ដោយ: គង់ លាងហួរ
អន្តរជាតិ: ប្រទេសបារាំង និងប្រទេសអ៊ីតាលី ដែលជាក្បាលម៉ាស៊ីនសេដ្ឋកិច្ច ដ៏សំខាន់ចំនួន២ របស់សហភាពអឺរ៉ុប(EU) កំពុងសាងសង់គម្រោង ផ្លូវដែកល្បឿនលឿនក្រោមដី ដើម្បីតភ្ជាប់ការធ្វើដំណើររវាងប្រទេសទាំង២។
គម្រោងប្រកបដោយមហិច្ឆិតានេះ គ្រោងចំណាយទុនវិនិយោគសាងសង់ ក្នុងទំហំទឹកប្រាក់២១,១ពាន់លានផោន(ប្រហែល២៦,៧៥ពាន់លានដុល្លារ)។ នៅពេលការសាងសង់បញ្ចប់រួចរាល់ អ្នកដំណើរនឹងមានជម្រើស ធ្វើដំណើរតាមផ្លូវគោកបានលឿនជាងមុន និងកាត់បន្ថយចរាចរណ៍តាមផ្លូវអាកាស។
ផ្លូវរថភ្លើងល្បឿនលឿននេះ មានប្រវែងសរុបប្រហែល២៧៣,៦គីឡូម៉ែត្រ ដែលតភ្ជាប់រវាងទីក្រុងMilan ក្នុងប្រទេសអ៊ីតាលីជាមួយរដ្ឋធានីប៉ារីសប្រទេសបារាំង។
ចំណែករថភ្លើង ដែលធ្វើដំណើរនៅលើផ្លូវនេះ នឹងអាចរត់បានក្នុងចម្ងាយ២២០គីឡូម៉ែត្រក្នុងមួយម៉ោង។
បណ្តាញផ្លូវដែកនេះ នឹងផ្តល់អត្ថប្រយោជន៍យ៉ាងច្រើន ដូចជា ការផ្ទេរចរាចរណ៍ដឹកទំនិញ ពីរថយន្តដឹកទំនិញទៅកាន់ផ្លូវដែក ដើម្បីកាត់បន្ថយការបំភាយឧស្ម័នកាបូន និងការបំពុលបរិយាកាសក្នុងតំបន់ ព្រមទាំងផ្តល់សេវាកម្មដឹកជញ្ជូនអ្នកដំណើរផងដែរ។
ដូច្នេះហើយ នៅពេលបើកដាក់ឱ្យប្រើប្រាស់ នោះអ្នកដំណើរ នឹងអាចឡើងជិះរថភ្លើងចេញ ពីទីក្រុង Milan ទៅកាន់ទីក្រុងប៉ារីស ដោយចំណាយពេលត្រឹមតែ៤ម៉ោងប៉ុណ្ណោះ បើ ធៀបទៅនឹងពេលវេលា ធ្វើដំណើរបច្ចុប្បន្នប្រមាណ៧ម៉ោង។
គម្រោងនេះបានបើកការដ្ឋានសាងសង់ គិតចាប់តាំងពីឆ្នាំ២០០២មកម្ល៉េះ តាមរយៈការសាងសង់ចំណុចច្រកចូល និងការជីករុករកភូមិសាស្ត្រ។ គម្រោងនេះ ត្រូវបានគេប្រកាសថា នឹងបញ្ចប់ការសាងសង់រួចរាល់ ជាស្ថាពរនៅក្នុងឆ្នាំ២០៣២ខាងមុខ៕ប្រភព:Express.co.uk៕
