ដោយ គង់ សូរិយា
ភ្នំពេញ: បុរីថ្មីមួយបានចាប់ផ្តើមប្រកាសលក់គំរោងរបស់ខ្លួន បន្ទាប់ពីបានសាងសង់បណ្តើរៗ និងកំពុងទទួលបានការចាប់អារម្មណ៍ពីអតិថិជន ស្របពេលទីផ្សារបុរីលំនៅដ្ឋាននានានៅតែមានការលក់ល្អប្រសើរ។
ប្រធានផ្នែកទីផ្សារនៃបុរី HP លោក មឿន សុខលាភ បានមានប្រសាសន៍ឲ្យដឹងកាលពីថ្ងៃទី១៩ តុលាកន្លងមកថា បុរីHPបានចាប់ផ្តើមប្រកាសលក់ហើយជាមួយតម្លៃពិសេស និងមានលក្ខខ័ណ្ឌបង់ប្រាក់ងាយស្រួល។ បុរីនេះស្ថិតនៅតំបន់ស្ពានដែកស្ទឹងមានជ័យ ជាតំបន់ដែលមានការអភិឌ្ឍន៍យ៉ាងឆាប់រហ័ស។ លោកបន្តថា បុរីនេះលក់ក្នុងតម្លៃសមរម្យ បើធៀបជាមួយបុរីឬសំណង់នៅលំនៅដ្ឋាន ដែលបានដាក់លក់នៅតំបន់នោះ។
លោកបន្តថា “ទីផ្សារបុរីនៅតែមានភាពល្អប្រសើរ ជាក់ស្តែងគ្រាន់តែប្រកាសលក់បានមួយរយៈខ្លី លំនៅដ្ឋានក្នុងបុរីHP ដែលស្ថិតនៅលើផ្ទៃដី៣ហិកតា ទទួលបានការបញ្ជាទិញប្រមាណ៣០ភាគរយរួចហើយ”។
លោកមឿន សុខលាភបានបន្តថា ជាមួយនឹងកំនើនប្រាក់ចំណូលរបស់ប្រជាពលរដ្ឋ កំនើនសេដ្ឋកិច្ចរបស់ប្រទេស និងកម្រិតនៃការយល់ដឹងរបស់ប្រជាពលរដ្ឋកាន់តែមានភាពប្រសើរឡើង ការវិនិយោគបុរីនានាកាន់តែមានភាពប្រកួតប្រជែង ប៉ុន្តែយើងឈរលើក្រមសីលធ៌មមួយ ដោយធ្វើយ៉ាងណាគិតគូរជាចំបងលើហេដ្ឋារចនាសម្ព័ន្ឋ គុណភាព និងសោភ័ណភាពសំណង់ជាអាទិភាព ព្រោះការវិនិយោគរបស់យើងធ្វើរយៈពេលវែង ហេតុនេះ យើងមិនគិតតែយកប្រាក់ចំណេញនោះទេ។
ទីផ្សារបុរីនៅកម្ពុជានៅតែសម្រេចបានកំនើនល្អប្រសើរ ពិសេសទីក្រុងភ្នំពេញដោយសារកំនើនប្រជាសាស្រ្តក្នុងទីក្រុងនេះ និងកំនើនសេដ្ឋកិច្ច ព្រមទាំងការកើនឡើងប្រាក់ ចំណូលរបស់ប្រជាពលរដ្ឋ។
យោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់បានរកឃើញថា កម្ពុជាត្រូវការលំនៅដ្ឋានប្រមាណ៨០ម៉ឺនខ្នងបន្ថែមទៀត នៅចន្លោះឆ្នាំ២០១៥ ដល់ឆ្នាំ២០៣០។
