ដោយ៖ សុផារី
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាប្រធានអាស៊ានឆ្នាំ២០២២ បានថ្លែងថា បន្ទាប់ពីរងផលប៉ះពាល់ពីបញ្ហានៃជំងឺកូវីដ-១៩ សេដ្ឋកិច្ចនៅក្នុងតំបន់អាស៊ាន ងើបឡើងវិញបានបន្តិច និងឆ្ពោះទៅរកកំណើនខ្ពស់បណ្ដើរៗ ទាំងឆ្នាំនេះ និងឆ្នាំក្រោយ ប៉ុន្តែត្រូវមានការប្រុងប្រយ័ត្នជានិច្ច ព្រោះនៅតែមានភាពផុយស្រួយ និងមានការបែកខ្ញែកគ្នានៅឡើយ។
ក្នុងពិធីបើកកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធ នៅថ្ងៃទី១១ ខែវិច្ឆិកា ឆ្នាំ២០២២ សម្ដេចតេជោនាយករដ្ឋមន្ត្រី បានមានប្រសាសន៍ថា ជាមួយនឹងការព្យាយាម និងកិច្ចខិតខំប្រឹងប្រែងប្រកបដោយស្មារតីលះបង់របស់យើង តាមរយៈសមាជិកអាស៊ាននីមួយៗ និងអាស៊ានជារួម យើងអាចប្រកាសដោយមោទនភាពថា យើងបានយកឈ្នះលើការគម្រាមគំហែងរបស់ជំងឺកូវីដ-១៩ ហើយបានចាប់ផ្ដើមដំណើការស្ដារឡើងវិញ នូវសកម្មភាពសង្គម-សេដ្ឋកិច្ច ។
សម្ដេចបានបន្តថា “ផ្អែកតាមការវាយតម្លៃ និងព្យាករណ៍របស់ការិយាល័យស្រាវជ្រាវសេដ្ឋកិច្ចអាស៊ានបូកបី (AMRO) កាលពីខែតុលាកន្លងទៅ រដ្ឋសមាជិកអាស៊ាននីមួយៗ នឹងទទួលបាននូវកំណើនសេដ្ឋកិច្ចជាវិជ្ជមាន ហើយតំបន់ទាំងមូល នឹងអាចសម្រេចបានកំណើនក្នុងអត្រា៥,៣ភាគរយ ក្នុងឆ្នាំ២០២២ និង៤,៩ភាគរយ ក្នុងឆ្នាំ២០២៣ ដែលជាអត្រាខ្ពស់ បើធៀបទៅនឹងតំបន់ផ្សេងទៀត នៃសកលលោក ប៉ុន្តែនៅតែមានភាពផុសស្រួយ និងត្រូវមានការប្រុងប្រយ័ត្ន”។
សម្តេចតេជោបានបន្ថែមថា “ខណៈពេលដែលយើងរីករាយជាមួយផ្លែផ្ការបស់យើង លើវិថីឆ្ពោះទៅកាន់កំណើនប្រកបដោយចីរភាព យើងត្រូវមានការប្រុងប្រយ័ត្នជានិច្ច ព្រោះស្ថានភាពសង្គមសេដ្ឋកិច្ចអាស៊ាន និងពិភពលោក នៅតែមានភាពផុយស្រួយ និងមានការបែកខ្ញែកគ្នានៅឡើយ។ យើងកំពុងស្ថិតនៅលើចំណុចប្រសព្វដ៏ស្រពិចស្រពិលបំផុត ដែលមនុស្សរាប់លាននាក់នៅក្នុងតំបន់ ពឹងផ្អែកលើឧត្តមគតិ និងចក្ខុវិស័យវែងឆ្ងាយ គោលនយោបាយ និងការសម្រេចចិត្តត្រឹមត្រូវ និងអភិក្រមប្រាកដនិយមរបស់យើង ក្នុងការដោះស្រាយបញ្ហាជាយុទ្ធសាស្រ្តនានា ដែលយើងទាំងអស់គ្នាកំពុងជួបប្រទះ”៕
