តែម សុខុម
បាងកក: ប្រទេស CLMV ដែលរួមមានកម្ពុជា ឡាវ មីយ៉ាន់ម៉ា និងវៀតណាម នឹងបន្តសម្រេចបានកំណើនផលទុនជាតិសរុប (GDP) ក្នុងឆ្នាំ២០២៣ ដោយក្នុងនោះកម្ពុជា នឹងសម្រេចបានកំណើន៥,៩%។ នេះបើយោងតាមការព្យាកររបស់មជ្ឈមណ្ឌលស៊ើបការណ៍សម្ងាត់សេដ្ឋកិច្ច (EIC) នៃធនាគារពាណិជ្ជសៀម (Siam Commercial Bank)។
ទន្ទឹមនេះ សេដ្ឋកិច្ចរបស់ប្រទេសឡាវ ត្រូវបានរំពឹងថានឹងសម្រេចបានកំណើន៤,០% ប្រទេសមីយ៉ាន់ម៉ា ៣,០% និងប្រទេសវៀតណាម ៥,០%។
ទស្សនវិស័យកំណើននេះត្រូវបានធ្វើឡើងដោយផ្អែកទៅលើកំណើនទេសចរណ៍ បន្ទាប់ពីប្រទេសចិន បើកព្រំដែនឡើងវិញដែលបានជួយជំរុញកំណើនភ្ញៀវទេសចរ និងការចំណាយរបស់ភ្ញៀវទេសចរបរទេសម្នាក់ៗ និងការប្រើប្រាស់ក្នុងស្រុកដែលបានប្រសើរឡើងស្របគ្នានឹងទីផ្សារការងារ និងសម្ពាធអតិផរណាធ្លាក់ចុះ។
ទោះជាយ៉ាងណា កំណើនសេដ្ឋកិច្ចក្នុងប្រទេស CLMV នឹងមានកម្រិតមធ្យមនៅឡើយ និងទាបជាងកំណើនមុនពេលផ្ទុះវិបត្តិកូវីដ-១៩ ចំណែកឯកំណើនភ្ញៀវទេសចរក៏នៅមិនទាន់ដល់កំណើនមុនពេលផ្ទុះវិបត្តិកូវីដ-១៩ នោះដែរ។
ទន្ទឹមនឹងនេះ ទស្សនវិស័យនៃការនាំចេញ និងការវិនិយោគផ្ទាល់ពីបរទេស (FDI) នៅតែធ្លាក់ចុះ ដោយសារការធ្លាក់ចុះនៃសេដ្ឋកិច្ចពិភពលោក និងបញ្ហាប្រឈមរបស់ប្រទេសមួយចំនួន។
សម្រាប់កម្ពុជា ដែលពឹងផ្អែកខ្លាំងលើទេសចរបរទេសអាចនឹងងើបឡើងវិញយ៉ាងរឹងមាំក្នុងឆ្នាំ២០២៣ ខណៈកម្លាំងរុញច្រានពីវិស័យទេសចរណ៍នឹងជួយទប់ផលប៉ះពាល់ នៃការធ្លាក់ចុះសេដ្ឋកិច្ចពិភពលោកដែលមានមកលើការនាំចេញរបស់កម្ពុជា៕ The Nation៕
