ដោយៈ តែម សុខុម
ហាណូយ: អ្នកស្នាក់នៅក្នុងអាផាតម៉ិន ឬខុនដូ នៅទីក្រុងហាណូយ ប្រទេសវៀតណាម ត្រូវចំណាយប្រាក់ច្រើនដល់ទៅ៤.២០០ដុល្លារអាមេរិក លើចំណតក្នុងអគារដែលពួកគេស្នាក់នៅ ដោយសារតែគ្មានទីធ្លាគ្រប់គ្រាន់សម្រាប់ចតរថយន្ត។
ក្នុងរយៈពេល២ឆ្នាំមកនេះ វាជាលើកទី១ ហើយដែលស្ត្រីឈ្មោះ ហ្វួង លិញ (Phuong Linh) អាចចតរថយន្តរបស់នាង នៅជាន់ក្រោមដីនៃអគារអាផាតម៉ិន ដែលនាងស្នាក់នៅក្នុងសង្កាត់ហាដុង (Ha Dong) ក្រុងហាណូយ បន្ទាប់ពីនាងបានបង់ប្រាក់ចំនួន៨៣០ដុល្លារអាមេរិក ទៅឱ្យអ្នកជិតខាងម្នាក់ដែលទើបតែរើចេញ។
ដោយសារតែទីធ្លា មានកំណត់នៅជាន់ក្រោមដី ស្ត្រីរូបនេះបានបង្ខំចិត្តចតរថយន្តរបស់នាង នៅចំណតកន្លែងផ្សេងក្នុងសង្កាត់ហាដុង (Ha Dong) ចាប់តាំងពីនាងផ្លាស់មករស់នៅ ក្នុងអគារអាផាតម៉ិននេះ។
មានតែម្ចាស់រថយន្ត ដែលបានចុះឈ្មោះមុនគេប៉ុណ្ណោះ ដែលមានសិទ្ធិចតរថយន្តរបស់ខ្លួននៅជាន់ក្រោមដី ហើយនៅពេលពួកគេរើចេញ អ្នកស្នាក់នៅផ្សេងទៀតដូចស្ត្រីឈ្មោះ ហ្វួង លិញ (Phuong Linh) ជាដើមត្រូវប្រញាប់ប្រញាល់ ទិញសិទ្ធិប្រើប្រាស់ចំណតទំនេរនោះឱ្យបានមុនគេ។
នេះមានន័យថា បន្ថែមពីលើការទិញចំណតផ្ទាល់ខ្លួន ពីអ្នកមុនក្នុងទឹកប្រាក់៨៣០ដុល្លារអាមេរិក ស្ត្រីរូបនេះក៏នៅតែត្រូវត្រូវបង់ថ្លៃចតរថយន្តប្រចាំខែផងដែរ។
ស្ត្រីរូបនេះនិយាយថា “ខ្ញុំត្រូវចំណាយលុយច្រើនណាស់ ប៉ុន្តែខ្ញុំយល់ថាខ្លួនឯងមានសំណាង។ មានអ្នកស្នាក់ចំនួន៣០នាក់ផ្សេងទៀតដូចជាខ្ញុំដែរ កំពុងរង់ចាំចំណតទំនេរបន្ទាប់”។
រឿងរ៉ាវស្រដៀងរឿងស្ត្រីឈ្មោះ ហ្វួង លិញ (Phuong Linh) បានកើតឡើងកាន់តែច្រើន នៅក្នុងទីក្រុងហាណូយ ដែលមានប្រជាជនរស់នៅចំនួន៨,៤លាននាក់ និងជាទីដែលចំនួនខុនដូ និងរថយន្តបានកើនឡើងយ៉ាងខ្លាំងក្នុងប៉ុន្មានឆ្នាំចុងក្រោយនេះ។
លោក ម៉ាញ់ ឌុង (Manh Dung) ដែលរស់នៅក្នុងសង្កាត់ណាម ទូ លៀម (Nam Tu Liem) កាលពីខែមុនបានទិញរថយន្តប្រភេទ SUV មួយគ្រឿង ប៉ុន្តែគាត់ទើបតែដឹងថា បន្ទាប់ពីការទិញរថយន្តរួច គឺគ្មានចំណតរថយន្តនៅសល់ ក្នុងអាគារអាផាតម៉ិនរបស់គាត់ឡើយ។
គាត់និយាយបន្តថា អ្នកស្នាក់នៅជិត១០០នាក់ កំពុងរង់ចាំចំណតទំនេរបន្ទាប់។
ដោយប្រើប្រាស់បណ្ដាញអ្នកស្គាល់គ្នា បុរសរូបនេះបានទាក់ទងទៅអ្នកគ្រប់គ្រងអគារម្នាក់ ហើយក៏ទទួលបានចំណតរថយន្តផ្ទាល់ខ្លួនក្នុងតម្លៃ២.០៧៥ដុល្លារអាមេរិក។ ការព្រមព្រៀងគ្នាននេះធ្វើឡើងក្រៅផ្លូវការ។
អ្នកគ្រប់គ្រងរូបនោះនិយាយថា ប្រសិនបើគាត់រើចេញនៅថ្ងៃអនាគត គាត់អាចលក់ចំណតនេះចេញវិញបាន ក្នុងតម្លៃប្រហាក់ប្រហែលគ្នា ព្រោះចំណតរថយន្តក្នុងអគារនេះ តែងតែមានតម្រូវការជានិច្ច។
ក្រុមហ៊ុនអភិវឌ្ឍន៍ជាច្រើន បានកំណត់ទុកចំណតរថយន្ត នៅជាន់ក្រោមដីនៃអគាររបស់ពួកគេ ប៉ុន្តែកំណើនរថយន្តនៅក្នុងទីក្រុងនេះបានធ្វើឱ្យចំណតរថយន្ត ដែលចំនួនមានកំណត់ ក្លាយជាអចលនទ្រព្យដ៏មានតម្លៃ។
ដូច្នេះក្រុមហ៊ុនអភិវឌ្ឍន៍មួយចំនួន យកថ្លៃខ្ពស់ខ្លាំងសម្រាប់កន្លែងចតរថយន្ត។ តួយ៉ាងក្រុមហ៊ុនមួយ ដែលអភិវឌ្ឍខុនដូមួយកម្ពស់៤០ជាន់ នៅសង្កាត់ហាដុង (Ha Dong) កាលពីដើមឆ្នាំនេះបានយកថ្លៃ៩.១៣០ដុល្លារអាមេរិក សម្រាប់កិច្ចសន្យាជួលចំណតរថយន្តផ្ទាល់ខ្លួនរយៈពេល២០ឆ្នាំ។
ក្រុមហ៊ុននេះ ក៏ផ្តល់ជម្រើសលក់ចំណតរថយន្តផ្ទាល់ខ្លួន ជាអចិន្ត្រៃយ៍ ក្នុងតម្លៃ១៦.៦០០ដុល្លារអាមេរិកផងដែរ សម្រាប់រថយន្តប្រភេទ Sedan និងប្រមាណ២០.៧៥០ដុល្លារអាមេរិក សម្រាប់រថយន្តប្រភេទ SUV៕ VN Express៕
