ដោយ: គង់ លាងហួរ
អន្តរជាតិ: ក្រុមហ៊ុន Temasek របស់រដ្ឋាភិបាលសិង្ហបុរី គ្រោងនឹងបណ្តាក់ទុនវិនិយោគ ទឹកប្រាក់រហូតដល់១០ពាន់លានដុល្លារអាមេរិក នៅក្នុងប្រទេសឥណ្ឌា ក្នុងរយៈពេល៣ឆ្នាំខាងមុខ ដោយផ្តោតលើ វិស័យសំខាន់ៗដូចជា សេវាហិរញ្ញវត្ថុ និងការថែរទាំសុខភាព។
លោក Mohit Bhandari នាយកគ្រប់គ្រងក្រុមហ៊ុនTemasek ទទួលបន្ទុកលើការវិនិយោគ នៅប្រទេសឥណ្ឌា បានមានប្រសាសន៍ឱ្យដឹងថា “សេដ្ឋកិច្ចឥណ្ឌាកំពុងកើនឡើងយ៉ាងគំហុក ហើយទីផ្សារភាគហ៊ុនរបស់ប្រទេសនេះ ក៏កំពុងហក់ឡើងថ្លៃផងដែរ”។
លោកបន្តថា “ចំណែកទីផ្សារចំនួន៧% នៃចំណែកទីផ្សារសរុបជាសកល របស់ក្រុមហ៊ុន Temasek មានប្រភពពីប្រទេសឥណ្ឌា ហើយយើងគ្រោងបន្តបោះទុនវិនិយោគ ដើម្បីបង្កើនចំណែកទីផ្សារនៅឥណ្ឌា ឱ្យកើនឡើងខ្ពស់ជាងនេះបន្ថែមទៀត”។
លោក Bhandari បានថ្លែងនៅក្នុងបទសម្ភាសន៍មួយនៅការិយាល័យក្រុមហ៊ុនTemasek ប្រចាំទីក្រុង Mumbai ថា “យើងមានសុទិដ្ឋិនិយមរយៈពេលវែង ចំពោះប្រទេសឥណ្ឌា។ យើងដឹង អំពីភាពតានតឹងផ្នែកសេដ្ឋកិច្ច និងភូមិសាស្ត្រនយោបាយបច្ចុប្បន្ន ដែលកំពុងកើតឡើងនៅក្នុងប្រទេសចិន ហើយយើងនឹងធ្វើពិពិធកម្ម ផលប័ត្ររបស់យើងទៅតាមនោះដែរ”។
ក្រុមហ៊ុន Temasek បានប្រកាសថា ប្រាក់ចំណេញ ដែលខ្លួនទទួលបានពីការវិនិយោគ នៅសហរដ្ឋអាមេរិក និងឥណ្ឌាកំពុងជួយទប់ទល់ នឹងផលប៉ះពាល់ពីដំណើរការអាជីវកម្ម មិនប្រក្រតីនៅក្នុងប្រទេសចិន ខណៈក្រុមហ៊ុននេះ កំពុងចាត់វិធានការប្រកបដោយភាពប្រុងប្រយ័ត្ន ចំពោះប្រទេសចិន ស្របពេលមានភាពតានតឹងពាណិជ្ជកម្ម។
ចំណែកប្រមាណ២២ភាគរយ នៃទុនវិនិយោគសរុបរបស់ក្រុមហ៊ុន Temasek គឺស្ថិតនៅសហរដ្ឋអាមេរិក ខណៈចំណែកចំនួន១៩ភាគរយ ស្ថិតនៅក្នុងប្រទេសចិន ហើយទំហំនៃការបោះទុនវិនិយោគរបស់ក្រុមហ៊ុន Temasek នៅអាមេរិកបានវ៉ាដាច់ទំហំទុនវិនិយោគ នៅប្រទេសចិនជាលើកដំបូង នៅក្នុងឆ្នាំ២០២៣៕ប្រភព: CNA៕
