ដោយៈ សុផារី
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា រហូតមកទល់ពេលនេះ ប្រទេសកម្ពុជាបានជំពាក់បំណុលបរទេស ចំនួនសរុប៩,៨១ពាន់លានដុល្លារអាមេរិក ដែលស្ថានភាពបំណុលរបស់ប្រទេសកម្ពុជា ស្ថិតនៅក្នុងភាពមិនគួរឱ្យព្រួយបារម្ភនោះទេ។
លោកមាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ នៅក្នុងសន្និសីទសារព័ត៌មានស្ដីពី “សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងសេដ្ឋកិច្ច និងហិរញ្ញវត្ថុ” នៅព្រឹកថ្ងៃទី០២ ខែសីហា ឆ្នាំ២០២២នេះថា នៅក្នុងត្រីមាសទី១ ឆ្នាំ២០២២នេះ ប្រទេសកម្ពុជាបានព្យាយាម សងបំណុលត្រលប់ទៅវិញចំនួន១៨៣លានដុល្លារអាមេរិក។
បើយោងតាមអ្នកនាំពាក្យរូបនេះ ក្នុងឆ្នាំ២០២១-២០២២ថា ស្ថិតនៅក្នុងអនុបាតគោលចន្លោះ៣៣ ទៅ៣៥ភាគរយ ហើយអាចនឹងឡើងដល់៣៦ភាគរយនៅក្នុងឆ្នាំ២០២៣។ អនុបាតគោល ដែលត្រូវមានការប្រុងប្រយ័ត្នបំផុត គឺអត្រាកើនលើស៤០ភាគរយ។
លោកបានបន្តថា កន្លងមក ស្ថាប័នមូលនិធិរូបិយវត្ថុអន្តរជាតិ (IMF) បានវាយតម្លៃស្ថានភាព បំណុលរបស់ប្រទេសកម្ពុជាថា ស្ថានភាពបំណុលរបស់ប្រទេសកម្ពុជា ស្ថិតនៅក្រោមអនុបាតគោល និងមិនមានភាពគួរឱ្យបារម្ភនោះទេ ហើយត្រូវបានគ្រប់គ្រងបំណុលយ៉ាងម៉ត់ចត់បំផុត ។
លោកមាស សុខសេនសានបានលើកឡើងថា កម្ចីដែលទទួលបាននេះប្រើប្រាស់ សម្រាប់ការវិនិយោគនៅក្នុងប្រទេស ដោយស្ថិតនៅក្នុងលក្ខខណ្ឌចំនួន៥៕
