ដោយវុត្ថា
ភ្នំពេញៈ កិច្ចប្រជុំរដ្ឋមន្រ្តីដឹកជញ្ជូនអាស៊ាន-ចិនលើកទី១៧ បានចាប់ផ្តើមប្រជុំកាលពីម្សិលមិញនេះ នៅទីក្រុងបាងកក ប្រទេសថៃ បានផ្តោតលើការពិភាក្សាទៅលើចំណុចជាច្រើន ដើម្បីអោយការដឹកជញ្ជូនៅក្នុងតំបន់អាស៊ាន កាន់តែប្រសើរឡើងថែមមួយកម្រិតទៀត។
កិច្ចប្រជុំនេះផ្តោតសំខាន់ការពិភាក្សាលើ ការពង្រឹងទីផ្សារអាកាសចរណ៍អាស៊ានតែមួយ ការជំរុញការដឹកជញ្ចូនអ្នកដំណើរ និងទំនិញឆ្លងកាត់ព្រំដែនដោយរលូន ការព ង្រឹងកិច្ចខិតខំប្រឹងប្រែង សំដៅសម្រេចឱ្យបាននូវទីផ្សារដឹកជញ្ចូន តាមផ្លូវសមុទ្រអាស៊ានតែមួយ ការដឹកជញ្ចូនប្រកបដោយចីរភាព ភាពជាដៃគូដឹកជញ្ជូនជាមួយដៃគូសន្ទនា និងបញ្ហាពាក់ព័ន្ធផ្សេងៗទៀត។
-->
រដ្ឋមន្ត្រីដឹកជញ្ជូនអាស៊ាន-ចិនបានពិភាក្សា អនុម័តលើឯកសារសំខាន់ៗដូចជា៖ គម្រោងអាទិភាពសម្រាប់ឆ្នាំ២០១៩ ពិធីសារទី៤ស្តីពី សិទ្ធិហោះហើរCo-Terminal Rights) ដែលស្ថិតនៅក្រោមកិច្ចព្រមព្រៀងពហុភាគីអាស៊ាន នៃសេវាកម្មដឹកជញ្ជូនអ្នកដំណើរតាមផ្លូវអាកាសដោយសេរីពេញលេញ រវាងអាកាសយានដ្ឋាននៅក្នុងដែនដីនៃប្រទេសសមាជិកអាស៊ាន (នឹងត្រូវចុះហត្ថេលខាដោយ រដ្ឋជាសមាជិកអាស៊ាន) ផែនទីបង្ហាញផ្លូវសេដ្ឋកិច្ចប្រេងឥន្ធនៈអាស៊ាន សម្រាប់វិស័យដឹកជញ្ជូនឆ្នាំ២០១៨ ២០១៥ ដោយផ្តោតលើយានយន្តធុនស្រាល គោលការណ៍ណែនាំស្តីពី សូចនាករដឹកជញ្ជូនផ្លូវគោកប្រកបដោយចីរភាព លើប្រសិទ្ធភាពថាមពល និងការបញ្ចេញឧស្ម័នផ្ទះកញ្ចក់នៅក្នុងអាស៊ាន និងយុទ្ធសាស្រ្តតំបន់អាស៊ាន ស្តីពីការដឹកជញ្ជូនតាមផ្លូវគោកប្រកបដោយចីរភាព អនុស្សរណៈនៃការយោគយល់រវាងរដ្ឋាភិបាល នៃរដ្ឋជាសមាជិកសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន (ASEAN) ស្តីពីការកែលម្អបទដ្ឋានសុវត្ថិភាព និងអធិការកិច្ចនាវាមិនមែនអនុសញ្ញាដែលស្ថិតក្នុងរដ្ឋ ជាសមាជិកអាស៊ាន (នឹងត្រូវចុះហត្ថេលខាដោយរដ្ឋជាសមាជិកអាស៊ាន) នីតិវិធីប្រតិបត្តិការស្ដង់ដារ នៃការស្វែងរកនិងការសង្គ្រោះអាស៊ាន និងផែនការនៃការទប់ស្កាត់បន្ទាន់ការកំពប់ប្រេងតំបន់។
រដ្ឋមន្ត្រីក៏បានផ្លាស់ប្តូរទស្សនៈ និងយោបល់លើវិធីឆ្ពោះទៅមុខ ដើម្បីពង្រឹងបន្ថែមទៀតនូវកិច្ចសហប្រតិបត្តិការដឹកជញ្ជូន ក្នុងចំណោមរដ្ឋជាសមាជិកអាស៊ាន និងជាមួយ ដៃគូសន្ទនា។ ផែនការយុទ្ធសាស្ត្រកែសម្រួលសម្រាប់ កិច្ចសហប្រតិបត្តិការដឹកជញ្ជូនអាស៊ាន-ចិន (២០១៨-២០២០) ត្រូវបានអនុម័ត ក្នុងកិច្ចប្រជុំរដ្ឋមន្រ្តីដឹកជញ្ជូនអាស៊ាន-ចិនលើកទី១៧ នៅទីក្រុងបាងកកនៅថ្ងៃទី០៨ ខែវិច្ឆិកា ឆ្នាំ២០១៨។
ជាមួយគ្នានោះ រដ្ឋមន្រ្តីដឹកជញ្ជូនបានសម្តែងនូវការកោតសរសើរ ចំពោះការចួលរួមចំណែកនៃកិច្ចសហប្រតិបត្តិការដឹកជញ្ជូន ចំពោះភាពជាដៃគូយុទ្ធសាស្ត្រចិន និងអាស៊ាន ដែលរហូតមកដល់ឆ្នាំនេះមានរយៈពេល១៥ឆ្នាំ និងបានប្តេជ្ញាចិត្តជំរុញបន្ថែមទៀត កិច្ចសហប្រតិបត្តិការដឹកជញ្ជូន សំដៅលើកកម្ពស់ទំនាក់ទំនងឱ្យបានគ្រប់ជ្រុងជ្រោយរវាងចិន និងអាស៊ាន។
រដ្ឋមន្រ្តីបានពិភាក្សា និងផ្តល់អនុសាសន៍ណែនាំលើការអនុវត្តន៍ឯកសារសំខាន់ៗ ដូចជា ទី១- កិច្ចសហប្រតិបត្តិការដឹកជញ្ជូនតាមផ្លូវអាកាស អាស៊ាន-ចិន ទី២- កិច្ចសហប្រតិបត្តិការដឹកជញ្ជូន តាមផ្លូវសមុទ្រអាស៊ាន-ចិន និងទី៣-សកម្មភាពរួមអាស៊ាន-ចិន សម្រាប់ឆ្នាំ២០១៩។
រដ្ឋមន្ដ្រីបានអនុម័តកម្មវិធីសកម្មភាព នៃផែនការយុទ្ធសាស្ត្រកែសម្រួលសម្រាប់ កិច្ចសហប្រតិបត្តិការដឹកជញ្ជូនអាស៊ាន-ចិន (២០១៨-២០២០) ដែលស្របតាមគោលដៅ និងសកម្មភាព នៃផែនការយុទ្ធសាស្រ្តដឹកជញ្ជូនគូឡាឡាំពួរ ២០១៦-២០២៥ និងចក្ខុវិស័យរបស់ចិន ស្តីពី “គំនិតផ្តួចផ្តើមខ្សែក្រវ៉ាត់ និងផ្លូវ” ។ កម្មវិធីសកម្មភាពនឹងអាចជួយផ្តល់ការណែនាំ នៅក្នុងការអនុវត្តផែនការយុទ្ធសាស្រ្ត កែសម្រួលសម្រាប់កិច្ចសហប្រតិបត្តិការដឹកជញ្ជូនអាស៊ាន-ចិន៕
