ដោយ: គង់ លាងហួរ
អន្តរជាតិ: ក្រុមហ៊ុនខ្នាតយក្ស Trump Organization របស់អតីតប្រធានាធិបតីអាមេរិក លោក Donald Trump បានប្រកា សផែនការសាងសង់ អគារប្រណីតខ្ពស់កប់ពពកមួយ ដែលមានឈ្មោះថា “Trump Tower” នៅក្នុងប្រទេសអារ៉ាប៊ីសាអូឌីត។
អគារថ្មីនេះនឹងត្រូវបានសាងសង់ឡើង នៅក្នុងទីក្រុង Jeddah និងត្រូវបានចាប់ដៃគូអភិវឌ្ឍន៍រួមគ្នា ជាមួយក្រុមហ៊ុន Dar Global ដែលជាបុត្រសម្ព័ន្ធអន្តរជាតិ របស់ក្រុមហ៊ុនអចល នទ្រព្យខ្នាតយក្ស Dar Al Arkan របស់អារ៉ាប៊ីសាអូឌីត។
លោក Eric Trump អនុប្រធានប្រតិបត្តិក្រុមហ៊ុន Trump Organization និងជាកូនប្រុសរបស់អតីត ប្រធានាធិបតីអាមេរិកលោក Donald Trump បានអះអាងថា “យើងមានសេចក្តីរំភើបរីករាយ ក្នុងការពង្រីកការបោះជំហានរបស់យើង នៅតំបន់មជ្ឈិមបូព៌ា និងនាំយកស្តង់ដារអគារប្រណីត ទៅកាន់តំបន់នេះ តាមរយៈទំនាក់ទំនង ដ៏ចំណាស់យូរលង់របស់យើងជាមួយក្រុមហ៊ុន Dar Global” ។
ជុំវិញដំណឹងនេះ ភាគីខាងក្រុមហ៊ុនDar Global បានលើកឡើងថា គម្រោងនេះនឹងកំណត់គោលដៅលើ “ទីផ្សារនៅប្រទេ សអារ៉ាប៊ីសាអូឌីត និងបណ្តាអ្នកវិនិយោគអន្តរជាតិ”។
គម្រោងសាងសង់អគារTrump Tower នៅក្នុងប្រទេសអារ៉ាប៊ីសាអូឌីត ត្រូវបានប្រកាសឡើង ត្រឹមតែប៉ុន្មានថ្ងៃប៉ុណ្ណោះ បន្ទាប់ពីក្រុមហ៊ុនដៃគូទាំង២ខាងលើ បានដាក់បង្ហាញគម្រោងសណ្ឋាគារលំដាប់អន្តរជាតិ Trump International ដែលមានតម្លៃទុនវិនិយោគ ចំនួន៥០០លានដុល្លារក្នុងប្រទេសអូម៉ង់។
សណ្ឋាគារលំដាប់ផ្កាយ៥មួយនេះគ្រោងនឹងបើកដាក់ឱ្យដំណើរការនៅខែធ្នូឆ្នាំ២០២៨ខាងមុខ។អគារនេះនឹងរួមមានក្លឹបរាត្រីទីលានវាយកូនហ្គោលនិងក្លឹបសម្រាប់តែសមាជិកប៉ុណ្ណោះ។
ជាមួយគ្នានោះ ក្រុមហ៊ុន Dar Al Arkan បានឯកភាពប្រើឈ្មោះ និងនិមិត្តសញ្ញា “Trump”តាមរយៈការស្នើសុំអាជ្ញាប័ណ្ណ ប៉ុន្តែសណ្ឋាគារនេះ ពុំមែនជាកម្មសិទ្ធិ នៃក្រុមហ៊ុនរបស់លោក Donald Trump នោះទេ៕ប្រភព:CNN៕
