សុខុម
ប៉េកាំង: ទីភ្នាក់ងារផ្គត់ផ្គង់អាកាសចរណ៍ចិន (CAS) បានទម្លាយឱ្យដឹងតាមរយៈសេចក្ដីថ្លែងការណ៍ថា ខ្លួនបានចុះហត្ថលេខាបញ្ជាទិញយន្តហោះ Airbus ចំនួន១៤០គ្រឿងដែលមានតម្លៃសរុបរហូតដល់ទៅប្រមាណ១៧ពាន់លានដុល្លារអាមេរិក កាលពីថ្ងៃសុក្រ ទី៤ ខែវិច្ឆិកា។
ពិធីចុះកិច្ចព្រមព្រៀងជាផ្លូវការនេះបានធ្វើឡើងអំឡុងដំណើរទស្សនកិច្ចរបស់អធិការបតីអាល្លឺម៉ង់ លោក Chancellor Olaf Scholz ទៅកាន់ប្រទេសចិន។
ក្រុមហ៊ុនអាកាសចរណ៍ “ធំទាំង៣” របស់ប្រទេសចិន កាលពីខែកក្កដា បានសន្យាទិញយន្តហោះសរុបចំនួន២៩២គ្រឿង ដែលធ្វើឱ្យវាក្លាយជាការបញ្ជាទិញដ៏ធំបំផុតមិនធ្លាប់មានពីសំណាក់ក្រុមហ៊ុនអាកាសចរណ៍ចិន ចាប់តាំងពីវិបត្តិកូវីដ-១៩ មក ហើយវាជាជោគជ័យដ៏ធំសម្បើមមួយសម្រាប់អឺរ៉ុប ខណៈក្រុមហ៊ុនផលិតយន្តអាមេរិក Boeing មិនអាចចូលទីផ្សារប្រទេសចិន បាននៅពេលនេះដោយសារភាពតានតឹងផ្នែកនយោបាយ។
ក្រុមហ៊ុន Boeing ដែលបានចាប់ផ្ដើមលក់ឡើងវិញនូវយន្តហោះដែលដំបូងឡើយផលិតសម្រាប់លក់ឱ្យប្រទេសចិន បានប្រាប់វិនិយោគិនកាលពីថ្ងៃពុធ ទី០២ ខែវិច្ឆិកា ថា ខ្លួនអាចនឹងសម្រេចគោលដៅរបស់ខ្លួនដោយមិនចាំបាច់ពឹងផ្អែកលើទីផ្សារប្រទេសចិន ដែលជាធម្មតាគ្រាប់បណ្ដប់១ភាគ៤នៃការនាំចេញរបស់លោកខាងលិច។
ក្រុមហ៊ុននិយាយថា កិច្ចព្រមព្រៀងទិញយន្តហោះកាលពីថ្ងៃសុក្រ ទី៤ ខែវិច្ឆិកា នេះរួមបញ្ចូលទាំងយន្តហោះធុន A320 និងយន្តហោះ A350 ៨គ្រឿងរបស់ក្រុមហ៊ុនផលិតយន្តហោះអឺរ៉ុប មួយនេះផងដែរ៕ Reuters៕
