ដោយ: គង់ លាងហួរ
បាងកក: បណ្តាក្រុមអ្នកវិនិយោគចិនជាច្រើន បានចាប់ដៃគូជាមួយក្រុមហ៊ុនថៃ ដើម្បីទិញដីឡូតិ៍ និងរោងចក្ររបស់ក្រុមហ៊ុនអាជីវកម្ម ដែលបានបិទទ្វារពីទីភ្នាក់ងារគ្រប់គ្រងបំណុល Bangkok Commercial Asset Management (BAM)។
លោក Bundit Anantamongkol ប្រធាន និងជានាយកប្រតិបត្តិទីភ្នាក់ងារ BAM បានលើកឡើងថា វិនិយោគិនចិនបានទិញដី រោងចក្រឧស្សាហកម្ម និងឃ្លាំងដែលទីភ្នាក់ងារ BAM បានប្រកាសដាក់លក់នៅឆ្នាំនេះ ដែលភាគច្រើនមានទីតាំងនៅខេត្ត Rayong។
យ៉ាងណាមិញ លោក Bundit មិនបានបង្ហាញព័ត៌មានលម្អិតជុំវិញដំណឹងនេះនោះទេ។ លោកគ្រាន់តែបានអះអាងថា “វិនិយោគិនចិនបានចូលមកទិញ អចលនទ្រព្យយ៉ាងច្រើនសន្ធឹកសន្ធាប់ ដោយសារតែតម្លៃបានធ្លាក់ចុះ ហើយពួកគេមានគម្រោងពង្រីកអាជីវកម្មរបស់ខ្លួន នៅប្រទេសថៃនាពេលខាងមុខ”។
លោករំពឹងថា “ប្រភេទអចលនទ្រព្យមិនដំណើរការ ឬក្ស័យធន(NPAs) ដែលមានតម្លៃមិនលើសពី៣លានបាត នឹងត្រូវបានលក់មកឱ្យទីភ្នាក់ងារ BAM បន្ថែមទៀត ដើម្បីលក់ឡាយឡុង បន្តទៅឱ្យអតិថិជនថ្មី នៅក្នុងឆមាសទីពីរនៃឆ្នាំនេះ”។
ទីភ្នាក់ងារ BAM បានជួយសម្រួលបន្ទុកដល់ស្ថាប័នហិរញ្ញវត្ថុនានា តាមរយៈការគ្រប់គ្រងបំណុលអាក្រក់ និងទិញយកគម្រោងអចលនទ្រព្យដែលក្ស័យធន។ ទីភ្នាក់ងារនេះក៏បានគ្រប់គ្រង និងលក់អចលនទ្រព្យមួយចំនួនផងដែរ រួមមានដូចជាផ្ទះ ដីធ្លី និងខុនដូជាដើម។
លោក Bundit បានព្យាករណ៍ថា “បណ្តាធនាគារពាណិជ្ជ និងក្រុមហ៊ុនសាជីវកម្ម គ្រប់គ្រងទ្រព្យសកម្មនានា គ្រោងលក់អចលនទ្រព្យ ដែលមិនដំណើរការ (NPAs) បន្ថែមទៀតមកកាន់ទីភ្នាក់ងារ BAM ក្នុងឆមាសទី២ ស្របតាមការណែនាំរបស់ធនាគារកណ្តាលថៃ”៕ប្រភព: The Nation ៕
