ដោយៈ ជេស៊ីកា
ភ្នំពេញៈ ក្រុមហ៊ុនទ្រី ភាព គ្រុបបាននិងកំពុងកសាងហេដ្ឋារចនាសម្ព័ន្ឋនានា ដើម្បីឈានទៅអភិវឌ្ឍន៍រមណីយដ្ឋានកោះទន្សាយ ជាមួយផ្ទៃដី១៤០ហិកតា។
ជាមួយនឹងផែនការកសាងសណ្ឋាគារកម្រិតផ្កាយ៥ ទីលានវាយកូនហ្គោល មជ្ឈមណ្ឌលកំសាន្តលំដាប់អន្តរជាតិ ភោជនីយដ្ឋាន និងសេវាកម្មកំសាន្តដទៃទៀត ក្រុមហ៊ុននេះបាននិងកំពុងកែប្រែមុខមាត់កោះទន្សាយ ក៏ដូចជា ខេត្តកែបទៅកាន់កម្រិតថ្មីមួយទៀត។
អភិបាលនៃគណអភិបាលខេត្តកែប លោកសោម ពិសិដ្ឋបានមានប្រសាសន៍ឲ្យដឹងតាមទូរស័ព្ទកាលពីពេលថ្មីៗនេះថា រហូតមកទល់ពេលនេះ ក្រុមហ៊ុនទ្រីភាពបានដាក់គ្រឿងចក្រ ត្រាស់សេ ផ្លូវ និងការដ្ឋានមូយចំនួនហើយ ដោយក្រុមហ៊ុននេះបានធ្វើសកម្មភាពវិនិយោគពិតប្រាកដ មិនមែនបានទទួលពីរដ្ឋាភិបាលហើយ ទុកចោកនោះទេ។
លោកបន្តថា “យ៉ាងណាក៏ដោយក្រុមហ៊ុននេះ មិនទាន់បានចុះកិច្ចព្រមព្រៀងជាមួយរដ្ឋាភិបាលនៅឡើយទេ ដោយសារក្រុមហ៊ុននេះកំពុងសិក្សា និងរៀបចំប្លង់គោលអភិវឌ្ឍន៍ឲ្យបានជាក់លាក់ជាមុនសិន”។ លោកបន្តថា “ទោះជាបានទទួលទំហំដីជាគោលការណ៍ប្រមាណ១៤០ហិកតាក្តី តែក្រុមហ៊ុននេះអាចអនុញ្ញាត្តឲ្យធ្វើសកម្មភាពអភិវឌ្ឍតែចន្លោះពី៣០ ទៅ៤០ភាគរយប៉ុណ្ណោះ ព្រោះតំបន់មួយចំនួនជាភ្នំ ព្រៃឈើដែលត្រូវការអភិរ័ក្ស និងថែររក្សាសោភ័ណភាពរបស់កោះនេះ”។
លោកសោម ពិសិដ្ឋបានបន្តទៀតថា ក្រុមហ៊ុនទ្រី ភាពនឹងអភិវឌ្ឍន៍កោះនេះជាសណ្ឋាគារ បឹងហ្កាឡូ ភៅជនីយដ្ឋាន មជ្ឈមណ្ឌលកំសាន្ត ទីលានវាយកូនហ្គោលខ្នាតតូចជាដើម ស្របពេលកោះទន្សាយជាកោះល្បីល្បាញ និងមានភាពស្រស់ស្អាត ហើយបើអ្នកមកកាន់ខេត្តកែប មិនស្គាល់កោះទន្សាយដូចជាមិនបានមកដល់ខេត្តកែប។
ជាមួយគ្នានេះ លោកបានឲ្យដឹងផងដែរថា ក្រុមហ៊ុនទ្រី ភាពមិនមានគំរោងសាងសង់ខ្សែកាប មានកន្រ្តកយោងចេញពីក្រុងកែប ទៅកាន់កោះទន្សាយនោះទេ ដែលព៌តមាននេះបានត្រឹមតែជាការលើកឡើងតគ្នាប៉ុណ្ណោះ។
ខេត្តកែបត្រូវបានរដ្ឋាភិបាល ពិសេសផែនការមេរបស់ក្រសួងទេសចរណ៍រៀបចំផែនការអភិវឌ្ឍន៍ ជាតំបន់ទេសចរណ៍លំហែរកាយកម្រិតខ្ពស់ ដោយមិនអនុញ្ញាត្តឲ្យមានការសាងសង់រោងចក្រ សហគ្រាសដែលបង្ហុយផ្សែងនាំដល់ការបំពុលបរិស្ថាននោះទេ៕
