អ្នកវិនិយោគ​អចលនទ្រព្យធំ៖ ភាព​តានតឹង​នយោបាយ មិន​ប៉ះពាល់​វិស័យនេះ​ទេ

0

ភ្នំពេញ៖ ស្របពេល​ភាព​តានតឹង​នយោបាយ​កំពុង​កើតឡើង ប្រជាពលរដ្ឋ​បាន​សម្តែង​ការព្រួយបារម្ភ​ពី​បញ្ហា​នេះ ប៉ុន្តែ​ប្រធាន​អ្នក​សមាគម​អ្នក​អភិវឌ្ឍន៍​លំនៅដ្ឋាន​កម្ពុជា បាន​លើកឡើងថា កំដៅ​នយោបាយ​មិន​ប៉ះពាល់​ការវិនិយោគ​ក្នុង​វិស័យនេះ​ទេ។

លោក​ឧកញ៉ា លី ហួរ ប្រធាន​សមាគម​អ្នក​អភិវឌ្ឍន៍​លំនៅដ្ឋាន​កម្ពុជា បាន​ថ្លែង​ឲ្យ​ដឹង​នា​ព្រឹក​ថ្ងៃទី០៩ តុលា​នេះ​ថា លោក​គិតថា អ្នករកស៊ី អ្នកវិនិយោគ និង​ប្រជាពលរដ្ឋ​ទូទៅ មិនគួរ​បារម្ភ​ពី​បញ្ហា​នេះ​ពេក​ទេ ដោយសារ​អ្វី​ជា​តម្រូវ​ការចាំបាច់ ដែលជា​មុខរបរ​ប្រចាំថ្ងៃ​ដូចជា កសិកម្ម ឧស្សាហកម្ម ពាណិជ្ជកម្ម គឺជា​កត្តា​ចម្បង ដែល​យើង​គួរផ្តោត និង​គិតតែ​ធ្វើទៅ ព្រោះ​រយៈពេល ៥ឆ្នាំ​ម្តង​តែងតែមាន​ការបោះឆ្នោត ហើយ​ប្រជាជន​ក៏​កាន់តែ​យល់ដឹង​ច្រើន មិនគួរ​បារម្ភ​ពី​បញ្ហា​នេះ​ទេ គួរតែ​គិត​អំពី​មុខរបរ​របស់ខ្លួន​ធ្វើយ៉ាងណា​ឲ្យ​មាន​ភាព​រីកចម្រើន។

លោក​បញ្ជាក់ថា “ប្រសិនជា​យើង​ចេះតែ​ស្តាប់​គេ​និយាយ គឺ​វា​មិន​ដូច​អ្វីដែល​យើង​នៅទីនេះ​ផ្ទាល់​នោះទេ គឺ​យើង​នៅទីនេះ​ឃើញជាក់ស្តែង គឺ​មិនមាន​បញ្ហា​អ្វី​ផង ដូច្នេះ​កុំ​គិតពី​ចំណុច​នេះ​ខ្លាំងពេក។ លោក​បន្តថា “បើ​យើង​ស្តាប់​គេ​និយាយ ហើយ​មើល​ព័ត៌មាន​ខ្លះ​បំប៉ោង​បន្ថែម កាន់តែ​ធំធេង​ណាស់ ប៉ុន្តែ​សម្រាប់​យើង​ជា​អ្នក​នៅទីនេះ វិនិយោគ​ផ្ទាល់ គឺ​មិនមាន​បញ្ហា​ទេ ហើយ​បើ​មាន​បញ្ហា​ខ្ញុំ​នឹងមិន​បញ្ចេញ​គំរោង​របស់ខ្ញុំ​បន្តបន្ទាប់​ទេ ហើយ​នៅពេល​ខាងមុខឆាប់ៗនេះ ខ្ញុំ​នឹង​បញ្ចេញ​គំរោង​វិនិយោគ​ថ្មី​បន្ថែមទៀត។

លោក​ឧកញ៉ា លី ហួរ បាន​បន្តថា “ខ្ញុំ​មិន​គិតថា​វា​ជា​បញ្ហា​ធំ​ទេ ព្រោះ​បន្ទាប់ពី​កា​រប​ផះ​ឆ្នោត​ហើយ អ្វីៗនឹង​ល្អ​រៀបរយ​ឡើងវិញ​មិន​ខាន។ ហេតុនេះ​យើង​មានមុខ​របរ​អ្វី យើង​ត្រូវ​គិត​អ្វី​ចំពោះមុខ​ថា តើ​យើង​អាចធ្វើ​អ្វី​បាន កុំ​លឺ​ផ្គរក្តុងក្តាំងៗ ហើយ​ចាក់ទឹក​ចោល​អស់ ប៉ុន្តែ​មិនមាន​ភ្លៀង​ផង។

លោក​ឧកញ៉ា នួន រិ​ទ្ឋី អគ្គនាយក​ក្រុមហ៊ុន​អចលនទ្រព្យ Khmer Foundation Appraisal បាន​ថ្លែងថា អ្វីៗនៅតែ​ដំណើរការ​ល្អប្រសើរ មិនមាន​បញ្ហា​អ្វី​នោះទេ ដោយសារ​កម្ពុជា​រក្សាបាន​កំណើនសេដ្ឋកិច្ច​រឹងមាំ ស្ថិរភាព​នយោបាយ ស្ថិរភាព​ម៉ាក្រូសេដ្ឋកិច្ច ហេតុនេះ​អ្នកវិនិយោគ​មាន​ភាព​ឆ្លាត​វៃ​ណាស់ ពួកគេ​មើល​រយៈពេល​វែង គឺ​សេដ្ឋកិច្ចកម្ពុជា​នៅតែមាន​ភាពរឹងមាំ​រយៈ​ពេល​វែង ស្ថិរភាព​នយោបាយ​នៅតែ​រក្សាបាន ហេតុនេះ​កម្ពុជា​នៅតែ​ជាទី​តាំង​ដ៏​ទាក់ទាញ សម្រាប់​អ្នកវិនិយោគ​នានា។

លោក​បន្តថា “ខ្ញុំ​គិតថា​កម្ពុជា​នៅតែ​បន្ត​រីកចម្រើន និង​មិនមាន​អ្វី​ប៉ះពាល់​ពី​បញ្ហានយោបាយ​តិចតួច​នេះ​ទេ វា​មិនមែនជា​បញ្ហា​ទេ គឺ​រដ្ឋាភិបាល​អនុវត្ត​ន៍​ច្បាប់ អ្នកណា​ធ្វើ​ខុស​គឺមាន​ទោស​ជា​រឿង​ធម្មតា ព្រោះ​ប្រទេស​យើង​ប្រកាន់យក​និតិរដ្ឋ។

លោក គីម ហ៊ាង ប្រធាន​សមាគម​អ្នក​វាយ​ត​ម្ល​ស និង​ភ្នាក់ងារ​អចលនវត្ថុ​កម្ពុជា​បាន​ថ្លែងថា ជាធម្មតា​ក្នុងពេល​មាន​អ្នក​មួយចំនួន​មើលឃើញ​បញ្ហា វា​ជា​ឱកាស​ទៅវិញ​ទេ ដែល​អ្នក​ឆ្លាត​តែងមាន​ឳ​កាស​ជោគជ័យ ព្រោះ​ពេលនេះ​អ្នកណា​ហ៊ាន​គឺ​ទទួលបាន​ផលចំណេញ ខណៈ​អ្នកព្រួយបារម្ភ​បាន​លក់​អចលនទ្រព្យ​របស់ខ្លួន។

លោក​បន្តថា សម្រាប់​ខ្ញុំ ខ្ញុំ​គិតថា​វា​មិនមាន​អ្វី​គួរ​ឲ្យ​បារម្ភ​ទេ ព្រោះអ្វីៗទាំងអស់​រដ្ឋាភិបាល​អាច​គ្រប់គ្រង​បាន។

យោងតាម​របាយការណ៍​របស់​ក្រសួង​រៀបចំ​ដែនដី នគរូបនីយកម្ម និង​សំណង់​បាន​បង្ហាញថា រយៈពេល ៧ខែ​ដើម​ឆ្នាំនេះ ទុនវិនិយោគ​ក្នុង​វិស័យ​សំណង់ និង​អចលនទ្រព្យ​មាន​ទំហំ​ទឹកប្រាក់​ជាង៥ពាន់​លាន​ដុល្លារ​អាមេរិក៕

ដោយ គង់ សូរិយា

LEAVE A REPLY

Please enter your comment!
Please enter your name here