ដោយៈ គង់ សូរិយា
ភ្នំពេញៈ ការសិក្សាដោយក្រុមហ៊ុនអន្តរជាតិ មួយបានរកឃើញថា កសកម្មភាព ទិញ លក់ ជួលខុនដូបានធ្លាក់ចុះក្នុងត្រីមាសទី៣ ស្របពេលទុនវិនិយោគក្នុងវិស័យសំណង់ធ្លាក់ចុះប្រមាណ៦៧ភាគរយ។
យោងតាមរបាយការណ៍ស្រាវជ្រាវ របស់ក្រុមហ៊ុនអចលនទ្រព្យ CBRE Cambodia ដែលចេញផ្សាយកាលពីពេលថ្មីៗនេះបានបង្ហាញថា បញ្ហាវិបត្តិសកល កំពុងធ្វើឱ្យទីផ្សារខុនដូនៅរាជធានីភ្នំពេញ បន្តជួបបញ្ហា ទាំងដំណើរការសាងសង់ និងសកម្មភាពទិញ លក់ ឬជួល។
របាយការណ៍បង្ហាញទៀតថា នៅរាជធានីភ្នំពេញក្នុងត្រីមាសទី ៣ ឆ្នាំ ២០២២ មិនមានគម្រោងអភិវឌ្ឍន៍អគារខុនដូណា បានបញ្ចប់ការសាងសង់ឡើយ ដោយចំនួនបន្ទប់ខុនដូនៅភ្នំពេញនាពេលនេះ មានចំនួនជាង ៣៦,០០០យូនីត។
ការសិក្សារបស់CBRE Cambodiaបានឲ្យដឹងផងដែរថា សម្រាប់តម្លៃលក់ខុនដូក្នុងត្រីមាសទី៣ ឆ្នាំនេះធៀបនឹងត្រីមាសទី២ ឆ្នាំ២០២២ គឺបន្ទប់ខុនដូប្រណីត មានតម្លៃលក់ជាមធ្យម២៦៣៩ដុល្លារ ក្នុង១ម៉ែត្រការ៉េ ធ្លាក់ចុះប្រមាណ១,២ ភាគរយ។ ខុនដូប្រភេទមធ្យម មានតម្លៃ២០៧៨ ដុល្លារ ធ្លាក់ចុះ០,៨ ភាគរយ និងប្រភេទតម្លៃសមរម្យមានតម្លៃ១៤០៨ ដុល្លារធ្លាក់ចុះ០,២ ភាគរយ។
ដោយឡែកសម្រាប់តម្លៃជួល គឺខុនដូប្រណីត មានតម្លៃជាមធ្យម១១ ដុល្លារក្នុង១ម៉ែត្រការ៉េ សម្រាប់រយៈពេល១ខែ ធ្លាក់ចុះ០,៣ភាគរយ ប្រភេទតម្លៃមធ្យម មានតម្លៃ៩,៥ ដុល្លារ ធ្លាក់០,៩ភាគរយ និងប្រភេទតម្លៃសមរម្យ មានតម្លៃ៧,៨ដុល្លារ ធ្លាក់២,៣ភាគរយ។
យោងតាមទិន្នន័យពីក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា នៅក្នុងរយៈពេល៨ខែឆ្នាំ ២០២២ ចំនួនគម្រោងដែលទទួលបានការអនុញ្ញាត ឱ្យសាងសង់មានចំនួន២៨១១ ធ្លាក់ចុះ៩០គម្រោង និងមានតម្លៃវិនិយោគ១៦៦២លានដុល្លារ ធ្លាក់ចុះ៥៦,៧ភាគរយ ក្នុងនោះប្រភេទសំណង់លំនៅឋាន មានចំនួន២៥២១គម្រោង (ស្មើនឹង ៨៩,៧ ភាគរយនៃសំណើសុំសាងសង់សរុប ធ្លាក់ចុះ៩គម្រោងបើធៀបនឹងរយៈពេលដូចគ្នាឆ្នាំ ២០២១)៕
