ដោយ: គង់ លាងហួរ
អន្តរជាតិ: អ្នកវិនិយោគនៅទូទាំង តំបន់អាស៊ីប៉ាស៊ីហ្វិក (APAC) កំពុងងាកទៅវិនិយោគលើមាស ដើម្បីធ្វើពិពិធកម្ម និងទាញអត្ថប្រយោជន៍ ស្របពេលកំណើនសេដ្ឋកិច្ច ស្ថិតក្នុងភាពមិនច្បាស់លាស់ និងការកើនឡើងហានិភ័យ ភូមិសាស្ត្រនយោបាយ។
ការហក់ឡើងនៃតម្រូវការវិនិយោគ លើហាងឆេងមាសនៅតំបន់អាស៊ីប៉ាស៊ីហ្វិកទាំងមូល បានជំរុញឱ្យតម្លៃមាសបន្តហក់ឡើងថ្លៃយ៉ាងគំហុក កាលពីខែឧសភា ដោយសារតែបណ្តាអ្នកវិនិយោគ បាត់បង់ជំនឿលើប្រភេទទ្រព្យ សកម្មផ្សេងទៀត ដូចជា ភាគហ៊ុន និងអចលនទ្រព្យ។
លោក Gary Ng សេដ្ឋវិទូជាន់ខ្ពស់នៅធនាគារវិនិយោគបារាំង Natixis បានមានប្រសាសន៍ឱ្យដឹងថា “ការវិនិយោគលើហាងឆេងមាស បានកើនឡើងជាលំដាប់ ដោយសារតម្លៃមាសត្រូវបានជំរុញ ដោយកំណើនតម្រូវការប្រើប្រាស់ និងជាទ្រព្យសកម្មដែលមានសុវត្ថិភាព ក្នុងអំឡុងពេលដែលមានហានិភ័យភូមិសាស្ត្រនយោបាយ”។
លោកបានមានប្រសាសន៍ឱ្យដឹងបន្តថា បច្ចុប្បន្ននេះ អ្នកវិនិយោគចាត់ទុកមាស ជាផ្នែកមួយដ៏សំខាន់នៃផលប័ត្រ ដើម្បីធ្វើពិពិធកម្មហានិភ័យ។ លោករំពឹងថា បណ្តាអ្នកគ្រប់គ្រងទ្រព្យសកម្មនៅតំបន់អាស៊ីប៉ាស៊ីហ្វិក នឹងមានចំណាប់អារម្មណ៍កាន់តែខ្លាំងលើមាស។
លោកស្រី Min Lan Tan ប្រធានការិយាល័យវិនិយោគនៅធនាគារ UBS Global Wealth Management ប្រចាំតំបន់អាស៊ីប៉ាសុីហ្វិក បានលើកឡើងថា បញ្ហាដ៏ធំដែលមិនអាចទស្សន៍ទាយបានសម្រាប់តំបន់អាស៊ី គឺការបោះឆ្នោតប្រធានាធិបតីនៅសហរដ្ឋអាមេរិកនាខែវិច្ឆិកាខាងមុខ”។
លោកស្រីបានអះអាងថា “ប្រសិនបើលោក Trump ទទួលបានជ័យជំនះម្តងទៀត នោះភាពមិនប្រាកដប្រជានឹងកើនឡើងកាន់តែខ្ពស់ ព្រោះតែការដាក់របាំងពន្ធគយ”។ លោកស្រីបានបញ្ជាក់បន្ថែមថា “ដើម្បីទប់ស្កាត់ហានិភ័យ ដែលអាចកើតចេញពីរបាំងពន្ធ ធនាគារ UBS កំពុងសម្រុកទិញមាសស្តុកទុក ក្នុងចំណោមទ្រព្យសម្បត្តិផ្សេងៗទៀត”។
យោងតាមការស្ទង់មតិ ដែលធ្វើឡើងរួមគ្នាដោយក្រុមហ៊ុនគ្រប់គ្រងការវិនិយោគ State Street Global Advisors និងក្រុមប្រឹក្សាមាសពិភពលោក(WGC) បង្ហាញថា ក្នុងរយៈពេល១២ខែ ទៅ១៨ខែខាងមុខនេះ ចំនួន២៧ភាគរយនៃម្ចាស់ទ្រព្យសកម្មសរុបនៅតំបន់APAC គ្រោងបង្កើនការវិនិយោគលើហាងឆេងមាស ខណៈម្ចាស់ទ្រព្យសកម្ម នៅតំបន់អាមេរិកខាងជើង ដែលគ្រោងបង្កើនការវិនិយោគ លើហាងឆេងមាស មានចំនួនត្រឹមតែ២១ភាគរយប៉ុណ្ណោះ៕ប្រភព:SCMP៕
