់ផ្តើមហោះហើរត្រង់ពីទីក្រុងបាងកក មកកាន់រាជធានីភ្នំពេញនៅថ្ងៃទី១ ធ្នូខាងមុខនេះផងដែរ។
លោកបន្តថា លើសពីនេះក្រុមហ៊ុន Cambodia Angkor Air, Thai Smile, Philipine Airline, Thai Airwayបាននិងកំពុងត្រៀមហោះហើរមកកាន់កម្ពុជាផងដែរ។
ជាមួយគ្នានេះ លោកហូ វណ្ឌីបានសំណូមពរឲ្យរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុជួយសម្រួលបែបបទនិតិវិធីនានា ដើម្បីជួយសម្រួលឲ្យមានការភ្ជាប់ជើងហោះហើរពីអាកាសចរណ៍នានាផងដែរ ដើម្បីធ្វើយ៉ាងណាឲ្យភ្ញៀវទេសចរណ៍មកទស្សនាកម្ពុជាកើនឡើង និងជម្រុញវិស័យនេះឲ្យមានភាពរីកចម្រើន ព្រោះពេលណាវិស័យទេសចរណ៍រីកចម្រើន វានឹងមានឥទ្ឋពលជួយដល់វិស័យដទៃទៀត ឲ្យងើបឡើងព្រមគ្នាផងដែរ។
លោកក៏សំណូមពរឲ្យក្រុមហ៊ុនអាកាសចរណ៍ក្នុងស្រុក ផ្តោតលើការចាប់ផ្តើមហោះហើរឡើងវិញរវាងរាជធានីភ្នំពេញ ទៅកាន់ក្រុងព្រះសីហនុ ដើម្បីជម្រុញខ្សែចង្វាក់ធ្វើដំណើរឲ្យមានភាពសកម្ម និងរលូនផងដែរ៕
