ដោយៈ សុផារី
ភ្នំពេញៈ លោកលី ខឺឈាង (Li Keqiang) នាយករដ្ឋមន្រ្តីចិន បានថ្លែងថា អរិយធម៌ប្រទេសចិន និងកម្ពុជាមានភាពរុងរឿង ហើយកិច្ចសហប្រតិបត្តិការរវាងប្រទេសចិន និងកម្ពុជា ដែលជាការភ្ជាប់ទំនាក់ទំនងរវាងប្រជាជននិងប្រជាជន មានភាពរឹងមាំ និងបានកើតមានឡើងតាំងពីយូរលង់ណាស់មកហើយ។
ថ្លែងក្នុងពិធីប្រគល់-ទទួលជំនួយរដ្ឋាភិបាលចិន លើគម្រោងជួសជុល និងអភិរក្សប្រាសាទតាកែវ នៃរមនីយដ្ឋានប្រវត្តិសាស្ត្រអង្គរ ខេត្តសៀមរាប នៅព្រឹកថ្ងៃទី១០ ខែវិច្ឆិកានេះ លោកបានមានប្រសាសន៍ថា “មិត្តភាពប្រពៃណីរវាងប្រទេសចិន និងកម្ពុជា គឺមានបទដ្ឋានគ្រឹះដ៏រឹងមាំ ហើយស្ថិតនៅក្នុងប្រជាជនទាំងពីរ មានការផ្លាស់ប្តូរវប្បធម៌យ៉ាងជិតស្និទ្ធបំផុត និងជាបទដ្ឋានដែលមានអត្ថន័យបំផុត សម្រាប់កិច្ចសហប្រតិបត្តិការរវាង ប្រទេសទាំងពីរ។ កិច្ចសហប្រតិបត្តិការរវាងប្រទេសទាំងពីរនេះ នឹងជះឥទ្ធិពលដល់មេត្រីភាពរវាងចិន និងកម្ពុជា”។
-->
លោកបានបន្តថា “អរិយធម៌នីមួយៗ មានតម្លៃរបស់ខ្លួន ទើបកិច្ចសហប្រតិបត្តិការ រវាងប្រទេសនៅក្នុងពិភពលោក ផ្លាស់ប្ដូរខាងវប្បធម៌ ទើបធ្វើឱ្យអរិយធម៌មានភាពរឹងមាំ និងកាន់តែទទួលបានសមិទ្ធផល ជាផ្លែផ្កាបន្ថែមទៀត”។
លោកនាយករដ្ឋមន្ត្រីបញ្ជាក់ថា ការផ្លាស់ប្ដូរអរិយធម៌រវាងប្រទេសចិន និងកម្ពុជា ដោយសារប្រទេសទាំងពីរ សុទ្ធតែជាប្រទេសដែលមានអរិយធម៌ដ៏រុងរឿងជាយូរលង់ណាស់មកហើយ ហើយកម្លាំងនៃការតភ្ជាប់ និងការជំរុញកិច្ចសហប្រតិបត្តការរវាងចិន និងកម្ពុជាមានឥទ្ធិពលយ៉ាងខ្លាំង ដែលស្ថិតនៅក្នុងកិច្ចសហប្រតិបត្តិការរវាងប្រជាជន និងប្រជាជន។
លោកលើកឧទាហរណ៍ជាក់ស្តែង សម័យអង្គរបានបង្ហាញពីអរិយធម៌ខ្មែរដ៏រុងរឿងអស្ចារ្យ ដែលជាមោទនភាពរបស់ប្រជាជនកម្ពុជា ហើយកិច្ចសហប្រតិបត្តិការរវាងកម្ពុជា ចិន ត្រូវបានកត់ត្រាបង្ហាញ តាមរយៈសៀវភៅប្រវត្តិសាស្រ្ត ដោយបានបង្ហាញថា ប្រទេសតាំងពីរមានភាពជិតស្និទ្ធតាំងពីជាងមួយពាន់ឆ្នាំមុន៕
