ដោយសុខុម
ហាណូយ: ក្រុមហ៊ុនថាមពលអគ្គិសនី AES Corp ដែលមានមូលដ្ឋាននៅសហរដ្ឋអាមេរិក គ្រោងនឹងអភិវឌ្ឍស្ថានីយថាមពលអគ្គិសនីដើរដោយកង្ហារខ្យល់ក្នុងទឹកសមុទ្រ (Offshore Wind Farm) ដ៏ធំមួយនៅប្រទេសវៀតណាម។
វៀតណាម បាននិយាយកាលពីថ្ងៃសុក្រ ទី២៩ ខែកក្កដា ថា គម្រោងស្ថានីយអគ្គិសនីនេះនឹងអាចបង្កើនសមត្ថភាពថាមពលកង្ហារខ្យល់របស់ខ្លួនបានដល់ទៅទ្វេដង។
ក្រសួងឧស្សាហកម្ម និងពាណិជ្ជកម្មវៀតណាម បានចេញសេចក្តីថ្លែងការណ៍ថា ស្ថានីយអគ្គិសនីដើរដោយកង្ហារខ្យល់ក្រោមទុនវិនិយោគដល់ទៅប្រមាណ១៣ពាន់លានដុល្លារ និងដែលមានសមត្ថភាពផលិតអគ្គិសនីបាន៤.០០០មេហ្គាវ៉ាត់ (MW) នេះនឹងត្រូវសាងសង់ឡើងនៅក្នុងខេត្ត Binh Thuan ភាគកណ្តាលនៃប្រទេសវៀតណាម។
ទោះជាយ៉ាងណា ក្រុមហ៊ុន AES Corp ភ្លាមៗមិនបានឆ្លើយបំភ្លឺទេជុំវិញដំណឹងនេះ នៅពេលទីភ្នាក់ងារព័ត៌មាន Reuters ទាក់ទងទៅ។
យោងតាមប្រព័ន្ធផ្សព្វផ្សាយរដ្ឋឱ្យដឹងថា បច្ចុប្បន្នប្រទេសវៀតណាម មានសមត្ថភាពផលិតអគ្គិសនីដើរដោយកង្ហារខ្យល់សរុបបានប្រមាណ៤.០០០មេហ្គាវ៉ាត់ (MW) ហើយចង់ដំឡើងស្ថានីយកង្ហារខ្យល់ដើម្បីផលិតអគ្គិសនីឱ្យបាន១១.០០០មេហ្គាវ៉ាត់នៅត្រឹមឆ្នាំ២០៣០ និង៦៦.០០០មេហ្គាវ៉ាត់នៅត្រឹមឆ្នាំ២០៤៥។
ក្រសួងបានបញ្ជាក់ថា ក្រុមហ៊ុន AES Corp បានដាក់លិខិតបញ្ជាក់ពីគោលបំណងអភិវឌ្ឍគម្រោងនេះជូនទៅគណៈប្រតិភូថាមពលវៀតណាម រួចហើយអំឡុងកិច្ចសន្ទនាអំពីសន្តិសុខថាមពលវៀតណាម-អាមេរិក ប្រចាំឆ្នាំនៅវ៉ាស៊ីនតោន កាលពីដើមសប្ដាហ៍នេះ៕ Reuters៕
