ដោយៈ សុផារី
ភ្នំពេញៈ ធនាគារជាតិនៃកម្ពុជា (NBC) បានឱ្យដឹងថា ឧស្សាហកម្មធនាគាររបស់ប្រទេសកម្ពុជា ទទួលបានកំណើនដ៏រឹងមាំទាំងប្រាក់កម្ចី និងប្រាក់បញ្ញើនៅក្នុងឆមាសទីមួយនៃឆ្នាំ២០២២។
NBC ឧស្សាហកម្មធនាគាររបស់កម្ពុជាមានកំណើនរឹងមាំក្នុងឆមាសទីមួយឆ្នាំ២០២២
យោងតាមរបាយការណ៍ចុងក្រោយ កាលពីថ្ងៃទី២៩ ខែកក្កដា ឆ្នាំ២០២២ បានឱ្យដឹងថា ប្រាក់កម្ចីឆ្នើម (Outstanding loans) បានកើនឡើង២៣,៤ភាគរយ ធៀបនឹងឆ្នាំមុន ដល់៥១,៥ពាន់លានដុល្លារត្រឹមខែមិថុនាឆ្នាំនេះ ខណៈប្រាក់បញ្ញើរបស់អតិថិជន បានកើនឡើង១៦ភាគរយ ដល់៤២ពាន់លានដុល្លារ។
ប្រាក់កម្ចីនេះ ត្រូវបានផ្តល់ទៅឱ្យវិស័យសំខាន់ៗ ដូចជា វិស័យពាណិជ្ជកម្ម លំនៅឋាន សំណង់ កសិកម្ម សណ្ឋាគារ និងភោជនីយដ្ឋាន និងវិស័យកាម្មន្តសាល ក្នុងចំណោមវិស័យផ្សេងទៀត ដោយបន្ថែមថា កម្ចីមិនដំណើរការ Non-Performing Loans (NPLs) នៅធនាគារ និងគ្រឹះស្ថានមីក្រូហិរញ្ញវត្ថុនានា ស្ថិតក្នុងអត្រាដែលអាចគ្រប់គ្រងបានចំនួន២,៦ភាគរយ និង២,៣ភាគរយ។
របាយការណ៍បាននិយាយថា ទ្រព្យសកម្មបច្ចុប្បន្ន នៅក្នុងប្រព័ន្ធធនាគាររបស់ប្រទេសអាស៊ីអាគ្នេយ៍ បានកើនឡើងដល់៧៥,២ពាន់លានដុល្លារ ត្រឹមខែមិថុនា ឆ្នាំ២០២២ កើនឡើង១៧,២ភាគរយធៀបនឹងខែមិថុនា ឆ្នាំ២០២១។
ធនាគារជាតិនៃកម្ពុជា បានឱ្យដឹងថា បច្ចុប្បន្នកម្ពុជាមានធនាគារពាណិជ្ជចំនួន៥៨ ធនាគារឯកទេសចំនួន៩ និងគ្រឹះស្ថានមីក្រូហិរញ្ញវត្ថុចំនួន៨៦ ដែលមានការិយាល័យកណ្តាល និងសាខាសរុបចំនួន ២.៦១៤ ព្រមទាំងម៉ាស៊ីនអេធីអឹមចំនួន៣.៩៩៨គ្រឿងនៅទូទាំងប្រទេស។
ធនាគារជាតិនៃកម្ពុជាបានបន្ថែមថា បច្ចុប្បន្នមានគណនីបញ្ញើចំនួន១៣,២លាន និងគណនីឥណទានចំនួន៣,៥លាន នៅធនាគារ និងគ្រឹះស្ថានមីក្រូហិរញ្ញវត្ថុរបស់ប្រទេសកម្ពុជា៕
