តែម សុខុម
តូក្យូ: នាយករដ្ឋមន្ត្រីជប៉ុន លោក Fumio Kishida កាលពីថ្ងៃពុធ ទី៣០ ខែសីហា បានបញ្ជាក់ថា រដ្ឋាភិបាលជប៉ុន គ្រោងដាក់ចេញការឧបត្ថម្ភធនថ្មីៗនៅខែក្រោយដើម្បីបញ្ចុះថ្លៃប្រេងសាំងដែលបានរួមចំណែកធ្វើឱ្យអតិផរណាហក់ឡើងខ្ពស់។
ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន បាននិយាយក្នុងថ្ងៃដដែលថា តម្លៃលក់រាយជាមធ្យមទូទាំងប្រទេសសម្រាប់ប្រេងសាំងធម្មតាបានហក់ឡើងថ្លៃខ្ពស់បំផុតមិនធ្លាប់មាន គឺ១,២៧ដុល្លារអាមេរិក ក្នុងមួយលីត្រក្នុងសប្តាហ៍គិតត្រឹមថ្ងៃទី២៨ ខែសីហា ដែលជាការឡើងថ្លៃ១៥សប្ដាហ៍ជាប់ៗគ្នា។
លោក Fumio Kishida បានថ្លែងទៅកាន់ក្រុមអ្នកយកព័ត៌មានថា “តាមរយៈវិធានការនេះ យើងមានគោលដៅធ្វើឱ្យថ្លៃប្រេងសាំងធ្លាក់ចុះមកនៅត្រឹម១,២០ដុល្លារ ក្នុងមួយលីត្រក្នុងខែតុលា។ កម្រិតតម្លៃ១,២០ដុល្លារ គឺប្រហាក់ប្រហែលគ្នានឹងកម្រិតតម្លៃក្នុងខែមីនា ឆ្នាំ២០២២ ភ្លាមៗបន្ទាប់ពីរុស្ស៊ី ចូលឈ្លានពានប្រទេសអ៊ុយក្រែន”។
អតិផរណានៅក្នុងប្រទេសជប៉ុន បានឡើងដល់៣,១%ក្នុងខែកក្កដា ដោយខ្ពស់ជាងគោលដៅអតិផរណា២%របស់ធនាគារកណ្តាលជប៉ុន សម្រាប់រយៈពេល១៦ខែជាប់ៗគ្នា។
រដ្ឋាភិបាលជប៉ុន បានដាក់ចេញការឧបត្ថម្ភធនលើប្រេងឥន្ធនៈតាំងពីដើមឆ្នាំ២០២២ ប៉ុន្តែបាននិងកំពុងកាត់បន្ថយការគាំទ្របន្តិចម្តងៗក្នុងប៉ុន្មានខែចុងក្រោយនេះ។
លោក Fumio Kishida លើកឡើងថា ប្រសិនបើគ្មានការឧបត្ថម្ភធនទេ ម៉្លេះតម្លៃសាំងនឹងហក់ឡើងដល់១,៣៤ដុល្លារ បាត់ទៅហើយ ហើយរដ្ឋាភិបាលនឹងដាក់ចេញការឧបត្ថម្ភធនចំនួន១០យ៉េន ឬ ០,០៦៩ដុល្លារ បន្ថែមទៀតដើម្បីរក្សាតម្លៃលក់រាយឱ្យនៅត្រឹមប្រមាណ១,២០ដុល្លារ ក្នុងមួយលីត្រ។
លោកបានបន្ថែមថា ជំនួយគាំទ្រថ្មីនេះក៏នឹងគ្របដណ្តប់លើប្រេងសាំង ប្រេងកាត និងប្រេងម៉ាស៊ូតផងដែរ៕ Reuters៕
