ដោយៈ គង់ សូរិយា
ភ្នំពេញៈ សមាគមអចលនទ្រព្យលំដាប់ពិភពលោកAREAA Global បានឈានជើងចូលទីផ្សារកម្ពុជា ជាមួយនឹងផែនការពង្រីកការផ្សព្វផ្សាយពីសក្តានុពល និងទាក់ទាញការវិនិយោគលើវិស័យអចលនទ្រព្យមកកាន់ទីផ្សារកម្ពុជា។
ថ្នាក់ដឹកនាំAREAA Global មកពីសហរដ្ឋអាមេរិក បានប្រកាសទទួលស្គាល់លោកជំទាវឧកញ៉ា ស៊ ធីតា ស្ថាបនិក និងជានាយិកាក្រុមហ៊ុន Royal 5G Really Co.,Ltd ជាប្រធាន លោកស្រីតាំង ហួរ ជាអនុប្រធាន និងលោកស្រីចេវ សុឃុនជាអគ្គលេខាធិការប្រចាំកម្ពុជាកាលពីរាត្រីថ្ងៃទី២៤ កុម្ភៈកន្លងមកនេះ។
លោកជំទាវឧកញ៉ាស៊ ធីតាបានមានប្រសាសន៍ក្នុងកម្មវិធីGala Dinner ដែលបានប្រារពធ្វើនៅសណ្ឋាគារSun& Moonថា កម្ពុជាមានសក្តានុពលលើវិស័យអចលនទ្រព្យ ស្របពេលសេដ្ឋកិច្ចកម្ពុជាមានកំណើនល្អប្រសើរ ដោយរំពឹងទទួលបានកំណើន៦,៦ភាគរយនៅឆ្នាំ២០២៤នេះ។
លោកជំទាវបន្តថា វិស័យអចលនទ្រព្យ កសិកម្ម វិស័យវាយណភ័ណ្ឌ និងវិស័យទេសចរណ៍មានភាពរីកចម្រើន ដែលផ្តល់កាលានុវត្តន៍ភាពល្អប្រសើរ សម្រាប់ផ្សព្វផ្សាយ និងទាក់ទាញការវិនិយោគពីសហរដ្ឋអាមេរិកមកកាន់កម្ពុជា។
ជាមួយគ្នានេះ លោកស្រីតាំង ហួរអនុប្រធានAREAA Globalបានមានប្រសាសន៍ឲ្យដឹងផងដែរថា ការចូលរួមជាមួយAREAA Globalពិតជាមានសារៈសំខាន់ ពិសេសការតភ្ជាប់បណ្តាញអ្នកវិនិយោគពីបរទេសមកកាន់កម្ពុជា។ លោកស្រីបន្តថា យើងមានសមាគមហើយ ប៉ុន្តែយើងត្រូវចុះបញ្ជីរនៅកម្ពុជា និងគ្រោងជ្រើសរើសសមាជិកនៅរយៈពេលបី ទៅបួនខែខាងមុខ។
លោកស្រីបន្តថា សមាគមAREAA Global មានមូលដ្ឋាននៅអាមេរិក ប៉ុន្តែសមាជិកភាគច្រើនជាជនជាតិអាស៊ី ដែលធ្វើឲ្យយើងងាយ ទំនាក់ទំនងគ្នា និងស៊ីសង្វាក់គ្នា។ លោកស្រីបន្តថា សមាគមនេះ មានអាយុកាលយូរមកហើយ និងមានសមាជិកនៅប្រទេសជាច្រើន ដែលសមាគមនេះ ផ្តោតសំខាន់លើការពង្រីកឱកាស និងទាក់ទាញការវិនិយោគទៅវិញទៅមក។
លោកស្រីតាំង ហួរបានបន្តថា “អ្វីសំខាន់ គឺយើងទាក់ទងពួកគាត់ឲ្យមកវិនិយោគនៅកម្ពុជា ព្រោះយើងចង់រួមចំណែកទំនាក់ទំនង និងជួយប្រទេសជាតិរបស់យើង”។ លោកស្រីបន្ថែមថា “យើងកុំរង់ចាំថាតើរដ្ឋាភិបាលបានធ្វើអ្វីដើម្បីយើង ប៉ុន្តែយើងត្រូវសួរខ្លួនឯងថា បានធ្វើអ្វីសំរាប់ជាតិរបស់យើង ទើបជារឿងសំខាន់”។
លោកALLEN CHIANG ប្រធានAREAA Globalដែលបានមកកម្ពុជាជាលើកដំបូង បានសម្តែងការភ្ញាក់ផ្អើលនៅពេលលោកឃើញការរីកចម្រើនរបស់កម្ពុជា ដែលជាប្រទេសមានសក្តានុពលក្នុងការវិនិយោគ។
លោកបន្តថា “យើងរីករាយ និងគាំទ្រចំពោះការពង្រីកវត្តមានAREAA Globalមកកាន់កម្ពុជា”។
AREAA Globalបានមូលដ្ឋាននៅសហរដ្ឋអាមេរិក និងមានសមាជិកសរុប១៨,០០០នាក់ បែងចែកជា៥១ជាតិសាសន៍ និងនិយាយ២៦ភាសា៕
