ដោយៈ គង់ សូរិយា
ភ្នំពេញៈ អគ្គនាយកតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ លោក Hiroshi Uematsuបានបង្ហាញពីមោទនភាព ចំពោះការរីកចម្រើននៃតំបន់សេដ្ឋកិច្ចពិសេសនេះ។
ជាក់ស្តែងទំហំនៃការនាំចេញសរុប ពីក្រុមហ៊ុនតំបន់សេដ្ឋកិច្ចពិសេស រ៉ូយាល់ គ្រុបភ្នំពេញ (RGPPSEZ) ដែលបានចុះបញ្ជីនៅផ្សារមូលបត្រកម្ពុជា សម្រេចបាន១,៦២១ ពាន់លានដុល្លារ កាលពីឆ្នាំ២០២៣ ដែលបង្ហាញកំណត់ត្រាកំណើន របស់តំបន់សេដ្ឋកិច្ចពិសេសមួយនេះ ចាប់តាំងពីបានដំណើរការជិត១៨ឆ្នាំ កន្លងមក។
យោងតាមរបាយការណ៍របស់ខ្លួន តំបន់សេដ្ឋកិច្ចពិសេសនេះត្រូវបានបង្កើតឡើងកាលពីឆ្នាំ២០០៦ ក្នុងគោលបំណងបង្កើតទីតាំងដំបូងមួយ សម្រាប់ក្រុមហ៊ុនផលិតមកពីឧស្សាហកម្មផ្សេងៗ និងដើម្បីបង្កើតឱកាសការងារជាច្រើនសម្រាប់ប្រជាជនកម្ពុជា។ តម្លៃនៃការនាំចេញបានកើនឡើងទ្វេដង ក្នុងរយៈពេល៥ឆ្នាំចុងក្រោយ ពោលគឺ ពីតម្លៃ៣១៦លានដុល្លារក្នុងឆ្នាំ២០១៦ ដល់៦៨៣លានដុល្លារក្នុងឆ្នាំ២០២១។
ចំនួននោះបានកើនឡើងទ្វេរដងម្តងទៀត ក្នុងរយៈពេលត្រឹមតែ ១ឆ្នាំបន្ទាប់ប៉ុណ្ណោះ គឺកើនដល់១៣៤៦ លានដុល្លារក្នុងឆ្នាំ២០២២ ហើយនៅឆ្នាំ២០២៣ បានឃើញតម្លៃនាំចេញខ្ពស់បំផុត នៅក្នុងប្រវត្តិសាស្ត្រ នៃការកកើតតំបន់សេដ្ឋកិច្ចពិសេសនេះ ជាមួយនឹងទំហំទឹកប្រាក់នាំចេញដល់១៦២១លានដុល្លារ។
លោក Hiroshi Uematsu អគ្គនាយក RGPPSEZ បានថ្លែងថា ការអភិវឌ្ឍ និងកំណើនដ៏សំខាន់នេះ បានបង្ហាញឱ្យឃើញផងដែរនៅក្នុងតម្លៃនៃការនាំចេញ ក្នុងតំបន់សេដ្ឋកិច្ចពិសេសនេះ ទៅកាន់ទីផ្សារពិភពលោក ។
លោកបញ្ជាក់ថា “ខ្ញុំមានមោទនភាពបំផុត ដែលបានរួមចំណែកដល់៧ភាគរយ ក្នុងតម្លៃនាំចេញសរុបទូទាំងប្រទេសកម្ពុជាទាំងមូល”។ លោកបន្ថែមថា “ការកើនឡើងយ៉ាងខ្លាំងនេះ បានកើតឡើង បើទោះបី ជាស្ថានភាពការរីករាលដាលជំងឺកូវីដ១៩ ដ៏សែនអាក្រក់ក៏ដោយ”។
ការណ៍នេះគឺដោយសារការពង្រីក និងការរីកចម្រើនជាលំដាប់នៃផលិតកម្មរបស់អ្នកវិនិយោគទាំងអស់ ជាពិសេសក្នុងវិស័យអគ្គិសនី និងអេឡិចត្រូនិក និងវិស័យគ្រឿងបង្គុំរថយន្ត។
យោងតាមទិន្នន័យរបស់ RGPPSEZ តម្លៃនៃការនាំចេញពីវិស័យអគ្គិសនី និងអេឡិចត្រូនិក បានកើនឡើង៧១ភាគរយ ពី២៣៤ លានដុល្លារក្នុងឆ្នាំ២០១៩ ដល់៣៩៩លានដុល្លារ ក្នុងឆ្នាំ២០២៣ ហើយតួលេខពីវិស័យគ្រឿងបង្គុំរថយន្តវិញ បានកើនឡើង១៥៦ ភាគរយ ពីតម្លៃ១១៣ លានដុល្លារក្នុងឆ្នាំ២០១៩ ដល់២៨៩លានដុល្លារក្នុងឆ្នាំ២០២៣។
លោក Hiroshi បានលើកឡើងថា “ឥឡូវនេះ យើងខ្ញុំពិតជាមានមោទនភាពក្រៃលែង ដែលបានឃើញតំបន់នេះ មានការអភិវឌ្ឍដូចសព្វថ្ងៃ ដោយមានក្រុមហ៊ុនផលិតកម្មចំនួន៨៦ មកពី១៤ប្រទេសផ្តល់ការងារដល់ប្រជាជនកម្ពុជាចំនួន៤៣,៨០០នាក់ និងជនបរទេសចំនួន៧២០នាក់ នៅក្នុងឧស្សាហកម្ម ដែលមានតម្លៃបន្ថែមខ្ពស់របស់ប្រទេសកម្ពុជា”។
លោកបន្ថែមថា ក្នុងនាមជាអ្នកអភិវឌ្ឍន៍តំបន់សេដ្ឋកិច្ចពិសេស តួលេខខាងលើនេះ ផ្តល់ឱ្យយើងនូវថាមពលកាន់តែច្រើន ដើម្បីបន្តខិតខំប្រឹងប្រែង ផ្តល់នូវតំបន់សេដ្ឋកិច្ចពិសេសមួយ ដ៏ល្អបំផុតសម្រាប់អ្នកវិនិយោគកម្ពុជា និងអន្តរជាតិ សម្រាប់ការធ្វើឱ្យប្រសើរឡើងនៃអាជីវកម្មរបស់អ្នកវិនិយោគ ក៏ដូចជាសេដ្ឋកិច្ចជាតិ និងការរួមចំណែកដល់ឧស្សាហូបនីយកម្មរបស់ប្រទេសផងដែរ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករ (GDCE) បានបង្ហាញថា ការនាំចេញរបស់ប្រទេសកម្ពុជា ក្នុងឆ្នាំ២០២៣ មានទំហំទឹកប្រាក់លើសពី២២,៦៥ពាន់លានដុល្លារ កើនឡើង១,៨ ភាគរយ ធៀបនឹងឆ្នាំ២០២២។ ចំណែកការនាំចូលមានចំនួន២៤,១៨ពាន់លានដុល្លារ ដែលឆ្លុះបញ្ចាំងពីការធ្លាក់ចុះ៥ភាគរយពី២៥៤៦ ពាន់លានដុល្លារក្នុងឆ្នាំ២០២២។
សម្រាប់ការធ្វើពាណិជ្ជកម្មអន្តរជាតិ សរុបរបស់ប្រទេសកម្ពុជាក្នុងឆ្នាំ២០២៣សម្រេចបាន៤៦,៨៣ពាន់លានដុល្លារ ធ្លាក់ចុះ១,៩ភាគរយ ធៀបនឹងឆ្នាំ២០២២។
បណ្តាប្រទេសជាដៃគូពាណិជ្ជកម្មសំខាន់ៗ របស់ប្រទេសកម្ពុជា រួមមាន ចិន អាមេរិក វៀតណាម ថៃ ជប៉ុន ឥណ្ឌូនេស៊ី និងអាល្លឺម៉ង់។ នេះបើយោងតាមGDCE៕
