ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យ CBRE បានចេញផ្សាយរបាយការណ៍ សិក្សាអំពីតម្លៃខុនដូជាមធ្យម នៅតាមទីក្រុងធំៗមួយចំនួន ក្នុងតំបន់អាស៊ាននៅត្រីមាសទី២ ឆ្នាំ២០២៤។
របាយការណ៍សិក្សានេះ បានគូសបញ្ជាក់អំពីប្រាក់ចំណូលជាមធ្យម ក្នុងមួយឆ្នាំរបស់ប្រជាជនម្នាក់ៗ(GDP Per Capita)។
របាយការណ៍បង្ហាញថា តម្លៃខុនដូជាមធ្យម នៅទីក្រុងហូជីមិញ ប្រទេសវៀតណាម ក្នុងត្រីមាសទី២ ត្រូវបានដាក់លក់ក្នុងតម្លៃ២.៨០០ដុល្លារ ក្នុងមួយម៉ែត្រការ៉េ ខណៈប្រជាជនម្នាក់ៗ ក្នុងទីក្រុងមានប្រាក់ចំណូល ជាមធ្យមចំនួន៧.៥០០ដុល្លារក្នុងមួយឆ្នាំ។
ចំណែក តម្លៃខុនដូ ជាមធ្យមនៅទីក្រុងហាណូយ ក្នុងត្រីមាសទី២ដដែល ត្រូវបានដាក់លក់ក្នុងតម្លៃ២.៦០០ដុល្លារ ក្នុងមួយម៉ែត្រការ៉េ ខណៈប្រជាជនម្នាក់ៗ ក្នុងរដ្ឋធានីមួយនេះមានប្រាក់ចំណូលជាមធ្យម ចំនួន៦.៣០០ដុល្លារក្នុងមួយឆ្នាំ។
ចំណែកតម្លៃខុនដូ ជាមធ្យមនៅទីក្រុងហ្សាការតា ប្រទេសឥណ្ឌូនេស៊ី ក្នុងត្រីមាសទី២ ត្រូវបានដាក់លក់ក្នុងតម្លៃ២.៣០០ដុល្លារក្នុងមួយម៉ែត្រការ៉េ ខណៈប្រជាជនម្នាក់ៗ ក្នុងទីក្រុងនេះមានប្រាក់ចំណូលជាមធ្យម ចំនួន១៨.០០០ដុល្លារក្នុងមួយឆ្នាំ។
ងាកមកកាន់ ទីក្រុងគូឡាឡាំពួរ ប្រទេសម៉ាឡេស៊ី តម្លៃខុនដូ ក្នុងត្រីមាសទី២ ត្រូវបានដាក់លក់ក្នុងតម្លៃ២.៦០០ដុល្លារក្នុងមួយម៉ែត្រការ៉េ ដូចនៅទីក្រុងហាណូយដែរ ខណៈប្រជាជនម្នាក់ៗក្នុងទីក្រុងគូឡាំឡាំពួរ មានប្រាក់ចំណូលជាមធ្យមចំនួន២៨.០០០ដុល្លារក្នុងមួយឆ្នាំ។
រីឯតម្លៃអាផាតម៉ិន ជាមធ្យមនៅទីក្រុងម៉ានីល ប្រទេសហ្វីលីពីន ក្នុងត្រីមាសទី២ ត្រូវបានដាក់លក់ក្នុងតម្លៃ៣.៩០០ដុល្លារក្នុងមួយម៉ែត្រការ៉េ ខណៈប្រជាជនម្នាក់ៗក្នុងរដ្ឋធានីមួយនេះ មានប្រាក់ចំណូលជាមធ្យមចំនួន៨.៩០០ដុល្លារ ក្នុងមួយឆ្នាំ។
ចំណែកតម្លៃខុនដូ ជាមធ្យមនៅទីក្រុងបាងកក ប្រទេសថៃ ក្នុងត្រីមាសទី២ ត្រូវបានដាក់លក់ក្នុងតម្លៃ៥.៣០០ដុល្លារ ក្នុងមួយម៉ែត្រការ៉េ ខណៈប្រជាជនម្នាក់ៗ ក្នុងរាជធានីមួយនេះមានប្រាក់ចំណូល ជាមធ្យមចំនួន១៩.០០០ដុល្លារ ក្នុងមួយឆ្នាំ៕ប្រភព: Vnexpress៕
