ដោយ៖ សុផារី
ភ្នំពេញ៖ សម្ដេចតេជោ ហ៊ុន សែន បានចោទជាសំនួរថា មូលហេតុអ្វីបានជាកីឡារបស់ប្រទេសក្នុងតំបន់អាស៊ី នៅទន់ខ្សោយ ជាពិសេសកីឡាបាល់ទាត់ ដោយនៅពេលមានការប្រកួត World Cup ម្ដងៗ សូម្បីតែវគ្គពាក់កណ្ដាលផ្ដាច់ព្រ័ត្រ ក៏ពិបាកឆ្លងផុតដែរ បើទោះបីជាទ្វីបអាស៊ីមានចំនួនប្រជាជនដ៏ច្រើនក្តី។
សម្ដេចតេជោ ហ៊ុន សែន បានមានប្រសាសន៍ថា “នៅក្នុងពេលជំនួប ដែលខ្ញុំបានទទួលឯកឧត្ដមប្រធានក្រុមប្រឹក្សាអំបាញ់មិញ ខ្ញុំបានលើកឡើងទៅលើចំណុចពីរ ទីមួយអាស៊ីរបស់យើង គួរតែពិនិត្យថា ហេតុអ្វីទៅបានជាកីឡារបស់ទ្វីបរបស់យើងនៅទន់ខ្សោយ។ ជាពិសេសបើពិនិត្យអំពីបាល់ទាត់ យើងពិនិត្យឃើញថា ក្នុងតំបន់របស់យើងគ្រាន់តែចិន និងឥណ្ឌា គឺមានប្រជាជនជិត៣.០០០លាននាក់ បូកនិងអាស៊ានប្រមាណជា៦០០លាននាក់ទៀត និងបូកនិងបណ្ដាប្រទេសនានា គឺប្រជាជនច្រើនណាស់ ប៉ុន្តែបើនិយាយពីបាល់ទាត់ សូម្បីតែវគ្គពាក់កណ្ដាលផ្ដាច់ព្រ័ត្រ យើងក៏ពិបាកចូល ហើយក៏មានតែប្រទេសមួយចំនួនតូចប៉ុណ្ណោះ ដែលអាចចូលក្នុងវគ្គជម្រុះ World Cup ជារៀងរាល់ពេល”។
