ដោយសុខុម
សិង្ហបុរី: ការដាំក្បាលចុះនូវប្រាក់ចំណូលកាស៊ីណួ ឬបនល្បែងនៅក្រុងម៉ាកាវ ដែលជាមជ្ឈមណ្ឌលបនល្បែងស៊ីសងដ៏ធំបំផុតរបស់ពិភពលោក កំពុងជះផលប៉ះពាល់ធ្ងន់ធ្ងរមកលើសេដ្ឋកិច្ចក្រុងនេះទាំងមូល ដោយបង្ខំឱ្យអាជីវកម្មរាប់រយត្រូវបិទទ្វារ និងជំរុញឱ្យអត្រាគ្មានការងារធ្វើកើនឡើងខ្ពស់បំផុត មិនធ្លាប់មានចាប់តាំងពីឆ្នាំ២០០៩មក។
កាលពីថ្ងៃពុធ ទី០១ ខែមិថុនា ក្រុងម៉ាកាវ ដែលធ្លាប់ស្ថិតក្រោមនឹមអាណានិគមរបស់ប្រទេសព័រទុយហ្គាល់ បានបាត់បង់ប្រាក់ចំណូលល្បែងប្រចាំខែធ្ងន់ធ្ងរបំផុត ចាប់តាំងពីខែកញ្ញា ឆ្នាំ២០២០មក។
ការដាំក្បាលចុះនេះកើតមានឡើងមួយសប្ដាហ៍ ក្រោយពីរដ្ឋបាលក្រុងម៉ាកាវ បានព្រមានថា ការកើនឡើងនូវអត្រាបាត់បង់ការងារធ្វើ និងវិបត្តិហិរញ្ញវត្ថុ អាចបណ្ដាលឱ្យមានចលាចលសង្គម និងធ្វើឱ្យសន្តិសុខក្នុងក្រុងទីក្រុងនេះបាត់បង់ស្ថិរភាព។
តំបន់រដ្ឋបាលពិសេសរបស់ចិន មួយនេះគឺជាតែមួយគត់នៅក្នុងប្រទេសចិន ដែលអនុញ្ញាតឱ្យស្របច្បាប់សម្រាប់ការលេងល្បែងស៊ីសងក្នុងកាស៊ីណូ។ នេះមានន័យថា ការលេងល្បែងស៊ីសងនៅក្រៅពីក្រុងម៉ាកាវ គឺខុសច្បាប់។
ដោយពឹងផ្អែកខ្លាំងលើពន្ធកាស៊ីណូ ដែលគ្របដណ្ដប់ រហូតដល់ទៅជាង៨០%នៃប្រាក់ចំណូលរបស់រដ្ឋបាលក្រុងនេះ ម៉ាកាវទទួលបានភាពជោគជ័យតិចតួចណាស់ នៅក្នុងការធ្វើពិពិធកម្មសេដ្ឋកិច្ចរបស់ខ្លួន។
សាស្ត្រាចារ្យ Glenn McCartney បង្រៀននៅសកលវិទ្យាល័យក្រុងម៉ាកាវ (University of Macao) បានលើកឡើងថា “ក្រុងរបស់យើងពឹងផ្អែកលើទេសចរណ៍ខ្លាំងបំផុតក្នុងពិភពលោក។ ជាការពិតណាស់ យើងគ្មានឧស្សាហកម្មផ្សេងៗទៀត ដែលត្រូវពឹងផ្អែកនោះទេ”។
សាស្ត្រាចារ្យរូបនេះបានបន្ថែមទៀតថា “ដោយសារតែបែបនេះ ក្រុងរបស់យើងមិនបានធ្វើពិពិធកម្មសេដ្ឋកិច្ចអស់រយៈពេល២០ឆ្នាំមកហើយ។ ការធ្វើពិពិធកម្មនឹងមិនកើតឡើង នៅថ្ងៃស្អែកនោះឡើយ និយាយរួម គឺស្ថានភាពនេះនឹងមិនត្រូវបានដោះស្រាយ ក្នុងពេលឆាប់ៗនោះទេ”៕
