ដោយ: គង់ លាងហួរ
អន្តរជាតិ: គម្រោងអចលនទ្រព្យ Forest City នៅប្រទេសម៉ាឡេស៊ី ដែលជាប់ឈ្មោះថាជា “ទីក្រុងខ្មោច” កំពុងស្រូបទាញក្រុមហ៊ុនផលិតកម្ម ខ្សែភាពយន្តអន្តរជាតិល្បីៗ ដូចជាក្រុមហ៊ុន Netflix និងក្រុមហ៊ុន KBS ជាដើម។
គម្រោង Forest City នេះបានចាប់ផ្តើមបើកការដ្ឋានសាងសង់នៅចុងឆ្នាំ២០១៥ ដែលមានទំហំទុនវិនិយោគ១០០ពាន់លានដុល្លារ និងមានគោលដៅជំរុញ ទីផ្សារអចលនទ្រព្យម៉ាឡេស៊ី។ ដើមឡើយ អ្នកអភិវឌ្ឍន៍គម្រោងនេះ បានប្រកាសផែនការផ្គត់ផ្គង់លំនៅដ្ឋាន សម្រាប់ប្រជាជនចំនួន៧០ម៉ឺននាក់នៅឆ្នាំ២០៣៥ ដែលក្នុងនោះរួមមាន ទាំងអគារអាផាតម៉ិន សួនទឹក និងសណ្ឋាគារ។
-->
ទោះជាយ៉ាងណាក្តី គម្រោងទីក្រុងខ្នាតយក្សមួយនេះប្រែជាមានសភាពស្ងប់ស្ងាត់ទៅវិញ និងបានក្លាយជាបន្ទុកដ៏ធំមួយសម្រាប់ក្រុមហ៊ុនចិនCountry Garden ដោយសារតែលំនៅដ្ឋាន ក្នុងគម្រោងមិនសូវមានមនុស្សរស់នៅ ខណៈអគារមួយចំនួនធំបានជាប់គាំង។
ប៉ុន្តែនៅពេលនេះ គម្រោងទីក្រុងលំនៅដ្ឋាន Forest City ហាក់កំពុងតែទទួលបាន ការចាប់អារម្មណ៍សារជាថ្មីឡើងវិញ បន្ទាប់ពីកម្មវិធីទូរទស្សន៍ធំៗ និងភាពយន្តឯកសារល្បីៗមួយចំនួន បានជួយធ្វើការផ្សព្វផ្សាយអំពីគម្រោងនេះ។
យោងតាមកាសែត Business Insider បានចុះផ្សាយថា ទិដ្ឋភាពទីក្រុងនេះ ត្រូវបានគេថតដាក់បញ្ចូល នៅក្នុងវគ្គមួយរបស់កម្មវិធី “The Mole” ដែលជាកម្មវិធីប្រកួតប្រជែង ដើម្បីទទួលបានប្រាក់រង្វាន់នារដូវកាលទី២ របស់ក្រុមហ៊ុន Netflix។
ទស្សនិកជនសង្កេតឃើញថា ក្នុងវគ្គទី១០ នៃកម្មវិធី“The Mole” រដូវកាលទី២ ត្រូវបានថតយកទិដ្ឋភាពទាំងស្រុង នៅប្រទេសម៉ាឡេស៊ី ជាពិសេសនៅទីក្រុង Forest City ទីក្រុងគូឡាឡាំពួរ និងកោះ Tioman។
ត្រង់ចំណុចមួយនោះ លោក Ari Shapiro ដែលជាពិធីករក្នុងកម្មវិធី បានលើកឡើងថា Forest City គឺជាគោលដៅដ៏ល្អឥតខ្ចោះ សម្រាប់វិស្សមកាលចំពោះមនុស្ស ដែលមានលទ្ធភាពចំណាយខ្ពស់។
ក្រុមហ៊ុន Netflix ជាក្រុមហ៊ុនផលិតភាពយន្តដំបូងគេ ដែលបានជ្រើសរើសទីក្រុង Forest City ជាទីតាំងសម្រាប់ថត។ ក្រុមហ៊ុនបានបង្ហាញនូវការពេញចិត្ត ចំពោះទិដ្ឋភាពអគារខ្ពស់ៗ ដែលមានទីតាំងនៅមាត់សមុទ្រ ព្រមទាំងមានសណ្ឋាគារ និងទីតាំងវាយកូនហ្គោលដ៏ធំល្វឹងល្វើយ ដែលជាទីតាំងអំណោយផលដល់ការថតខ្សែភាពយន្ត។
លើសពីនេះ ក្រុមហ៊ុន KBS របស់កូរ៉េខាងត្បូងក៏បានថតភាពយន្ត “Battle Trip”ដែលមានទម្រង់ជាវីដេអូឯកសារ ខណៈទូរទស្សន៍អាល្លឺម៉ង់ ProSieben ក៏បានថតភាពយន្តឯកសារខ្លីអំពីទីក្រុងមួយនេះផងដែរ។ ចំណែកភាពយន្តឯកសាររបស់ក្រុមហ៊ុនមកពីប្រទេសអូទ្រីស ដែលមានចំណងជើងថា “Hungry: Tipping the Scales” ក៏ត្រូវបានថតនៅទីនោះដែរ។
ការស្រូបទាញបានចំណាប់អារម្មណ៍ របស់ផលិតករខ្សែភាពយន្តខ្នាតអន្តរជាតិ មកកាន់ទីក្រុង Forest City អាចជាសញ្ញាវិជ្ជមានមួយ ក្នុងការបង្ហាញពីសក្តានុពលទេសចរណ៍ និងការកម្សាន្តនៅក្នុងតំបន់នេះ ទៅកាន់ពិភពលោកឡើងវិញ។
លោក Samuel Tan នាយកប្រតិបត្តិក្រុមហ៊ុនប្រឹក្សាអចលនទ្រព្យ KGV International Property Consultants បង្ហាញសុទិដ្ឋិនិយមថា “ទីក្រុងForest City នឹងត្រូវបានផ្សព្វផ្សាយកាន់តែទូលំទូលាយ ដល់សាធារណៈជនអន្តរជាតិ និងអាចទាក់ទាញ ភ្ញៀវទេសចរណ៍ឱ្យមកទស្សនា និងទទួលបានបទពិសោធន៍ ដោយសារខ្សែភាពយន្ត និងកម្មវិធីទូរទស្សន៍ធំៗត្រូវបានថតនៅទីនេះ”៕ប្រភព: Business Insider៕
