ដោយ៖ សុខុម
វ៉ាស៊ីនតោន: ប្រធានាធិបតីអាមេរិក លោក ចូ បៃឌិន កាលពីថ្ងៃអង្គារ ទី៩ ខែសីហា បានចុះហត្ថលេខាលើសេចក្ដីព្រាងច្បាប់ដ៏សំខាន់មួយ ដើម្បីផ្តល់ឧបត្ថម្ភធនរហូតដល់ទៅ៥២,៧ពាន់លានដុល្លារ សម្រាប់ការផលិត និងស្រាវជ្រាវបន្ទះឈីបរបស់សហរដ្ឋអាមេរិក។
យោងតាមសារព័ត៌មាន CNA ចុះផ្សាយនៅថ្ងៃពុធ ទី១០ ខែសីហា នេះឱ្យដឹងថា ការឧបត្ថម្ភធននេះគឺ ដើម្បីជួយឱ្យវិស័យផលិតបន្ទះឈីបរបស់សហរដ្ឋអាមេរិក កាន់តែមានការប្រកួតប្រជែងជាងមុន នៅក្នុងការប្រជែងនឹងមហាយក្សចិន ដែលកំពុងប្រឹងប្រែងអភិវឌ្ឍវិទ្យាសាស្ត្រ និងបច្ចេកវិទ្យា។
សំដៅដល់ “ការវិនិយោគដែលមួយជំនាន់មនុស្សមានតែម្ដងនៅអាមេរិក” នេះ លោក ចូ បៃឌិន បានលើកឡើងថា “អនាគតនឹងត្រូវបង្កើតឡើងនៅសហរដ្ឋអាមេរិក”។
សមាជិកគណបក្សសាធារណរដ្ឋមួយចំនួន រួមទាំងនាយកប្រតិបត្តិក្រុមហ៊ុនធំៗ និងមន្ត្រីជាន់ខ្ពស់ជាច្រើនរូបទៀតក៏បានចូលរួមក្នុងពិធីចុះហត្ថលេខាលើសេចក្ដីព្រាងច្បាប់បន្ទះឈីបនេះនៅសេតវិមាន ផងដែរ។
សេតវិមាននិយាយថា ការអនុម័តរបស់លោក ចូ បៃឌិន កំពុងតែជំរុញការវិនិយោគថ្មីៗលើការផលិតបន្ទះឈីប។ តួយ៉ាង ក្រុមហ៊ុន Qualcomm កាលពីថ្ងៃច័ន្ទ ទី៨ ខែសីហា បានព្រមព្រៀងទិញបន្ទះឈីបចំនួន៤,២ពាន់លានដុល្លារបន្ថែមទៀត ពីរោងចក្រនៅក្រុងញូវយ៉ក របស់ក្រុមហ៊ុន GlobalFoundries ដែលធ្វើឱ្យទំហំវិនិយោគសរុបរបស់ខ្លួនឈានដល់៧,៤ពាន់លានដុល្លារ នៅត្រឹមឆ្នាំ២០២៨។
សេតវិមានក៏បានសរសើរក្រុមហ៊ុន Micron ផងដែរដែលបានប្រកាសបោះទុនវិនិយោគ៤០ពាន់លានដុល្លារ លើការផលិតបន្ទះឈីប ដែលនឹងជំរុញចំណែកទីផ្សាររបស់សហរដ្ឋអាមេរិក ពី២%ដល់១០%៕
