ដោយៈ សុខុម
ញូវយ៉ក: ផ្សារហ៊ុនអាមេរិក បានដាំក្បាលចុះយ៉ាងខ្លាំង ក្នុងត្រីមាសទី២ ឆ្នាំនេះ ហើយការធ្លាក់ចុះនេះ បានធ្វើឱ្យក្រុមហ៊ុនមេ Berkshire Hathaway Inc របស់កំពូលមហាសេដ្ឋីដ៏ល្បីល្បាញ Warren Buffett ខាតបង់ធ្ងន់ធ្ងរ ដោយបានរាយការណ៍កាលពីថ្ងៃសៅរ៍ ទី៦ ខែសីហា ថាខ្លួនខាតបង់ដល់ទៅ៤៣,៨ពាន់លានដុល្លារ។
ទោះជាយ៉ាងណា ក្រុមហ៊ុនBerkshire Hathaway Inc ទទួលបានប្រាក់ចំណេញប្រតិបត្តិការ ជិត៩,៣ពាន់លានដុល្លារ នៅពេលប្រាក់ចំណេញពីធានារ៉ាប់រង និងផ្លូវដែកដឹកជញ្ជូនទំនិញ BNSF Railway ដែលធំបំផុតមួយនៅទ្វីបអាមេរិកខាងជើង បានជួយទប់ការខាតបង់ថ្មីៗ នៅឯក្រុមហ៊ុនធានារ៉ាប់រងរថយន្តGeico ដែលកង្វះគ្រឿងបន្លាស់ និងការឡើងថ្លៃរថយន្តមួយទឹក បានបណ្ដាលឱ្យការទាមទារសំណងគ្រោះថ្នាក់កើនឡើង។
ការដំឡើងអត្រាការប្រាក់ និងការទូទាត់ភាគលាភ បានជួយឱ្យបណ្ដាក្រុមហ៊ុនធានារ៉ាប់រង រកប្រាក់បានកាន់តែច្រើនពីការវិនិយោគ ខណៈការឡើងថ្លៃប្រាក់ដុល្លារអាមេរិក បានជំរុញប្រាក់ចំណេញពីការវិនិយោគបំណុលអឺរ៉ុប និងជប៉ុនកើនឡើង។
លោក James Shanahan អ្នកវិភាគនៅក្រុមហ៊ុនហិរញ្ញវត្ថុ Edward Jones & Co លើកឡើងថា ទោះបីជាទទួលរងការខាតបង់យ៉ាងច្រើនសន្ធឹកសន្ធាប់យ៉ាងណាក្ដី ក៏ “លទ្ធផលនេះ បង្ហាញពីភាពធន់ទ្រាំនៃក្រុមហ៊ុន Berkshire”។
អ្នកវិភាគរូបនេះបានបន្ថែមទៀតថា “អាជីវកម្មនានាកំពុងដំណើរការល្អ ទោះជាអត្រាការប្រាក់កើនឡើងខ្ពស់ សម្ពាធអតិផរណា និងការព្រួយបារម្ភជុំវិញភូមិសាស្ត្រនយោបាយយ៉ាងណាក្ដី។ វាធ្វើឱ្យខ្ញុំមានទំនុកចិត្តលើក្រុមហ៊ុននេះ ប្រសិនបើមានវិបត្តិសេដ្ឋកិច្ចកើតឡើង”។
ក្រុមហ៊ុន Berkshire ក៏បានបង្អង់ល្បឿនទិញភាគហ៊ុនរបស់ខ្លួនផងដែរ ទោះបីជាក្រុមហ៊ុននេះ នៅតែមានសាច់ប្រាក់ដល់ទៅ១០៥,៤ពាន់លានដុល្លារ ក្នុងដៃសម្រាប់ទិញយកភាគហ៊ុនយ៉ាងណាក្ដី៕ Reuters៕
