ដោយៈ ស៊ីវ ម៉េង
ភ្នំពេញៈ ប្រាក់ចំណូលរបស់មនុស្សម្នាក់ក្នុងមួយឆ្នាំ ជាសូចនាករដ៏សំខាន់ សម្រាប់កំណត់នូវសុខភាពសេដ្ឋកិច្ច និងសាច់សដុំរបស់ប្រទេសមួយ។
តើប្រជាពលរដ្ឋនៅរាជធានីភ្នំពេញមានប្រាក់ចំណូលប្រចាំឆ្នាំប៉ុន្មានក្នុងមួយឆ្នាំ? លោក កែវ ចិត្រា ប្រធាននាយកដ្ឋានគណនេយ្យជាតិ វិទ្យាស្ថានស្ថិតិ នៃក្រសួងផែនការ បានមានប្រសាសន៍ឲ្យដឹង ក្នុងកម្មវិធីមួយកាលពីចុងសសប្តាហ៍មុនថា ខេត្ដដែលមានកម្រិតចំណូលប្រចាំឆ្នាំសម្រាប់ប្រជាជនម្នាក់ ទាបជាងគឺខេត្ដឧត្ដរមានជ័យ ខណៈខេត្ដដែលប្រជាជនមាន ចំណូលខ្ពស់ជាងគឺខេត្ដព្រះសីហនុ ដែលប្រជាជនមានចំណូលជាង៤ពាន់ដុល្លារ សម្រាប់ប្រជាជនម្នាក់ ហើយតាមពីក្រោយ គឺរាជធានីភ្នំពេញ ដែលប្រជាជនម្នាក់មានប្រាក់ចំណូលមធ្យមជាង៣ពាន់ដុល្លារ។
-->
លោកបានពន្យល់ថា ការគណនាកម្រិតប្រាក់ចំណូលនេះ ត្រូវធ្វើឡើងតាមស្ដង់ដា របស់អង្គការសហប្រជាជាតិ ដោយផ្អែកលើផលិតកម្មរបស់ខេត្ដនីមួយៗ។
លោកកែវ ចិត្រាបានបន្តថា ជាក់ស្ដែងនៅខេត្ដស្ទឹងត្រែង មានទំនប់វារីអគ្គិសនីមួយធំ ដែលផលិតកម្មវារីអគ្គិសនីនេះត្រូវបានរាប់បញ្ចូលទៅក្នុង ផសស ខេត្ដស្ទឹងត្រែង។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោកផាន់ផល្លា បានមានប្រសាសន៍ថា កំណើនផសស ប្រាកដជាធ្វើឱ្យកម្ពុជាខាតបង់ការអនុគ្រោះផ្សេងៗ តែចៀសមិនផុត កម្ពុជាត្រូវតែធ្វើ។ ការផ្លាស់ប្ដូររចនាសម្ព័ន្ធសេដ្ឋកិច្ចនេះ វាកើតឡើងនៅតាមពេលវេលា និងស្ថានភាពជាក់ស្ដែងនៃសេដ្ឋកិច្ច។
លោកបានអះអាងថា “យើងបានត្រៀមខ្លួនរួចហើយ ជាពិសេសការចាកចេញពីប្រទេសក្រីក្រ ទៅជាប្រទេសកំពុងអភិវឌ្ឍន៍”៕
