ដោយ: គង់ លាងហួរ
អន្តរជាតិ: លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុថៃ បានជំរុញឱ្យគណៈកម្មាធិការគោលនយោបាយរូបិយវត្ថុ (MPC) របស់ធនាគារកណ្តាលថៃ (BOT) បើកសម័យប្រជុំបន្ទាន់មួយ ដើម្បីពិចារណាកាត់បន្ថយអត្រាការប្រាក់ភ្លាមៗ ដើម្បីការពារសេដ្ឋកិច្ចថៃ ពីការធ្លាក់ចូលទៅក្នុងវិបត្តិ។
លោក សេដ្ឋា លើកឡើងថា “របាយការណ៍សេដ្ឋកិច្ចដែលចេញផ្សាយ ដោយក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDC) ថ្ងៃនេះបានបង្ហាញថា សេដ្ឋកិច្ចរបស់ប្រទេសថៃ កំពុងស្ថិតក្នុងដំណាក់កាលដ៏គ្រោះថ្នាក់មួយ”។
លោកបានបន្តថា “អគ្គលេខាធិការក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ ក៏បានយល់ស្របនឹងការកាត់បន្ថយ អត្រាគោលនយោបាយដែរ”។ លោកបន្ថែមថា “ដូច្នេះ ខ្ញុំសូមស្នើឱ្យគណៈកម្មាធិការ MPC កំណត់ពេលប្រជុំជាបន្ទាន់ ដើម្បីពិចារណាលើការបញ្ចុះអត្រាការប្រាក់ មុនកាលវិភាគកិច្ចប្រជុំ ដែលបានគ្រោងទុកនៅខែមេសា”។
ការអំពាវនាវរបស់លោក សេដ្ឋា បានធ្វើឡើង បន្ទាប់ពីក្រុមប្រឹក្សា NESDC បានប្រកាសថា ផលទុនជាតិសរុប (GDP) នៅត្រីមាសទី៤ ឆ្នាំ២០២៣ បានកើនឡើងត្រឹមតែ១,៧% បើធៀបនឹងរយៈពេលដូចគ្នា ក្នុងឆ្នាំ២០២២ និងទាបជាងការព្យាករណ៍ ក្នុងការស្ទង់មតិរបស់កាសែត Reuters ក្នុងរង្វង់២,៥%។
កំណើនGDP ពេញមួយឆ្នាំ២០២៣ ស្ថិតក្នុងអត្រា១,៩% ដែលធ្លាក់ចុះពី២,៥% ក្នុងឆ្នាំ២០២២។ ជាមួយគ្នានេះ ក្រុមប្រឹក្សា NESDC ក៏បានបន្ទាបកំណើនGDP សម្រាប់ឆ្នាំ២០២៤នេះ ពី៣,២% មកនៅត្រឹម២,៧%ថែមទៀតផង។
ក្នុងកិច្ចប្រជុំមួយ កាលពីថ្ងៃទី៧ ខែកុម្ភៈ ធនាគារកណ្តាលថៃបានបោះឆ្នោត ដើម្បីរក្សាទុកអត្រាការប្រាក់ក្នុងរង្វង់២,៥% ដែលជាកម្រិតខ្ពស់បំផុតក្នុងរយៈពេល១០ឆ្នាំ។ នៅមុនកិច្ចប្រជុំនេះ លោក សេដ្ឋា ធ្លាប់បានអំពាវនាវដល់គណៈកម្មាធិការMPC ឱ្យពិចារណាកាត់បន្ថយ អត្រាការប្រាក់ចំនួន២៥ពិន្ទុមូលដ្ឋាន ខណៈប្រទេសថៃបានរងគ្រោះ ដោយសារអត្រាអតិផរណាអវិជ្ជមាន អស់រយៈពេល៤ខែជាប់ៗគ្នាមកហើយ៕