ដោយៈ គង់ សូរិយា
ភ្នំពេញៈ លោកបណ្ឌិតBen Li អគ្គនាយកក្រុមហ៊ុនUrban Hubដែលបាន និងកំពុងអភិវឌ្ឍន៍គំរោងដ៏ធំមួយនៅរាជធានីភ្នំពេញ បានកោតសរសើរគេហទំព័រPropertyarea.asia ដែលបានរួមចំណែកលើកកំពស់ការផ្សព្វផ្សាយ ព័ត៌មានអចលនទ្រព្យនៅកម្ពុជា។
លោកបានមានប្រសាសន៍ឲ្យដឹងកាលពីពេលថ្មីៗនេះថា ការផ្សព្វផ្សាយព័ត៌មាន ទាក់ទងវិស័យអចលនទ្រព្យយ៉ាងស៊ីជម្រៅ និងក្នុងភាពវិជ្ជមាន បានធ្វើឲ្យគេហទំព័រនេះ មានការទទួលស្គាល់យ៉ាងទូលំទូលាយនៅកម្ពុជា។
លោកបន្តថា “គេហទំព័រនេះ ពិតជាធ្វើបានល្អ និងកំពុងរួមចំណែកលើកស្ទួយវិស័យនេះ”។ លោកបន្តថា “Propertyarea បានក្លាយជាplatformមួយ ដែលផ្សព្វផ្សាយនិយាយពីការអភិវឌ្ឍន៍ និងព័ត៌មានមានលក្ខណៈវិជ្ជមាន និងប្រកបដោយការស្ថាបនា”។
គេហទំព័រPropertyarea.asia បានចាប់កំណើតនៅឆ្នាំ២០១៧ ដោយអ្នកជំនាញមួយក្រុម ដែលបានមើលឃើញចន្លោះខ្វះខាតការផ្សព្វផ្សាយព័ត៌មាន មានលក្ខណៈវិជ្ជមាន ក៏ដូចជាភាពខ្វះខាតនូវចំណេះដឹងក្នុងវិស័យនេះ ស្របពេលវិស័យសំណង់ និងអចលវត្ថុនៅកម្ពុជាមានការីកចម្រើនយ៉ាងលឿន។
សហស្ថាបនិក និងជាអគ្គនាយកគេហទំព័រPropertyarea.asiaលោកយិន លាងគង់បានមានប្រសាសន៍ថ្លែង អំណរគុណដល់លោកបណ្ឌិតBen Li ក៏ដូចជាអ្នកអភិវឌ្ឍន៍ ក្រុមហ៊ុនភ្នាក់ងារ និងប្រជាពលរដ្ឋទូទៅ ដែលបានគាំទ្រ និងផ្តល់ទំនុកចិត្តលើការផ្សព្វផ្សាយព័ត៌មានគេហទំព័ររបស់យើងកន្លងមក។
លោកបន្តថា “នៅក្នុងវិស័យសារព័ត៌មាន ការផ្សព្វផ្សាយព័ត៌មានវិជ្ជមាន និងមានលក្ខណៈគ្រប់ជ្រុងជ្រោយ មានសារៈសំខាន់ណាស់ ដើម្បីផ្តល់ពុទ្ឋិ និងទំនុកចិត្តដល់សាធារណៈជន និងអ្នកវិនិយោគជាតិ អន្តរជាតិ”។ លោកបន្តថា “ក្នុងដំណើរការរយៈពេលជិត៧ឆ្នាំកន្លងមកនេះ យើងទទួលបានការទទួលស្គាល់ពីអ្នកអាន អ្នកវិនិយោគជាតិ អន្តរជាតិ ដោយសារយើងប្រកាន់យកនូវការផ្សាយ ព័ត៌មានមានលក្ខណៈវិជ្ជមាន គោរពក្រមសីលធ៌មវិជ្ជាជីវៈ ផ្តល់ព័ត៌មានលឿន រហ័ស និងអាចទុកចិត្តបាន”។
លោកយិន លាងគង់បានបន្តដោយគូសបញ្ជាក់ផងដែរថា មានអ្នកអានមួយចំនួន បានប្រតិកម្មនឹងការផ្សព្វផ្សាយព័ត៌មាន ដែលមានលក្ខណៈវិជ្ជមាន ប៉ុន្តែយើងឈរលើមូលដ្ឋានពិត និងផ្តល់ព័ត៌មានគ្រប់ជ្រុងជ្រោយ។ លោកបន្តថា យើងទទួលយកការរិះគន់ក្នុងន័យស្ថាបនា និងស្នើឲ្យអ្នកអានពិចារណា វិភាគឲ្យបានស៊ីជម្រៅ មុននឹងប្រតិកម្មលើរឿងអ្វីមួយ ជាជាងគ្រាន់តែអានចំណងជើង ហើយចាប់ផ្តើមប្រតិកម្ម ដោយមិនបានពិចារណា ឬមិនបានយល់ពីជម្រៅនៃសាច់រឿងនៅឡើយ”៕
