ដោយ: ម៉ាលីស
ភ្នំពេញៈ ខេត្តសៀមរាប បានទទួលជើងហោះហើរអន្តរជាតិជាបន្តបន្ទាប់ ស្របពេលក្រុមហ៊ុនអាកាសចរណ៍ Thai Smile នឹងចាប់ផ្តើមជើងហោះហើរមកកាន់ខេត្តសៀមរាប ចាប់ពីថ្ងៃទី៣ ខែមីនា ឆ្នាំ២០២២ខាងមុខនេះផងដែរ។
លោកថោង ខុន រដ្ឋមន្រ្តីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល និងឯកជន ដើម្បីស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩ នាព្រឹកថ្ងៃទី២៤ ខែកុម្ភៈ ឆ្នាំ២០២២ បានដឹកនាំអន្តរក្រសួងបើកកិច្ចប្រជុំលើកទី២ របស់ក្រុមការងារប្រតិបត្តិដើម្បីវាយតម្លៃ និងគ្រប់គ្រងគោលដៅទេសចរណ៍សុវត្ថិភាពខេត្តសៀមរាប។
កិច្ចប្រជុំលើកទី២ ធ្វើឡើងដើម្បីការវាយតម្លៃ និងគ្រប់គ្រងគោលដៅទេសចរណ៍សុវត្ថិភាពខេត្តសៀមរាប ដែលជាគោលដៅទេសចរណ៍អាទិភាពរបស់កម្ពុជា ខណៈដែល វីរុសបំប្លែងថ្មីអូមីក្រុង បានកំពុងធ្វើឲ្យស្ថានភាពជំងឺកូវីដ-១៩ នៅកម្ពុជាកំពុងស្ថិត ក្នុងដំណាក់កាលថ្មីមួយទៀត ដែលចាំបាច់ ត្រូវមានការវាយតំលៃឲ្យបានម៉ត់ចត់ អំពីគោលដៅទេសចរណ៍ សុវត្ថិភាពរបស់កម្ពុជា ពិសេសខេត្តសៀមរាបតែម្តង។
នៅក្នុងកិច្ចប្រជុំនេះ អន្តរក្រសួងបានវាយតំលៃ និងទទួលស្គាល់ខេត្តសៀមរាប ជាគោលដៅទេសចរណ៍សុវត្ថិភាព និងបានកោតសរសើរចំពោះរដ្ឋបាលខេត្តសៀមរាប ដែលបានចូលរួមអនុវត្តវិធានការនានា របស់រាជរដ្ឋាភិបាល ក្នុងការទប់ស្កាត់ការរីករាលដាលជំងឺកូវីដ-១៩ ក្នុងខេត្តសៀមរាបនាពេលកន្លងមក ប្រកបដោយប្រសិទ្ធភាព និងការទទួលខុសត្រូវខ្ពស់ រហូតឈានដល់ការបើក ដំណើរការសកម្មភាពទេសចរណ៍ និងសេដ្ឋកិច្ចនានា ក្នុងគន្លងប្រក្រតីភាពថ្មី ខណៈដែលព្រលានយន្តហោះ ខេត្តសៀមរាប បានទទួលជើង ហោះហើរអន្តរជាតិជាបន្តបន្ទាប់ ស្របពេលក្រុមហ៊ុនអាកាសចរណ៍ Thai Smile នឹងចាប់ផ្តើមជើងហោះហើរ មកកាន់ខេត្តសៀមរាប ចាប់ពីថ្ងៃទី៣ ខែមីនា ឆ្នាំ២០២២នេះ។
លោក ថោង ខុន បានបញ្ជាក់ថា ការកំណត់តំបន់ ឬគោលដៅទេសចរណ៍សុវត្ថិភាព ត្រូវផ្អែកលើសូចនាករសមិទ្ធកម្មចំនួន៤ ដែលរួមមាន ទី១ អត្រានៃការចាក់វ៉ាក់សាំង សំដៅបង្កើតភាពស៊ាំសហគមន៍ ទី២ អត្រាអ្នកជំងឺកូវីដ-១៩ កម្រិតមធ្យម និងកម្រិតធ្ងន់ និងអត្រាស្លាប់នៃអ្នកជំងឺកូវីដ-១៩ ទី៣ សមត្ថភាពឆ្លើយតប និងព្យាបាល និងការគ្រប់គ្រងហានិភ័យ ដែលអាចកើតមានពីវីរុសបំប្លែងថ្មី និងទី៤ ការត្រៀមខ្លួនរបស់ឧស្សាហកម្មទេសចរណ៍។
លោករដ្ឋមន្ត្រី ក៏បានជំរុញឱ្យរដ្ឋបាលខេត្តសៀមរាប ពង្រឹងលើមូលដ្ឋានអាជីវកម្មទេសចរណ៍ក្នុងខេត្ត ឱ្យបានទទួលឡាបែល បញ្ជាក់ការអនុវត្តបានត្រឹមត្រូវតាម SOP របស់ក្រសួងទេសចរណ៍។
បន្ថែមពីនេះ ក្រោយទទួលបានការសំណូមពរពីអង្គប្រជុំ លោករដ្ឋម ន្ត្រី ថោង ខុន ក៏បានសម្រេចយកសំណើរស្តីពី ការបើកដំណើរការឡើងវិញ នូវទិដ្ឋាការ ពេលមកដល់កម្ពុជា (Visa on Arrival) សម្រាប់ភ្ញៀវទេសចរមកតាមផ្លូវអាកាស និងផ្លូវទឹក ផ្លូវគោក តែត្រូវអនុវត្តន៍តាមគោលករណ៍ សុខាភិបាល ដើម្បីស្នើសុំការពិនិត្យ និងឯកភាពពីគណៈប្រតិបត្តិ (គ.ប.ក)និងរាជរដ្ឋាភិបាលផងដែរ៕
