ដោយៈគង់ សូរិយា
ភ្នំពេញៈ ធនាគារពិភពលោកគ្រោងជួយរៀបចំប្រព័ន្ឋគ្រប់គ្រងសេវាកម្មរថយន្តក្រុង នៅក្រុងសៀមរាបនាពេលខាងមុខនេះ។
ក្នុងជំនួបរវាងលោកតូច ចាន់កុសលរដ្ឋលេខាធិការក្រសួងសាធារណការ និងដឹកជញ្ជូន និងលោក Benedict L.J Eijbergen ប្រធានគ្រប់គ្រងផ្នែកដឹកជញ្ជូននៃធនាគារពិភពលោកកាលពីថ្ងៃទី២៤ ឧសភាកន្លងមកភាគីទាំងពីរបានពិភាក្សា លើគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងប្រព័ន្ធរចនាសម្ព័ន្ធអាងប្រព្រឹត្តិកម្មទឹកកខ្វក់ និងទឹកស្អាតនៅកម្ពុជា។
ជាមួយគ្នានេះភាគីទាំងពីរ បានពិភាក្សាអំពីការបំពាក់សម្ភារឧបករណ៍បញ្ចូលថាមពលយានយន្តអគ្គិសនី (EV Charging Station) ដើម្បីជំរុញការប្រើប្រាស់យានយន្តប្រភេទនេះ ឱ្យបានកាន់តែទូលំទូលាយនៅកម្ពុជា និងគម្រោងអភិវឌ្ឍន៍ប្រព័ន្ធរថយន្តក្រុង (Bus) នៅខេត្តសៀមរាបផងដែរ។
ថ្នាក់ដឹកនាំធនាគារពិភពលោក ដែលជាដៃគូអភិវឌ្ឍន៍កម្ពុជា បានពិភាក្សាលើការគ្រប់គ្រងប្រព័ន្ធ ចម្រោះទឹកកខ្វក់នៅតាមបណ្ដារាជធានី-ខេត្តសំខាន់ៗ ជាពិសេសរាជធានីភ្នំពេញ និងក្រុងព្រះសីហនុ និងគម្រោងអភិវឌ្ឍមជ្ឈមណ្ឌលព័ស្តុភារកម្មភ្នំពេញ (PPLC)ផងដែរ។
កិច្ចប្រជុំនេះក៏បានពិភាក្សាផងដែរ អំពីស្ថានភាពនៃការអនុវត្តគម្រោងស្ថាបនា និងពង្រីកផ្លូវជាតិលេខ៤ ក្រោមប្រាក់កម្ចីសម្បទានពីធនាគារពិភពលោក ដើម្បីកាត់បន្ថយការកកស្ទះចរាចរណ៍ និងបង្កើនសុវត្ថិភាពដល់ការធ្វើដំណើររបស់ប្រជាពលរដ្ឋ និងកាត់បន្ថយអត្រាគ្រោះថ្នាក់ចរាចរណ៍៕
