ដោយ វុត្ថា
ភ្នំពេញ៖ មន្ត្រីជាន់ខ្ពស់ទទួលបន្ទុកកិច្ចការពាណិជ្ជកម្ម នៃចក្រភពអង់គ្លេសប្រចាំតំបន់អាស៊ីអាគ្នេយ៍ លោក Chris Pook បានបង្ហាញចំណាប់អារម្មណ៍ចូលរួមអភិវឌ្ឍន៍វិស័យហេដ្ឋារចនាសម្ព័ន្ធ អប់រំ សុខភាព និងបច្ចេកវិទ្យា ដើម្បីជំរុញកំណើនសេដ្ឋកិច្ចកម្ពុជា និងពង្រឹងកិច្ចសហប្រតិបត្តិការរវាងអង់គ្លេស និងកម្ពុជា។
នៅក្នុងជំនួបពិភាក្សាជាមួយ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅទីស្តីការក្រសួង កាលពីរសៀលថ្ងៃពុធ ទី៧ ខែវិច្ឆិកា ឆ្នាំ២០១៨កន្លងមក លោក Chris Pookបានឲ្យដឹងថា ចក្រភពអង់គ្លេសមានបំណង ផ្តល់នូវជំនួយហិរញ្ញប្បទាន ដើម្បីគាំទ្រការអនុវត្តគម្រោងសំខាន់ៗនៅក្នុងប្រទេសកម្ពុជា ដូចជាការអភិវឌ្ឍហេដ្ឋារចនាសម្ព័ន្ធ ការបណ្តុះបណ្តាលធនធានមនុស្ស ការលើកកម្ពស់សុខមាលភាពសាធារណៈ និងការធ្វើទំនើបកម្មបច្ចេកវិទ្យា។
មន្ត្រីជាន់ខ្ពស់ចក្រភពអង់គ្លេសរូបនេះបានបន្ថែមទៀតថា ក្រៅពីវិស័យអទិភាពខាងលើ អង់គ្លេសក៏មានបំណងចូលរួមអភិវឌ្ឍន៍ទីក្រុងវ័យឆ្លាត (Smart City) នៅក្នុងប្រទេសកម្ពុជា និងនៅតាមរដ្ឋជាសមាជិកអាស៊ានផងដែរ ហើយបច្ចុប្បន្ន មានវិនិយោគិនអង់គ្លេសជាច្រើន កំពុងស្វែងរកឱកាសពង្រីកធុរកិច្ច និងវិនិយោគ មកកាន់កម្ពុជា និងតំបន់អាស៊ាន ប៉ុន្តែត្រូវការហេដ្ឋារចនាសម្ព័ន្ឋ និងធនធានមនុស្ស ដើម្បីគាំទ្រការធ្វើប្រតិបត្តិការ។
រដ្ឋមន្ត្រីពាណិជ្ជកម្មកម្ពុជា បានស្វាគមន៍ចំពោះចេតនារបស់ចក្រភពអង់គ្លេស និងបានពន្យល់ដល់លោក Chris Pook អំពីចក្ខុវិស័យរបស់រាជរដ្ឋាភិបាល យុទ្ធសាស្ត្រចតុកោណដំណាក់កាលទី៤ គោលនយោបាយអភិវឌ្ឍន៍ឧស្សហកម្ម និងគោលនយោបាយគាំពារវិនិយោគកម្ពុជា ដែលផ្តោតសំខាន់លើការទាក់ទាញវិនិយោគិន ដើម្បីធ្វើពិពិធកម្មឱកាសការងារ និងបែកចែកកំណើនប្រកបដោយសមធម៌។
លោក ប៉ាន សូរស័ក្តិ បានស្នើចក្រភពអង់គ្លេស ពិចារណាចូលរួមជាមួយគម្រោងផ្លូវ និងខ្សែក្រវ៉ាត់ (Belt & Road) របស់ប្រទេសចិន និងធ្វើការចុះកិច្ចព្រមព្រៀងពាណិជ្ជកម្មសេរីទេ្វភាគី (FTA) ជាមួយកម្ពុជា ដើម្បីធានាបាននូវកិច្ចសហប្រតិបត្តិការស៊ីជម្រៅលើវិស័យសេដ្ឋកិច្ច និងពាណិជ្ជកម្មរវាងប្រទេសទាំងពីរ។
ទំហំពាណិជ្ជកម្មទ្វេភាគីរវាងកម្ពុជា និងចក្រភពអង់គ្លេស មានវឌ្ឍនភាពគួរឱ្យកត់សម្គាល់ នៅក្នុងនោះការនាំចេញទំនិញរបស់កម្ពុជា បានកើនឡើងពីទឹកប្រាក់៧៥២លានដុល្លារ នៅក្នុងឆ្នាំ២០១៤ ដល់ទឹកប្រាក់១,០១៤លានដុល្លារ នៅក្នុងឆ្នាំ២០១។ ទន្ទឹមគ្នានេះលំហូរទុនវិនិយោគផ្ទាល់ពីអង់គ្លេស (FDI) មកកម្ពុជាកាលពីឆ្នាំ២០១៧ មានចំនួន៥៥លានដុល្លារ ដែលធ្វើឱ្យអង់គ្លេសស្ថិតនៅតែជាប្រទេសមួយ ក្នុងចំណោមប្រទេសចំនួន១០ដែលបានវិនិយោគច្រើនជាងគេនៅកម្ពុជា៕
