ដោយ: គង់ លាងហួរ
អន្តរជាតិ: ប្រទេសម៉ាឡេស៊ី និងថៃគ្រោងពិភាក្សាគ្នាអំពីការបង្កើតក្រុមការងារ សហការលើផ្នែកពាណិជ្ជកម្ម និងការវិនិយោគឆ្លងព្រំដែន រវាងក្រសួងវិនិយោគ ពាណិជ្ជកម្ម និងឧស្សាហកម្មរបស់ម៉ាឡេស៊ី និងក្រសួងពាណិជ្ជកម្មថៃ។
ម៉ាឡេស៊ីគ្រោងនឹងធ្វើជាម្ចាស់ផ្ទះ កិច្ចពិភាក្សាទាំងនេះនៅចុងខែកក្កដា។ ជាមួយគ្នានេះ ប្រទេសថៃ ក៏បានស្នើឱ្យមានការបង្កើតគម្រោងទីក្រុងភ្លោះ(Twin city) ដើម្បីអភិវឌ្ឍន៍បណ្តាខេត្តភាគខាងត្បូងចំនួន៥របស់ខ្លួន តាមរយៈភាពជាដៃគូជាមួយប្រទេសម៉ាឡេស៊ី។
-->
ក្រោមគំនិតផ្តួចផ្តើមបង្កើត ទីក្រុងភ្លោះនេះ ខេត្ត Satun ខេត្ត Songkhla ខេត្ត Yala ខេត្ត Pattani និងខេត្ត Narathiwat របស់ថៃ នឹងត្រូវបានផ្គូផ្គង ជាមួយរដ្ឋចំនួន៥របស់ម៉ាឡេស៊ី រួមមាន រដ្ឋ Perlis រដ្ឋ Kedah រដ្ឋPerak រដ្ឋ Terengganu និងរដ្ឋ Kelantan ។
លោក Phumtham Wechayachai រដ្ឋមន្ត្រីក្រសួងពាណិជ្ជកម្មថៃបានលើកឡើងថា “គំនិតផ្តួចផ្តើមនេះ មានគោលបំណងប្រែក្លាយតំបន់ជម្លោះ ក្នុងខេត្តទាំងនេះទៅជាតំបន់ពាណិជ្ជកម្ម និងថែមទាំងអាចជំរុញ ឱ្យមានសន្តិភាពនៅតាមច្រកព្រំដែន”។
លើសពីនេះ លោក Phumtham បានស្នើឱ្យភាគីម៉ាឡេស៊ី ជួយពន្លឿនការពិចារណា លើសេចក្តីព្រាងអនុស្សរណៈយោគយល់គ្នា (MoU) ស្តីពីការដឹកជញ្ជូនទំនិញឆ្លងដែន និងការដឹកអ្នកដំណើរ ព្រមទាំងសម្រួលដល់សកម្មភាពពាណិជ្ជកម្ម តាមព្រំដែនរវាងប្រទេសថៃ និងម៉ាឡេស៊ី ខណៈភាគីទាំង២គ្រោងចុះហត្ថលេខាលើ MoU នៅចុងឆ្នាំនេះ។
ប្រទេសទាំង២ក៏បានបង្ហាញបំណង បង្កើតភាពជាដៃគូថ្មី ដែលនឹងផ្តល់ផលប្រយោជន៍ដល់សេដ្ឋកិច្ច និងសហគ្រិន ដោយស្របតាមគោលនយោបាយ ដើម្បីលើកកម្ពស់ពាណិជ្ជកម្ម កាត់បន្ថយរបាំងពាណិជ្ជកម្ម និងបង្កើនទំហំពាណិជ្ជកម្មទ្វេរភាគី។
បច្ចុប្បន្ន ម៉ាឡេស៊ីគឺជាដៃគូពាណិជ្ជកម្ម ធំបំផុតលេខ១របស់ប្រទេសថៃក្នុងតំបន់អាស៊ាន។ ទំហំពាណិជ្ជកម្មរវាងប្រទេសទាំង២ សម្រេចបានទឹកប្រាក់សរុប ចំនួន២៥ពាន់លានដុល្លារកាលពីឆ្នាំមុន និង១១ពាន់លានដុល្លារក្នុងអំឡុងរយៈពេល៥ខែដំបូងដើមឆ្នាំ២០២៤នេះ៕ប្រភព: Bangkok Post៕
