ដោយៈ គង់ សូរិយា
កំពង់ចាមៈ គម្រោងពង្រីកកំណាត់ផ្លូវជាតិលេខ៧ ចាប់ពីរង្វង់មូលស្គន់ទៅទីរួមខេត្តកំពង់ចាម សម្រេចបានការសាងសង់បានប្រមាណ២០ភាគរយ ជាមួយនឹងផែនការចំណាយប្រមាណ១០០លានដុល្លារ។
ការដោះស្រាយផលប៉ះពាល់ពីគំរោងនេះ សម្រេចបាន៨៥ភាគរយហើយ។ នេះបើយោងតាមប្រសាសន៍របស់សម្ដេចធិបតីហ៊ុន ម៉ាណែត នាយករដ្ឋមន្ត្រីកម្ពុជាបានលើកឡើងនៅក្នុងពិធីទិវាមច្ឆជាតិ១ កក្កដា នៅស្រុកព្រៃឈរ ខេត្តកំពង់ចាម។
គម្រោងពង្រីកកំណាត់ផ្លូវជាតិលេខ៧ មានប្រវែង៤៥ គីឡូម៉ែត្រ នឹងត្រូវពង្រីកពី២ គន្លងទៅ៤គន្លង បានបើកការដ្ឋានសាងសង់កាលពីថ្ងៃទី៩ ខែមករា ឆ្នាំ ២០២៣ ក្រោមកម្ចីសម្បទានជាង១០០លានដុល្លាររបស់រដ្ឋាភិបាលចិន។
គម្រោងពង្រីក និងលើកកម្រិតគុណភាពផ្លូវជាតិលេខ៧ នេះ សាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ដោយប្រើរយៈពេលសាងសង់៤០ខែ ហើយគ្រោងនឹងបញ្ចប់នៅឆ្នាំ២០២៦ ចំណាយថវិកាសរុប១១៧លានដុល្លារ ដែលជាឥណទានសម្បទាន ពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា ដើម្បីដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ៕
