ដោយៈគង់ សូរិយា
បាត់ដំបងៈ ប្លង់ស្ថាបត្យកម្មថ្មីមួយ ដែលជាទីសក្ការបូជាសាសនាបាហៃបានបង្ហាញនូវភាពឆើតឆាយរបស់ខ្លួន នៅលើទឹកដីខេត្តបាត់ដំបង ដងស្ទឹងសង្កែ។
សំណង់ស្ថាបត្យកម្មនេះ មានទីតាំងស្ថិតនៅភូមិបោះពោធិ៍ ឃុំអូរដំបង១ ស្រុកសង្កែខេត្តបាត់ដំបង តាមផ្លូវពីភូមិបោះពោធិ៍ឆ្ពោះ ទៅកាន់ភូមិអូរស្រឡៅ ចម្ងាយប្រហែល៧គីឡូម៉ែត្រពីក្រុងបាត់ដំបង។
សំណង់ស្ថាបត្យកម្ម ដែលមានលក្ខណៈប្លែកនិងល្អវិចិត្រនេះ ត្រូវបានរចនាឡើងដោយស្ថាបត្យករខ្មែរលោក តាំង សុចិត្តវិទូ ដែលបានបញ្ចប់ការសិក្សាថ្នាក់បណ្ឌិត មកពីសហរដ្ឋអាមេរិក និងត្រូវបានដាក់សម្ភោធជាផ្លូវការនៅថ្ងៃទី១ ខែកញ្ញា ឆ្នាំ ២០១៧។
លក្ខណៈពិសេសនៃសំណង់ស្ថាបត្យកម្មនេះគឺ៖
- ជាសំណង់ស្ថាបត្យកម្មដែលមានច្រកចូលចំនួន ០៩។
- ជាសំណង់ស្ថាបត្យកម្មដែលសាងសង់ឡើងនៅលើទីទួលចាក់បំពេញនិងជុំវិញមានគូទឹក។
- ដំបូលផ្នែកខាងក្រោមគឺជារចនាបថដំបូលផ្ទះខ្មែរ។
- ដំបូលផ្នែកខាងលើគឺប្រើកញ្ចក់ដើម្បីឱ្យពន្លឺចូលដល់ខាងក្នុងនិងចំកណ្តាល។
- ដំបូលលឿងកណ្តាលធ្វើពីអាលុយមីញូមពត់កោងដែលទាមទារបច្ចេកទេសខ្ពស់ក្នុងការធ្វើ។
- ការរចនាអគារត្រូវបានសិក្សាយ៉ាងច្បាស់លាស់ពី ពន្លឺថ្ងៃ ខ្យល់ បរិស្ថាន និងសំឡេង។
- ជាសំណង់ស្ថាបត្យកម្មដែលមានការគិតគូរពីការសន្សំសំចៃថាមពល ដោយមិនប្រើប្រាស់ម៉ាស៊ីនត្រជាក់ គឺមានការប្រើប្រាស់ទ្វារ និងបង្អួចច្រើន។
- ការទាញយកភាពត្រជាក់ពីគូទឹកដែលនៅជុំវិញ។
ទីសក្ការបូជាសាសនាបាហៃ នៅលើទឹកដីខេត្តបាត់ដំបង គឺជាសំណង់ស្ថាបត្យកម្មបែបសាសនា ដែលមានភាពលេចធ្លោ និងប្រកបដោយភាពសុខដុមរមនាជាមួយសហគមន៍។ ស្នាដៃស្ថាបត្យកម្មនេះ ក៏ជាគោលដៅទេសចរណ៍បែបសាសនា ដែលត្រូវបានមន្ទីរទេសចរណ៍ ខេត្តបាត់ដំបងបានកំណត់រួចហើយផងដែរ៕ ប្រភពArchCambodia៕
