ដោយ: គង់ លាងហួរ
អន្តរជាតិ: ក្រុមសេដ្ឋវិទូបានលើកឡើងថា សេដ្ឋកិច្ចរបស់សហរដ្ឋអាមេរិក កំពុងបង្ហាញសញ្ញាកាន់តែច្បាស់អំពីការធ្លាក់ចុះនៃសន្ទុះកំណើន បន្ទាប់ពីទិន្នន័យបង្ហាញថា អត្រាអ្នកគ្មានការងារធ្វើនៅអាមេរិកបានកើនឡើង ខណៈប្រាក់ឈ្នួលប្រចាំខែមិថុនា ត្រូវបានដំឡើងក្នុងកម្រិតទាបបំផុត។
លោក Matthew Boesler សេដ្ឋវិទូអាមេរិកដ៏ល្បីល្បាញមួយរូបប្រចាំសារពត៌មាន Bloomberg បានអះអាងថា កំណើនប្រាក់ឈ្នួលប្រចាំខែមិថុនា ដែលជាសូចនាករដ៏សំខាន់មួយសម្រាប់ស្ទាបស្ទង់ ស្ថានភាពសេដ្ឋកិច្ចអាមេរិក បានកើនឡើងក្នុងកម្រិតទាបបំផុត មិនធ្លាប់មានគិតចាប់តាំងពីឆ្នាំ២០២១។
-->
យោងតាមរបាយការណ៍ ពីការិយាល័យស្ថិតិនៃក្រសួងការងារអាមេរិក បានបង្ហាញថា ប្រាក់ឈ្នួលជាមធ្យមរបស់អ្នកធ្វើការនៅសហរដ្ឋអាមេរិក បានកើនឡើង១០សេន ដល់៣៥ដុល្លារក្នុងមួយម៉ោង ឬស្មើនឹងកំណើន០,៣ភាគរយ នៅខែមិថុនា បន្ទាប់ពីកើនឡើង០,៤ភាគរយ នៅខែឧសភា។នេះបើយោងតាមការគណនាដោយផ្អែកលើមូលដ្ឋានប្រចាំខែ។
ប៉ុន្តែបើយោងតាមការគណនា ដោយផ្អែកលើមូលដ្ឋានប្រចាំឆ្នាំបង្ហាញថា ប្រាក់ឈ្នួលរបស់អ្នកធ្វើការ នៅសហរដ្ឋអាមេរិក បានកើនឡើង៣,៩ភាគរយ ដែលនេះជាកំណើនទាបបំផុតមិនធ្លាប់ជួបប្រទះគិត ចាប់តាំងពីខែមិថុនា ឆ្នាំ២០២១ ខណៈប្រាក់ឈ្នួលនៅខែឧសភា បានកើនឡើង៤,១ភាគរយ។
ជាមួយគ្នានោះ អត្រាគ្មានការងារធ្វើវិញ បានកើនឡើងពី៤,០ភាគរយនៅខែឧសភា ឡើងដល់៤,១ភាគរយ នៅខែមិថុនា ដែលជាកម្រិតខ្ពស់បំផុត គិតចាប់តាំងពីខែវិច្ឆិកា ឆ្នាំ ២០២១។
កំណើនអត្រាគ្មានការងារធ្វើ បានបណ្តាលឱ្យប្រជាជនអាមេរិកកាន់តែច្រើន កាត់បន្ថយការចំណាយរបស់ខ្លួន ខណៈការចាយវាយរបស់អ្នកប្រើប្រាស់(Consumer Spending)ចូលរួមចំណែកប្រហែល៧០ភាគរយ នៃទំហំសេដ្ឋកិច្ចអាមេរិ។ នេះបើតាមការចុះផ្សាយដោយសារព័ត៌មាន CNN។
ទិន្នន័យសេដ្ឋកិច្ចអវិជ្ជមានទាំងនេះ គួបផ្សំនឹងការធ្លាក់ចុះយ៉ាងសន្សឹមៗ នៃអត្រាអតិផរណា កាលពីខែឧសភា អាចនឹងជួញជំរុញឱ្យធនាគារកណ្តាលអាមេរិក កាត់បន្ថយអត្រាការប្រាក់នៅខែកញ្ញា ឬខែធ្នូខាងមុខ ដើម្បីលើកទឹកចិត្តប្រជាជនអាមេរិក ឱ្យបង្កើនការចំណាយរបស់ពួកគេឡើងវិញ ៕ប្រភព: Bloomberg៕
