ដោយ: គង់ លាងហួរ
សេអ៊ូល: រដ្ឋាភិបាលកូរ៉េបានរៀបចំវិធានការជំរុញការចំណាយរបស់អ្នកប្រើប្រាស់ ខណៈទិន្នន័យកាលពីថ្ងៃព្រហស្បតិ៍បង្ហាញថា ការលក់រាយបានធ្លាក់ចុះខ្លាំងបំផុតក្នុងខែកក្កដា ស្របពេលអតិផរណាខ្ពស់ និងការដំឡើងអត្រាការប្រាក់យ៉ាងខ្លាំងក្លា។
យោងតាមស្ថិតិកូរ៉េបានបង្ហាញថា ការលក់រាយបានធ្លាក់ចុះ៣,២ភាគរយលើមូលដ្ឋានដែលត្រូវបានកែតម្រូវតាមរដូវកាល ក្នុងខែកក្កដា បើធៀបនឹងខែមិថុនា ហើយនេះជាការធ្លាក់ចុះដ៏ធំបំផុតចាប់តាំងពីខែកក្កដា ឆ្នាំ២០២២ បន្ទាប់ពីបានកើនឡើង០,៩ភាគរយក្នុងខែមិថុនា និង០,៦ភាគរយក្នុងខែឧសភា។
ការលក់ទំនិញប្រើប្រាស់បានយូរបានធ្លាក់ចុះ៥,១ភាគរយ ដែលនាំមុខដោយរថយន្ត បន្ទាប់ពីការកាត់បន្ថយពន្ធនាពេលថ្មីៗនេះបានផុតកំណត់ ខណៈការលក់ទំនិញពាក់កណ្តាលធន់ និងទំនិញមិនអាចប្រើប្រាស់បានយូរផ្សេងទៀតក៏បានធ្លាក់ចុះផងដែរ ស្របពេលមានភ្លៀងធ្លាក់ខ្លាំង។
ទិន្នន័យខែកក្កដាបានកើតឡើង បន្ទាប់ពីការស្ទង់មតិមួយផ្សេងទៀតបានបង្ហាញកាលពីសប្តាហ៍មុនថា អារម្មណ៍អ្នកប្រើប្រាស់របស់ប្រទេសកូរ៉េខាងត្បូងបានចុះខ្សោយនៅក្នុងខែសីហាជាលើកដំបូងក្នុងរយៈពេល៦ខែ ដោយសារការព្រួយបារម្ភអំពីកំណើនសេដ្ឋកិច្ចយឺត។
ភ្លាមៗបន្ទាប់ពីចេញផ្សាយទិន្នន័យនេះ រដ្ឋាភិបាលបានចេញផ្សាយបញ្ជីវិធានការចំនួន៥៨ទំព័រ ដើម្បីសម្រាលបន្ទុកអ្នកប្រើប្រាស់ និងជំរុញការចំណាយ ជាពិសេសជុំវិញថ្ងៃបុណ្យថ្លែងអំណរគុណ Chuseok ដែលនឹងចូលមកដល់នៅចុងខែកញ្ញាខាងមុខ។
វិធានការទាំងនេះរួមមាន ការបូកបន្ថែម១ថ្ងៃសម្រាប់រយៈពេលវិស្សមកាល ការចែកចាយប័ណ្ណទិញទំនិញ និងការបញ្ចុះតម្លៃ ខណៈរដ្ឋាភិបាលបានបញ្ជាក់ថា ខ្លួននឹងប្រកាសផែនការដាច់ដោយឡែកនៅខែក្រោយ ដើម្បីទាក់ទាញភ្ញៀវទេសចរចិនឱ្យបានកាន់តែច្រើន៕
