ដោយ វុត្ថា
ភ្នំពេញ : ជាដំណឹងល្អមួយ ខណៈពេលដែលមានព័ត៌មានជាច្រើនបានបង្ហាញពីក្ដីព្រួយបារម្ភពាក់ព័ន្ធទៅនឹងការប្រឈមការលើកលែងការអនុគ្រោះពន្ធទាំងស្រុងរបស់ផលិតផលនានាពីកម្ពុជាទៅកាន់ទីផ្សារសហភាពអឺរ៉ុបនោះ ពេលនេះ ក្រុមហ៊ុនដៃគូ សមាគមអ្នកបញ្ជាទិញ និងសមាគមយុត្ដិធម៌ការងារសហរដ្ឋអាមេរិក បានប្រកាសនៅតែបន្ដគាំទ្រកិច្ចសហប្រតិបត្តិការជាមួយកម្ពុជាលើការបញ្ជាទិញទំនិញ និងផលិតផលសម្លៀកបំពាក់ និងស្បែកជើង ដើម្បីនាំចេញទៅកាន់សហរដ្ឋអាមេរិក និងសហគមន៍អឺរ៉ុបដដែល។
លោក អ៊ិត សំហេង រដ្ឋមន្ត្រីក្រសួងការងារ បានលើកឡើងថា ក្រុមហ៊ុនដៃគូ និងសមាគមអ្នកបញ្ជាទិញទាំងអស់ បានប្រកាសនៅតែបន្ដគាំទ្រដល់កម្ពុជា ដើម្បីធានាដល់ការប្រកួតប្រជែងរបស់កម្ពុជា សម្រាប់ការនាំចេញផលិតផលដូចជាសម្លៀកបំពាក់ និងស្បែកជើង។
ថ្លែងប្រាប់ក្រុមអ្នកសារព័ត៌មាន នៅក្រោយជំនួបពិភាក្សាការងារជាមួយសមាគមអ្នកបញ្ជាទិញ ដឹកនាំដោយលោក Michael Posner ប្រធានក្រុមប្រឹក្សាភិបាល នៃសមាគមយុត្ដិធម៌ការងារសហរដ្ឋអាមេរិក កាលពីថ្ងៃទី១៩ ខែតុលា ម្សិលមិញនេះ នៅទីស្ដីការក្រសួង លោក អ៊ិត សំហេង បានបញ្ជាក់ថា ការជួបពិភាក្សាគ្នានេះគឺ ដើម្បីពិនិត្យមើលអំពីវឌ្ឍនភាពទាក់ទងនឹងលក្ខខណ្ឌការងារ ការរៀបចំប្រាក់ឈ្នួល យន្ដការដោះស្រាយវិវាទ និងការអនុវត្ដច្បាប់សហជីពនៅក្នុងប្រទេសកម្ពុជា។
លោកបានបញ្ជាក់ថា ដៃគូអ្នកបញ្ជាទិញចង់ដឹងពីវឌ្ឍនភាព បញ្ហាប្រឈមនានា ដែលកម្ពុជាបាន និងកំពុងតែជួបប្រទះ ដើម្បីរួមគ្នាធ្វើយ៉ាងណាស្វែងរកដំណោះស្រាយ និងពង្រឹង កិច្ចសហប្រតិបត្តិការឱ្យកាន់តែរឹងមាំទៅមុខទៀត។ ដោយឡែកចំពោះបញ្ហាប្រឈមនានាដែលបានកើតឡើងនាពេលបច្ចុប្បន្ននេះ ទាក់ទងនឹងពាណិជ្ជកម្មនៅក្នុងពិភពលោក នឹងមិនប៉ះពាល់ដល់កិច្ចសហប្រតិបត្តិការរវាងកម្ពុជា និងក្រុមហ៊ុនដៃគូបញ្ជាទិញផលិតសម្លៀកបំពាក់ និងស្បែកជើង ដែលនាំចេញទៅសហរដ្ឋអាមេរិក និងសហគមន៍អឺរ៉ុបនោះទេ។
ថ្លែងនៅក្នុងឱកាសនោះ លោក Mechael Posner ក៏បានលើកឡើងថា ការជួបពិភាក្សាជាមួយភាគីកម្ពុជានេះ គឺដើម្បីចង់ដឹងអំពីដំណើរការ និងការខិតខំប្រឹងប្រែងរបស់រាជរដ្ឋាភិបាលកម្ពុជា ដែលបានអនុវត្ដន៍លក្ខខណ្ឌការងារ ការរៀបចំប្រាក់ឈ្នួល យន្ដការដោះស្រាយវិវាទ និងការអនុវត្ដច្បាប់សហជីព ជាពិសេស ការទទួលបាននូវព័ត៌មានដោយ ផ្ទាល់ពីភាគីរាជរដ្ឋាភិបាល។ លោកបានបន្ដថា ក្រុមហ៊ុនដៃគូទាំងអស់ បានប្រកាសធានាដល់ការប្រកួតប្រជែង និងការបញ្ជាទិញទំនិញ ផលិតសម្លៀកបំពាក់ និងស្បែកជើងពីកម្ពុជាបន្ដទៀត និងគ្មានពេលកំណត់ ៕
