ដោយៈ គង់ លាងហួរ
ភ្នំពេញ: ការប្រកាសអនុវត្តន៍ គម្រោងសាងសង់ព្រែកជីកហ្វូណនតេជោ ដែលមានទំហំទុនវិនិយោគប្រមាណ១,៧ពាន់លានដុល្លារអាមេរិក បានឆ្លុះបញ្ចាំងពីទំនុកចិត្ត និងការជឿជាក់កាន់តែខ្លាំងឡើងរបស់កម្ពុជា ក្នុងការស្វែងរកផលប្រយោជន៍ជាតិ។
លោក Kavi Chongkittavorn អ្នកកាសែតជើងចាស់ទទួលបន្ទុកផ្នែកកិច្ចការតំបន់ បានសរសេរអត្ថបទមួយ ដែលត្រូវបានចុះផ្សាយដោយកាសែត Bangkok Post ដែលមានខ្លឹមសារថា “គម្រោងហេដ្ឋារចនាសម្ព័ន្ធផ្លូវទឹក ជាប្រវត្តិសាស្ត្រមួយនេះ នឹងជំរុញឱ្យប្រទេសកម្ពុជាស្ទុះទៅមុខ និងក្លាយជាខ្លាតូចមួយ ដែលពោរពេញដោយថាមពល ហើយកម្ពុជាពុំមែនជាប្រទេស ដែលហែកហួរ ដោយសារសង្រ្គាមតទៅទៀតឡើយ”។
ក្រោមការដឹកនាំនាពេលបច្ចុប្បន្ន របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោក Kavi សង្កេតឃើញថា “កម្ពុជាកំពុងប្រកាន់ជំហរកាន់តែរឹងមាំ បើទោះបីជាខ្លួនប្រឈមមុខនឹងការជំទាស់ ពីប្រទេសជិតខាង ដូចជា វៀតណាម ដែលព្យាយាមវាយប្រហារ មកលើគម្រោងព្រែកជីកនេះជាញឹកញាប់”។
គម្រោងផ្លូវនាវាចរណ៍ប្រវែង១៨០គីឡូម៉ែត្រ ដែលមានទទឹងប្រវែង១០០ម៉ែត្រ និងមានជម្រៅ៥,៤ម៉ែត្រមួយនេះ នឹងតភ្ជាប់កំពង់ផែស្វយ័តក្រុងភ្នំពេញ ជាមួយឆ្នេរសមុទ្រខេត្តកែប នៅឈូងសមុទ្រថៃ ខណៈបច្ចុប្បន្ន កម្ពុជាពឹងផ្អែកយ៉ាងខ្លាំងលើការប្រើប្រាស់កំពង់ផែ របស់វៀតណាម សម្រាប់ការដឹកជញ្ជូនទំនិញតាមផ្លូវសមុទ្រ ជាពិសេសគឺ កំពង់ផែ Cai Mep។
នៅពេលគម្រោងត្រូវបានសាងសង់បញ្ចប់រួចរាល់ ព្រែកជីកថ្មីនេះត្រូវបានគេរំពឹងថា នឹងជួយកាត់បន្ថយការពឹងផ្អែករបស់កម្ពុជា ទៅលើប្រទេសវៀតណាម ដោយសារកប៉ាល់កម្ពុជានឹងអាចបើកបរ តាមរយៈផ្លូវវាងពីទឹកដីវៀតណាម បានទាំងស្រុង។
ការប្រកាសអភិវឌ្ឍន៍គម្រោងនេះឡើងបានជំរុញឱ្យមានការចាប់អារម្មណ៍និងការជជែកពិភាក្សាគ្នាយ៉ាងច្រើន។យ៉ាងណាម៉ិញកម្ពុជានៅតែមានការប្តេជ្ញាចិត្តខ្ពស់ក្នុងការស្ថាបនាគម្រោងនេះឱ្យទទួលបានជោគជ័យទោះបីជាភាគីវៀតណាមបានសម្តែងការព្រួយបារម្ភអំពីផលប៉ះពាល់បរិស្ថានយ៉ាងណាក្តី។
គិតរហូតមកដល់ពេលនេះ បណ្តាប្រទេសដែលស្ថិតនៅជាប់អាងទន្លេមេគង្គខាងក្រោមផ្សេងទៀត ដូចជា ប្រទេសមីយ៉ាន់ម៉ា ប្រទេសឡាវ និងប្រទេសថៃ បានរក្សាភាពស្ងៀមស្ងាត់ និងមិនបង្ហាញប្រតិកម្មអ្វីឡើយចំពោះគម្រោងនេះ។
ក្នុងនាមជាគម្រោងហេដ្ឋារចនាសម្ព័ន្ធ ជាយុទ្ធសាស្ត្រ ព្រែកជីកហ្វូណនតេជោ នឹងជួយបង្កើនការតភ្ជាប់របស់កម្ពុជា និងកាត់បន្ថយការពឹងផ្អែកលើផ្លូវទឹក និងកំពង់ផែរបស់វៀតណាម។ សំខាន់ជាងនេះទៅទៀត គម្រោងផ្លូវនាវាចរណ៍នេះ ក៏នឹងតំណាងឱ្យកេរដំណែល របស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជាផងដែរ។
សម្តេចធិបតី ហ៊ុន ម៉ាណែត ដែលដឹកនាំរដ្ឋាភិបាលបន្តវេនពីសម្តេចតេជោ បានចាត់ទុកគម្រោងព្រែកជីកនេះថា ជា “ការដកដង្ហើមតាមច្រមុះរបស់កម្ពុជាខ្លួនឯង ដោយមិនខ្ចីច្រមុះគេដក” ដែលការណ៍នេះឆ្លុះបញ្ចាំងឱ្យឃើញ ពីបំណងប្រាថ្នារបស់កម្ពុជា ដើម្បីជំរុញស្វ័យភាពយុទ្ធសាស្ត្រឱ្យកាន់តែខ្លាំង។
ដើម្បីបញ្ជាក់ពីការប្តេជ្ញាចិត្ត យ៉ាងមុតមាំរបស់ខ្លួន កម្ពុជាគ្រោងនឹងប្រារព្ធពិធី បើកការដ្ឋានសាងសង់គម្រោងព្រែកជីកហ្វូណនតេជោនៅថ្ងៃទី៥ ខែសីហាខាងមុខនេះ ដែលចំនឹងថ្ងៃកំណើតរបស់សម្តេចតេជោតែម្តង ព្រោះសម្តេចគឺជាតួអង្គដ៏សំខាន់បំផុត ក្នុងការផ្តួចផ្តើមគម្រោងព្រែកជីកនេះ ឱ្យលេចជារូបរាងឡើង។
បន្ថែមពីលើនេះ រដ្ឋាភិបាលកម្ពុជា បានស្នើឱ្យប្រជាពលរដ្ឋនៅទូទាំងប្រទេសចូលរួមទូងស្គរ និងរៀបចំការបាញ់កាំជ្រួច ដើម្បីអបអរសាទរក្នុងឱកាសនោះ ហើយថ្នាក់ដឹកនាំក្រសួង–ស្ថាប័នរដ្ឋនានា ក៏បានសំណូមពរដល់គ្រប់វត្តអារាម ទូងស្គរទៅតាមពេលវេលាកំណត់ ដើម្បីប្រារព្ធពិធីនេះ ឱ្យកាន់តែអធិកអធ័ម៕ប្រភព: Bangkok Post៕