ដោយ: លាងហួរ
អន្តរជាតិ: អង្គការនៃប្រទេសនាំចេញប្រេង (OPEC) និងសម្ព័ន្ធមិត្ត ដែលជាក្រុមគេស្គាល់ថាជា OPEC+កាលពីថ្ងៃពុធម្សិលមិញបានប្រកាសកាត់បន្ថយផលិតកម្មដ៏ច្រើន ចំនួន២លានបារ៉ែល ក្នុងមួយថ្ងៃចាប់ពីខែវិច្ឆិកា ដើម្បីជំរុញតម្លៃប្រេង ដែលទើបតែធ្លាក់ចុះ ដោយសារការភ័យខ្លាច នៃវិបត្តិសេដ្ឋកិច្ច។
អង្គការនេះបានសម្រេចចិត្ត កាត់បន្ថយទិន្នផលប្រេងសរុបរបស់ខ្លួន ចំនួន២លានបារ៉ែល ក្នុងមួយថ្ងៃ ពីគោលដៅផលិតកម្ម ក្នុងខែសីហារបស់ខ្លួន។ នេះបើយោងតាមសេចក្តីថ្លែងការណ៍ចេញផ្សាយ បន្ទាប់ពីកិច្ចប្រជុំថ្នាក់រដ្ឋមន្ត្រី OPEC និងមិនមែនអង្គការ OPEC លើកទី៣៣។
-->
ការកាត់បន្ថយនេះ ស្មើនឹងប្រហែល២ភាគរយ នៃតម្រូវការប្រេងពិភពលោក ក្នុងឆ្នាំ២០២២នេះ។ តាមការប៉ាន់ប្រមាណដោយអង្គការ OPEC តម្រូវការប្រេងសកល មានប្រហែល១០០លានបារ៉ែល ក្នុងមួយថ្ងៃ។
យោងតាមសេចក្តីថ្លែងការណ៍ ការសម្រេចចិត្តនេះត្រូវបានធ្វើឡើង ដោយមើលឃើញពីភាពមិនប្រាកដប្រជា ជុំវិញទស្សនវិស័យសេដ្ឋកិច្ច និងទីផ្សារប្រេងពិភពលោក និងតម្រូវការក្នុងការពង្រឹងការណែនាំរយៈពេលវែង សម្រាប់ទីផ្សារប្រេង។
ការផ្លាស់ប្តូរកាលពីថ្ងៃពុធ របស់អង្គការ OPEC+ បានកើតឡើង នៅពេលដែលតម្លៃប្រេងឆៅបានបន្តធ្លាក់ចុះ ចាប់តាំងពីកិច្ចប្រជុំថ្នាក់រដ្ឋមន្ត្រីចុងក្រោយរបស់ OPEC+ នៅដើមខែកញ្ញា ជាពេលដែលមានការយល់ព្រមលើការកាត់បន្ថយផលិតកម្មតិចតួចចំនួន១០០.០០០បារ៉ែលក្នុងមួយថ្ងៃ កាលពីខែតុលា។
ប្រេងឆៅ West Texas Intermediate (WTI) និងប្រេងឆៅ Brent បានធ្លាក់ចុះពីប្រហែល៩០ដុល្លារអាមេរិកក្នុងមួយបារ៉ែល នៅដើមខែកញ្ញា មកនៅត្រឹមប្រហែល៨០ដុល្លារអាមេរិក ក្នុងមួយបារ៉ែល កាលពីសប្តាហ៍មុន ដោយសារការភ័យខ្លាចកាន់តែខ្លាំងឡើង នៃការធ្លាក់ចុះសេដ្ឋកិច្ច និងការធ្លាក់ចុះនៃតម្រូវការ៕
