ដោយ: គង់ លាងហួរ
អន្តរជាតិ: ក្រុមអ្នកជំនាញអះអាងថា នៅខែសីហាខាងមុខ គឺជាខែមួយដ៏សំខាន់ សម្រាប់ព្យាករណ៍ចំនួនពលរដ្ឋចិន ដែលនឹងមកទស្សនាកោះភូកេត នៅត្រីមាសទី៤ ខណៈការផ្គត់ផ្គង់ខុនដូនៅលើកោះនេះ បានកើនឡើងខ្ពស់បំផុត មិនធ្លាប់មានក្នុងប្រវត្តិសាស្ត្រ។
លោក Nattha Kahapana នាយកគ្រប់គ្រងក្រុមហ៊ុនប្រឹក្សាអចលនទ្រព្យ Knight Frank Thailand បានលើកឡើងថា ជាធម្មតា ទីភ្នាក់ងារទេសចរណ៍ចិន តែងមកទស្សនាកោះភូកេតក្នុងខែសីហា ដើម្បីស្វែងរកកន្លែងស្នាក់នៅ និងស្ទាបស្ទង់ផលិតផលទេសចរណ៍ ក្នុងគោលដៅរៀបចំដំណើរកំសាន្ត ក្នុងខែតុលាខាងមុខ។
លោកបានបន្តថា “ការមកដល់នៃទីភ្នាក់ងារទេសចរណ៍ចិននៅខែក្រោយ នឹងអនុញ្ញាតឱ្យយើងអាចធ្វើការ ស្ទាបស្ទង់មើលថា តើពលរដ្ឋចិននឹងមកលេងកំសាន្ត នៅកោះភូកេតក្នុងត្រីមាសទី៤ខាងមុខ ដែរឬទេ?”។ លោកជឿជាក់ថា “ការវិលត្រឡប់មកវិញរបស់ភ្ញៀវទេសចរណ៍ចិន នឹងផ្តល់ផលវិជ្ជមានចំពោះទីផ្សារខុនដូ នៅលើកោះនេះ ព្រោះនាពេលកន្លងមក ចិនគឺជាជនជាតិបរទេស ដែលទិញខុនដូច្រើនជាងគេនៅប្រ ទេសថៃ”។
យោងតាមមជ្ឈមណ្ឌលព័ត៌មាន អចលនទ្រព្យថៃ(REIC) បានរាយការណ៍ថា ជនជាតិចិន និងរុស្ស៊ីបាននាំមុខគេ ក្នុងចំណោមជនបរទេសផ្សេងទៀត ដែលទទួលបានការផ្ទេរខុនដូច្រើនជាងគេបង្អស់ ក្នុងអំឡុងឆ្នាំ២០១៨ និងឆ្នាំ២០២៣។
លោក Nattha បានព្យាករណ៍ថា “ការផ្គត់ផ្គង់ខុនដូថ្មីសរុបចំនួន៥.៧៣៩យូនីត នឹងត្រូវបានដាក់បញ្ចូល ទៅក្នុងទីផ្សារនៅកោះភូកេតក្នុងឆ្នាំ២០២៤នេះ ហើយការត្រលប់មកវិញរបស់ពលរដ្ឋចិន ពិតជាមានសារៈសំខាន់ណាស់”។
លោកNattha បានបន្ថែមថា ជនជាតិចិនដើរតួនាទីយ៉ាងសំខាន់នៅក្នុងទីផ្សារខុនដូ ដោយសារពួកគេចូលចិត្តកំសាន្តនៅលើកោះនេះ ពេញមួយឆ្នាំតែម្តង មិនដូចជនជាតិអឺរ៉ុប ដែលភាគច្រើនមកលេង ក្នុងរដូវកាល High season ខណៈពលរដ្ឋមកពីតំបន់មជ្ឈឹមបូព៌ា និងឥណ្ឌាចូលចិត្តមកកំសាន្តនៅរដូវវស្សា៕ប្រភព: Bangkok Post៕