ដោយ គង់ សូរិយា
ភ្នំពេញ : ក្រុមហ៊ុនវិនិយោគអាកាសយានដ្ឋានកម្ពុជា នឹងរៀបចំពិធីទទួលអ្នកដំណើរនិងអបអរសាទរ ចំពោះការមកដល់អ្នកដំណើរទី១០លាននាក់ នៅព្រលានយន្តហោះអន្តរជាតិភ្នំពេញនាខែធ្នូងខាងមុខនេះ។
លោក ពេជ្រ សុប៉ុនតារា ប្រធានផ្នែកបង្កើនការហោះហើរ នៃអាកាសយានដ្ឋានដែលគ្រប់គ្រងព្រលានយន្តហោះទាំងបីនៅកម្ពុជា បានមានប្រសាសន៍ឲ្យដឹងកាលពីចុងសប្តាហ៍មុនថា ក្រុមហ៊ុនវិនិយោគអាកាសយានដ្ឋានកម្ពុជា នឹងរៀបចំពិធីទទួលអ្នកដំនើរ១០លាននាក់នៅក្នុងសប្តាហ៍ទី៣នាខែធ្នូខាងមុខនេះ ព្រោះនៅឆ្នាំនេះព្រលានយន្តហោះភ្នំពេញ និងខេត្តសៀមរាបនឹងទទួលបានអ្នកដំណើរសរុប១០លាននាក់។
លោកបន្តថា “យើងឃើញមានកំណើនអ្នកដំណើរ ឆ្លងកាត់ព្រលានយន្តហោះមានការកើនឡើងល្អប្រសើរ និងលើសផែនការដែលយើងរំពឹងទុក”។ លោកបន្តថា “ព្រលានយន្តហោះអន្តរជាតិខេត្តសៀមរាប និងរាជធានីភ្នំពេញមានអាកាសចរណ៍ជាង៣០កំពុងប្រតិបត្តិការហោះឡើងចុះជាប្រចាំ”។
ដោយឡែកព្រលានយន្តហោះអន្តរជាតិកងកេង ខេត្តព្រះសីហនុ នឹងរំពឹងទទួលបានភ្ញៀវទេសចរណ៍ និងអ្នកដំណើរឆ្លងកាត់ប្រមាណ៧០ម៉ឺននាក់នៅឆ្នាំនេះ។
លោក ពេជ្រ សុប៉ុនតារា បានបន្តថា វិស័យអាកាសចរណ៍នៅកម្ពុជាកំពុងមានការរីកចម្រើន ដោយសារការកើនឡើងនូវចំនួនភ្ញៀវទេសចរជាតិ អន្តរជាតិ និងកំនើននៃការមកដល់នូវអ្នកវិនិយោគកាន់តែច្រើន។
