ដោយ: លាងហួរ
ភ្នំពេញ: ទំនាក់ទំនងដ៏រឹងមាំរវាងប្រទេសកម្ពុជា ជាមួយប្រទេសចិនបានផ្តល់អត្ថប្រយោជន៍យ៉ាងច្រើន ដល់ការអភិវឌ្ឍន៍សេដ្ឋកិច្ចសង្គម និងការកាត់បន្ថយភាពក្រីក្ររបស់កម្ពុជា។
សេដ្ឋវិទូជាន់ខ្ពស់ លោក គី សេរីវឌ្ឍន៍ អគ្គនាយកវិទ្យាស្ថានសិក្សាចិន នៃរាជបណ្ឌិត្យសភាកម្ពុជា បានមានប្រសាសន៍ថា ប្រទេសចិន គឺជាម្ចាស់ជំនួយ អ្នកវិនិយោគ និងដៃគូពាណិជ្ជកម្មដ៏ធំបំផុតរបស់កម្ពុជា ហើយថាទំនាក់ទំនង រវាងប្រទេសទាំងពីរនាពេលនេះ គឺមានភាពរឹងមាំដូចមហា កំផែងនៃប្រទេសចិន។
លោកបានបន្តថា “ជំនួយ និងការវិនិយោគរបស់ប្រទេសចិន បានដើរតួនាទីយ៉ាងសំខាន់ ក្នុងការជួយដល់ការអភិវឌ្ឍន៍សេដ្ឋកិច្ចសង្គម និងការកាត់បន្ថយភាពក្រីក្ររបស់កម្ពុជា តាមរយៈការបង្កើតការងាររាប់សែនកន្លែង”។
លោក គី សិរីវឌ្ឍន៍ បានមានប្រសាសន៍ថា ក្រោមគំនិតផ្តួចផ្តើមខ្សែក្រវ៉ាត់ និងផ្លូវ ប្រទេសចិនបានជួយសាងសង់គម្រោងធំៗជាច្រើន ដូចជាផ្លូវថ្នល់ ស្ពាន កំពង់ផែ អាកាសយានដ្ឋាន រោងចក្រវារីអគ្គីសនី តំបន់សេដ្ឋកិច្ច និងពហុកីឡដ្ឋានជាតិក្នុងប្រទេសកម្ពុជា។
អ្នកជំនាញបានកត់សម្គាល់ នូវគម្រោងវិនិយោគដ៏គួរឱ្យកត់សម្គាល់របស់ចិនចំនួនបី នៅក្នុងប្រទេសកម្ពុជា រួមមាន តំបន់សេដ្ឋកិច្ចពិសេសក្រុងព្រះសីហនុ ផ្លូវល្បឿនលឿនដំបូងគេ ដែលមិនធ្លាប់មានពីភ្នំពេញ-ព្រះសីហនុ និងអាកាសយានដ្ឋានអន្តរជាតិសៀមរាបអង្គរថ្មី។ គម្រោងទាំងនេះបានផ្តល់ ហើយនឹងបន្តផ្តល់អត្ថប្រយោជន៍ដ៏អស្ចារ្យដល់ប្រទេសកម្ពុជា៕
