ដោយៈគង់ សិរីជេស៊ីកា
កោះកុងៈ ឋានសួគ៌ធម្មជាតិ បានបង្កប់ខ្លូននៅកន្លែងជាច្រើន ពិសេសតំបន់ឆ្នេរកម្ពុជា ដែលពោរពេញដោយឆ្នេរខ្សាច់ដ៏ស្រស់ត្រកាល ទឹកសមុទ្រខៀវស្រងាត់ និងជីវចម្រុះទឹកប្រៃដ៏សម្បូរបែប។
រមណីយដ្ឋានកោះខ្យង ជាកូនកោះមួយដែលស្ថិតនៅស្រុកស្រែអំបិល ខេត្តកោះកុង ហើយក៏ជាកន្លែងសំរាក Camping បែប chill chill ជាមួយធម្មជាតិដ៏ស្រស់ត្រកាល និងដើមដូងដុះពាសពេញ ជាមួយនឹងដុំថ្មតូចធំតាមមាត់ឆ្នេរនៃកោះ។ សម្រាប់កោះមួយនេះ មិនមានទំហំធំនោះទេ ដើរតែ៥នាទីគឺបានមួយជុំកោះបាត់ទៅហើយ ប៉ុន្តែកោះមួយនេះ បានផ្តល់អារម្មណ៍ល្អបែបស្ងប់ស្ងាត់មួយ ជាមួយនឹងទេសភាព៣៦០ដឺក្រេតែម្តង បើមិនជឿរ មើលតែរូបទៅ។
យើងអាចមើលឃើញទាំងថ្ងៃរះ និងថ្ងៃលិចនៅលើកោះមួយនេះ (vibe ណាស់និយាយមែន) ជាមួយនឹងខ្យល់សមុទ្យដ៏រំភើយ ដែលមិនផ្តល់ភាពស្អិតដូចនៅមាត់ឆ្នេរដទៃ។ ឯសម្រាប់ម្ហូបអាហារ និងការស្នាក់នៅ(តង់) គឺតម្រូវអោយអ្នកទៅលេងត្រៀមរបស់ទាំងអស់នោះដោយផ្ទាល់ខ្លួន ហើយក៏អាចបង្កើតភ្នក់ភ្លើងនៅយប់បាន ជុំគ្នាយ៉ាងសប្បាយផងដែរ។
• ទីតាំង: កោះខ្យង ស្រុកស្រែអំបិល ខេត្តកោះកុង
ធម្មជាតិដ៏ត្រកាល ទស្សនាថ្ងៃរះពេលព្រឹកព្រលឹម អាំងគ្រឿងសមុទ្រស្រស់ៗបរិភោគជាអាហារពេលព្រឹក បន្ទាប់ពីចាកចេញពីតង់ដ៏កក់ក្តៅ។ បន្ទាប់មកយើងជិះទូកទទៅស្ទូចត្រីកម្សាន្ត មុនពេលទស្សនាថ្ងៃរៀបលិច ដែលចាំងព៌ណមាសលើផ្ទៃសមុទ្រមានរលកតូចៗ ពិតជាមានអារម្មណ៍យ៉ាងម៉េចដែរ? សម្រាប់អ្នកស្រលាញ់ធម្មជាតិ??៕
