ដោយៈ សុខុម
ប៉េកាំង: មហាយក្សចិន បានថ្កោលទោសប្រធានទីភ្នាក់ងារអវកាសសហរដ្ឋអាមេរិក ហៅកាត់ថា NASA ដែលបានអះអាងថា រដ្ឋាភិបាលក្រុងប៉េកាំង អាចនឹងកាន់កាប់ភពព្រះចន្ទ ក្នុងកម្មវិធីអវកាសយោធា។ នេះបើយោងតាមសារព័ត៌មាន Aljazeera ចុះផ្សាយកាលពីថ្ងៃអង្គារ ទី៥ ខែកក្កដា។
លោក Zhao Lijian អ្នកនាំពាក្យក្រសួងការបរទេសចិន បានថ្លែងទៅកាន់ក្រុមអ្នកយកព័ត៌មាន កាលពីថ្ងៃច័ន្ទ ទី៤ ខែកក្កដា ថា ប្រទេសចិន ប្រឆាំងដាច់ខាតចំពោះ”ការលើកឡើងដោយគ្មានការទទួលខុសត្រូវ” របស់លោក Bill Nelson ប្រធានអង្គការNASA។
លោក Bill Nelson បានប្រាប់កាសែតអាល្លឺម៉ង់ Bild ក្នុងបទសម្ភាសន៍មួយ ដែលត្រូវបានចេញផ្សាយ កាលពីថ្ងៃសៅរ៍ ទី២ ខែកក្កដា ថា លោកព្រួយអំពីមហិច្ឆតាអវកាសរបស់ប្រទេសចិន។
សំដៅដល់ផែនការរុករកភពព្រះចន្ទ របស់រដ្ឋាភិបាលក្រុងប៉េកាំង លោក Bill Nelson បានលើកឡើងថា “យើងមានការព្រួយបារម្ភយ៉ាងខ្លាំងដែលប្រទេសចិន នឹងចុះចតលើភពព្រះចន្ទ ហើយនិយាយថា ‘ភពព្រះចន្ទពេលនេះជារបស់យើង ហើយអ្នកនៅក្រៅត្រូវតែចាកចេញ’”។
ប្រទេសចិន ដែលបានពន្លឿនកម្មវិធីអវកាសរបស់ខ្លួន ក្នុងរយៈពេលមួយទសវត្សរ៍មកនេះ បានផ្ដោតយកចិត្តទុកដាក់យ៉ាងខ្លាំង លើកម្មវិធីរុករកភពព្រះចន្ទ។
ប្រទេសចិន បានធ្វើការចុះចតនៅលើភពព្រះចន្ទ ជាលើកដំបូងរបស់ខ្លួនក្នុងឆ្នាំ២០១៣ ហើយកំពុងត្រៀមផែនការបញ្ជូន យានគ្មានមនុស្សបើកទៅកាន់ប៉ូលខាងត្បូង នៃភពព្រះចន្ទនៅពេលណាមួយ ក្នុងទសវត្សរ៍នេះ៕ Aljazeera៕
